Latest Odisha News

BREAKING NEWS

ଫୁଟପାଥକୁ ଅବରୋଧମୁକ୍ତ ରଖିବାକୁ ରାଜ୍ୟ ସରକାର ନେଲେ ନୂଆ ପଦକ୍ଷେପ

ଭୁବନେଶ୍ୱର: ପ୍ରକାଶ ପାଇଲା ଓଡ଼ିଶାର ଚିଠା ସହରାଞ୍ଚଳ ପାର୍କିଂ ନୀତି । ନୂଆ ସହରାଞ୍ଚଳ ପାର୍କିଂ ନୀତି-୨୦୨୬ର ଚିଠା ପ୍ରକାଶ କରାଯାଇଛି । ଏହାକୁ ବିଭାଗର ଅଫିସିଆଲ୍ ୱେବସାଇଟ୍ https://urban.odisha.gov.in/en ରେ ପ୍ରକାଶ କରାଯାଇଛି । ସହରାଞ୍ଚଳରେ ଯାନବାହନ ଭିଡ଼ ହ୍ରାସ କରିବା, ଫୁଟପାଥକୁ ଅବରୋଧମୁକ୍ତ ରଖିବା ପାଇଁ ଓଡ଼ିଶା ସରକାରଙ୍କ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଏହି ପଦକ୍ଷେପ ନିଆଯାଇଛି ।

ଜନସାଧାରଣ ଏହି ଚିଠା ନୀତି ଉପରେ ନିଜର ମତାମତ, ପରାମର୍ଶ କିମ୍ବା ଆପତ୍ତି ଓଡ଼ିଶା ଗେଜେଟ୍‌ରେ ପ୍ରକାଶ ପାଇବାର ୧୫ ଦିନ ମଧ୍ୟରେ ଦାଖଲ କରିପାରିବେ । ଏହା ବିଭାଗରେ ସିଧାସଳଖ ଦାଖଲ କରିବା ସହ ଡାକ ଯୋଗେ କିମ୍ବା hudsec.or@od.gov.in ଇ-ମେଲ୍ ଠିକଣାରେ ପଠାଇପାରିବେ ବିଭାଗ ପକ୍ଷରୁ ସୂଚନା ଦିଆଯାଇଛି ।

ଏହି ନୀତି ଅନୁଯାୟୀ, ସହରାଞ୍ଚଳର ସ୍ଥାନୀୟ ସ୍ୱାୟତ୍ତ ଶାସନ ସଂସ୍ଥାଗୁଡ଼ିକ ନିଜ ନିଜ ଅଞ୍ଚଳର ଆବଶ୍ୟକତା ଅନୁଯାୟୀ ପାର୍କିଂ ଯୋଜନା ପ୍ରସ୍ତୁତ କରିବେ । ଏଥିରେ ପାର୍କିଂ ଜୋନ୍ ଚିହ୍ନଟ, ଶୁଳ୍କ ନିର୍ଦ୍ଧାରଣ ଏବଂ ପାର୍କିଂ ନିୟମର କଡ଼ାକଡ଼ି ଅନୁପାଳନ ଉପରେ ଗୁରୁତ୍ୱ ଦିଆଯାଇଛି ।

ପାର୍କିଂ ସ୍ଥାନ ସମ୍ପର୍କିତ ତୁରନ୍ତ ସୂଚନା ଲୋକଙ୍କୁ ଯାତ୍ରା ଯୋଜନା କରିବାରେ ସହାୟକ ହେବ । ଉନ୍ନତ ପାର୍କିଂ ପରିଚାଳନା ଦ୍ୱାରା ପଦଚାରୀଙ୍କ ଯାତାୟାତ ଅଧିକ ସୁରକ୍ଷିତ ହେବା ସହ ଯାନବାହନ ଚାଳକମାନଙ୍କୁ ପାର୍କିଂ ସ୍ଥାନ ଖୋଜିବାରେ ଲାଗୁଥିବା ସମୟ ହ୍ରାସ ପାଇବ । ଏହା ସହିତ ପୌର ସଂସ୍ଥାଗୁଡ଼ିକ ମଧ୍ୟ ଲୋକଙ୍କ ଆବଶ୍ୟକତା ଅନୁଯାୟୀ ପାର୍କିଂ ବ୍ୟବସ୍ଥାରେ ପରିବର୍ତ୍ତନ ଆଣିପାରିବେ ।

ଚିଠା ନୀତି ଅନୁଯାୟୀ, ସ୍ଥାନ, ଚାହିଦା ଏବଂ ପାର୍କିଂ ସମୟ ଅନୁସାରେ ଶୁଳ୍କ ଧାର୍ଯ୍ୟ କରାଯିବ । ଅଫ ଷ୍ଟ୍ରିଟ ପାର୍କିଂରେ ୨୫ ପ୍ରତିଶତ ରିହାତି ରହିବ। ରାସ୍ତା କଡ ପାର୍କିଂ ଅପେକ୍ଷା ନିର୍ଦ୍ଦିଷ୍ଟ ପାର୍କିଂ ସ୍ଥଳ ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ସେଠାରେ ପାର୍କିଂ ଫି ଅତି କମରେ ୨୫ ପ୍ରତିଶତ କମ ରଖିବାକୁ ପ୍ରସ୍ତାବ ରହିଛି।ଡିଜିଟାଲ୍ ବ୍ୟବସ୍ଥା ମାଧ୍ୟମରେ ଲୋକମାନେ ପାର୍କିଂ ସ୍ଥାନ ଖାଲି ଅଛି କି ନାହିଁ ଜାଣିବା, ଆଗୁଆ ସ୍ଥାନ ବୁକ୍ କରିବା ଏବଂ ନଗଦ ଟଙ୍କା ବଦଳରେ ଅନଲାଇନ୍‌ରେ ଶୁଳ୍କ ଦେଇପାରିବେ ।

ଏହି ଚିଠା ନୀତିରେ ଭିନ୍ନକ୍ଷମ ବ୍ୟକ୍ତିଙ୍କ ପାଇଁ ବିନା ଅତିରିକ୍ତ ଶୁଳ୍କରେ ସ୍ୱତନ୍ତ୍ର ପାର୍କିଂ ସ୍ଥାନ ଚିହ୍ନଟ କରିବା, ପ୍ରମୁଖ ସାଧାରଣ ପରିବହନ ରାସ୍ତା ନିକଟରେ ପାର୍କ-ଆଣ୍ଡ-ରାଇଡ୍ ସୁବିଧା ଯୋଗାଇବା ସହ ନୂତନ ପାର୍କିଂ ସ୍ଥାନ ଏବଂ ବହୁତଳ ପାର୍କିଂ କେନ୍ଦ୍ରଗୁଡ଼ିକରେ ବୈଦ୍ୟୁତିକ ଯାନ (EV) ଚାର୍ଜିଂ ଓ ସାଇକେଲ୍ ରଖିବା ପାଇଁ ବ୍ୟବସ୍ଥା କରିବାକୁ ପ୍ରସ୍ତାବ ରହିଛି ।

Leave A Reply

Your email address will not be published.