ନୂଆଦିଲ୍ଲୀ: ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ରବିବାର ସିବିଆଇ ଗିରଫ କରିଥିଲା । ସୋମବାର ତାଙ୍କୁ କୋର୍ଟରେ ହାଜର କରାଯାଇଥିଲା। ମନୀଷ ସିସୋଦିଆ ଅରବିନ୍ଦ କେଜ୍ରିୱାଲଙ୍କ ପରେ ଆମ୍ ଆଦମୀ ପାର୍ଟିର ସବୁଠାରୁ ଶକ୍ତିଶାଳୀ ନେତା ଭାବେ ବେଶ ଜଣାଶୁଣା। ତାଙ୍କୁ ଗିରଫ କରାଯିବା ପରେ ଆମ୍ ଆଦମୀ ପାର୍ଟିର କର୍ମୀ ଓ ନେତାମାନେ ଏବେ ବିରୋଧ କରୁଛନ୍ତି।ଉତ୍ତରପ୍ରଦେଶର ଏକ ସାଧାରଣ ପରିବାରରେ ଜନ୍ମ ହୋଇଥିବା ସିସୋଦିଆ ଦିନେ ସାମ୍ବାଦିକ ଥିଲେ। ତେବେ ସିସୋଦିଆ କିପରି ଜଣେ ସାମ୍ବାଦିକରୁ ରାଜନେତା ହେଲେ? ସେ ଅରବିନ୍ଦ କେଜ୍ରିୱାଲଙ୍କୁ କିପରି ଭେଟିଲେ ଏବଂ ସେମାନେ କିପରି ଏକତ୍ର ରାଜନୈତିକ ଯାତ୍ରା ଆରମ୍ଭ କଲେ? ଆସନ୍ତୁ ଜାଣିବା | ମନୀଷ ସିସୋଦିଆ ୫ ଜାନୁୟାରୀ ୧୯୭୨ ରେ ଉତ୍ତରପ୍ରଦେଶର ହାପୁଡ଼ ଜିଲ୍ଲାର ଫାଗୋଟା ଗ୍ରାମରେ ଜନ୍ମଗ୍ରହଣ କରିଥିଲେ।
ସିସୋଦିଆଙ୍କ ପିତା ଏକ ସରକାରୀ ବିଦ୍ୟାଳୟରେ ଶିକ୍ଷକ ଥିଲେ। ସିସୋଦିଆ ନିଜ ପ୍ରାଥମିକ ଶିକ୍ଷା ଗାଁର ସରକାରୀ ବିଦ୍ୟାଳୟରେ ସମାପ୍ତ କରିଥିଲେ । ଏହା ପରେ ସିସୋଦିଆ ଦିଲ୍ଲୀ ଆସି ଉଚ୍ଚଶିକ୍ଷା ଲାଭ କଲେ | ସେ ୧୯୯୩ ରେ ଭାରତୀ ବିଦ୍ୟା ଭବନରୁ ସାମ୍ବାଦିକତାରେ ଡିପ୍ଲୋମା ହାସଲ କରିଥିଲେ। ସାମ୍ବାଦିକତାରେ ଡିପ୍ଲୋମା କରିବା ପରେ ସିସୋଦିଆ ଜଣେ ସାମ୍ବାଦିକ ହୋଇଥିଲେ। ସେ ପ୍ରିଣ୍ଟ ମିଡିଆ ଠାରୁ ଆରମ୍ଭ କରି ଇଲେକ୍ଟ୍ରୋନିକ୍ ମିଡିଆରେ କାର୍ଯ୍ୟ କରିଥିଲେ | ୧୯୯୬ ରୁ ୨୦୦୫ ପର୍ଯ୍ୟନ୍ତ ସେ ଏକ ଘରୋଇ ନ୍ୟୁଜ୍ ଚ୍ୟାନେଲରେ ସାମ୍ବାଦିକ ଥିଲେ। ସେ ୨୦୦୬ରେ ସାମ୍ବାଦିକତା ଛାଡିଥିଲେ। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ମନୀଷ ସିସୋଦିଆଙ୍କ ବନ୍ଧୁତା ବହୁ ବର୍ଷ ପୁରୁଣା। ଏକ ରିପୋର୍ଟ ଅନୁଯାୟୀ, ୧୯୯୮ରେ ଦୁହେଁ ପ୍ରଥମ ଥର ପାଇଁ ପରସ୍ପରକୁ ଭେଟିଥିଲେ | ଅରବିନ୍ଦ କେଜ୍ରିୱାଲ ଜଣେ ଆଇଆରଏସ ଅଧିକାରୀ ଥିଲେ ଏବଂ ବସ୍ତି ବାସିନ୍ଦାଙ୍କ ପାଇଁ ସାମାଜିକ କାର୍ଯ୍ୟ କରୁଥିଲେ। ଏହିଠାରୁ ଉଭୟଙ୍କ ବନ୍ଧୁତା ଆରମ୍ଭ ହେଲା | ପରେ ସେ ଅରବିନ୍ଦ କେଜ୍ରିୱାଲଙ୍କ ସହ ‘ପବ୍ଲିକ କଜ ରିସର୍ଚ୍ଚ ଫାଉଣ୍ଡେସନ’ ପ୍ରତିଷ୍ଠା କରିଥିଲେ। ଉଭୟେ ‘ପରିବର୍ତ୍ତନ’ ନାମକ ଏନଜିଓ ମଧ୍ୟ ଗଠନ କରିଥିଲେ। ୨୦୦୬ ପରେ, ସିସୋଦିଆ ଚାକିରି ଛାଡି ଏନଜିଓରେ ପୂର୍ଣ୍ଣକାଳୀନ କାମ କରିବା ଆରମ୍ଭ କଲେ |
୨୦୧୧ରେ, ଯେତେବେଳେ ଆନ୍ନା ହଜାରେ ଜନ ଲୋକପାଲ ବିଲକୁ ନେଇ ଆନ୍ଦୋଳନ କରିଥିଲେ, ଅରବିନ୍ଦ କେଜ୍ରିୱାଲ ଏବଂ ମନୀଷ ସିସୋଦିଆ ଏଥିରେ ଯୋଗ ଦେଇଥିଲେ । ଏହା ପରେ, ଅକ୍ଟୋବର ୨, ୨୦୧୨ରେ ଅରବିନ୍ଦ କେଜ୍ରିୱାଲ ଆନ୍ନା ହଜାରେଙ୍କଠାରୁ ଅଲଗା ହୋଇ ଏକ ନୂତନ ରାଜନୈତିକ ଦଳ ଗଠନ କରିବାକୁ ଘୋଷଣା କରିଥିଲେ। ସିସୋଦିଆ ମଧ୍ୟ ଏଥିରେ ଯୋଗ ଦେଇଥିଲେ। ୨୦୧୩ ରେ ଦିଲ୍ଲୀ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା ଏବଂ ମନୀଷ ସିସୋଦିଆ ପଟପଡ଼ଗଞ୍ଜ ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ। ସେବେଠାରୁ ସେ ରାଜନୀତିରେ ଅଛନ୍ତି |
