ଭୁବନେଶ୍ବର : ଜଗନ୍ନାଥ ମନ୍ଦିରର ବିଶୃଙ୍ଖଳିତ ସେବାୟତଙ୍କୁ ବାଟକୁ ଆଣିବାକୁ ନିଷ୍ପତ୍ତି ନେଇଛି ଶ୍ରୀମନ୍ଦିର ପ୍ରଶାସନ । ମହାପ୍ରଭୁଙ୍କ ସେବା ପୂଜାରେ ବିଶୃଙ୍ଖଳା ହେଉ କି ଭକ୍ତଙ୍କୁ ଦୁର୍ବ୍ୟବହାର। ଏଥିପାଇଁ ଆସନ୍ତା ୪ ଓ ୫ ଦୁଇ ଦିନ ଧରି ଆୟୋଜନ କରିବାକୁ ଯାଉଛି ଏକ ପ୍ରଶିକ୍ଷଣ ଶିବିର । ଏହି ଶିବିରରେ ସବୁ ନିଯୋଗର ସେବାୟତଙ୍କ ସହ ପୁରୀ ପୋଲିସ୍ ଓ ଶ୍ରୀମନ୍ଦିର କର୍ମଚାରୀ ମଧ୍ୟ ସାମିଲ ହେବେ । ଏହା ଦ୍ବାରା ଭକ୍ତଙ୍କ ପ୍ରତି ସେବାୟତଙ୍କ ଆଚରଣରେ ପରିବର୍ତ୍ତନ ଆସିବ ବୋଲି ଭକ୍ତ ଆଶା ରଖିଛନ୍ତି।
ଭକ୍ତଙ୍କ ସହ ଆଚରଣ ଓ ଉଚ୍ଚାରଣରେ କିଭଳି ଆସିବ ସେନେଇ ଶୃଙ୍ଖଳାର ପ୍ରଶିକ୍ଷଣ ନେବେ ଶ୍ରୀମନ୍ଦିର ସେବାୟତ । ଏଥିପାଇଁ ଆସନ୍ତା ଏପ୍ରିଲ ୪ ଓ ୫ ତାରିଖ, ସକାଳ ୧୦ଟାରୁ ସନ୍ଧ୍ୟା ସାଢ଼େ ୫ଟା ଯାଏଁ ପୁରୀ ନିଳାଦ୍ରୀ ଭକ୍ତ ନିବାସରେ ଦୁଇ ଦିନ ଧରି ପ୍ରଶିକ୍ଷଣ ଶିବିରର ଆୟୋଜନ କରିବାକୁ ଯାଉଥିବା ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ଗଣମାଧ୍ୟମକୁ ସୂଚନା ଦେଇଛନ୍ତି । ଏହା ସହିତ ମହାପ୍ରଭୁଙ୍କଙ୍କ ଦୈନନ୍ଦିନ ସେବା ପୂଜାରେ ନିୟୋଜିତ ଥିବା ବିଭିନ୍ନ ସେବାୟତ ନିଯୋଗଙ୍କୁ ମଧ୍ୟ ଏ ନେଇ ଚିଠି ଲେଖି ଅବଗତ କରିଛି ଶ୍ରୀଜଗନ୍ନାଥ ମନ୍ଦିର କାର୍ଯ୍ୟାଳୟ ।
ତେବେ କେଉଁ ଦିନ କେଉଁ ପାଳିଆ ସେବକ ପ୍ରଶିକ୍ଷଣ ଶିବିରକୁ ଆସିବେ, ସେ ସମ୍ପର୍କରେ ଆସନ୍ତା ମଙ୍ଗଳବାର ସୁଦ୍ଧା ନାମ ତାଲିକା ଦେବାକୁ କୁହାଯାଇଛି । ଶିବିରରେ ଶ୍ରୀମନ୍ଦିର ପ୍ରଶାସନିକ ଅଧିକାରୀଙ୍କ ସହ ଜଗନ୍ନାଥ ସଂସ୍କୃତି ଗବେଷକ ଓ ମହାପ୍ରଭୁଙ୍କ ନୀତିକାନ୍ତି ଉପରେ ଅଭିଜ୍ଞତା ରଖୁଥିବା ବରିଷ୍ଠ ସେବାୟତମାନେ ମଧ୍ୟ ତାଲିମ ଦେବାର କାର୍ଯ୍ୟକ୍ରମ ରହିଛି । ଯାହାର ସୁଫଳ ମିଳିବା ସହ ଶ୍ରୀଜିଉଙ୍କ ଶୃଙ୍ଖଳିତ ନୀତିକାନ୍ତି ସମାପନ ଦିଗରେ ମଧ୍ୟ ସହାୟକ ହେବ ବୋଲି ପୁରୀ ଜିଲ୍ଲାପାଳ କହିଛନ୍ତି।
ଶ୍ରୀମନ୍ଦିରରେ ସେବକଙ୍କ ବିଶୃଙ୍ଖଳିତ ଆଚରଣ ସବୁବେଳେ ଜଗନ୍ନାଥ ଭକ୍ତଙ୍କୁ ଆଘାତ ଦେଇ ଆସିଛି। ଏମିତିକି ସେବା-ପୂଜାକୁ ନେଇ ନିଜ ନିଜ ଭିତରେ ଗଣ୍ଡଗୋଳ ହୋଇ ରକ୍ତାକ୍ତ ହେବାର ମଧ୍ୟ ନଜିର ରହିଛି।
ସୂଚନାଯୋଗ୍ୟ, ଗତ ନୂଆବର୍ଷ ସମୟରେ ମନ୍ଦିରକୁ ଭୁଲରେ ଚପଲ ପିନ୍ଧି ପଳାଇଥିବା ଜଣେ ବୟସ୍କ ଭକ୍ତଙ୍କୁ କିଛି ସେବକ ପରିହାସ କରିବା ସହ, ଚପଲ ମୁଣ୍ଡରେ ଟେକି ଧରି ଯିବାକୁ କହିବା ଘଟଣା ସମସ୍ତଙ୍କୁ ବ୍ୟଥିତ କରିଥିଲା। ସେହିପରି ଜାନୁଆରୀ ୫, ୨୦୨୫ରେ ଜଣେ ସହଯୋଗୀ ସେବାୟତଙ୍କୁ ଆକ୍ରମଣ ଅଭିଯୋଗରେ ଅନ୍ୟ ଜଣେ ବିଶୃଙ୍ଖଳାକାରୀ ସେବାୟତ ୩ ମାସ ପାଇଁ ନିଲମ୍ବିତ ହୋଇଥିଲେ।
Comments are closed.