ନୂଆଦିଲ୍ଲୀ: ଭାରତୀୟ ବାୟୁସେନା କ୍ରମାଗତ ଭାବରେ ଏହାର ବିମାନ ସଂଖ୍ୟା ବୃଦ୍ଧି କରୁଛି। ଏଣିକି ଆହୁରି ଶକ୍ତିଶାଳୀ ହେବ ବାୟୁସେନା। ଏଥି ସହିତ ସ୍ବଦେଶୀ ବିମାନ ଉପରେ ବାୟୁସେନା ଗୁରୁତ୍ୱାରୋପ କରୁଛି। ବର୍ତ୍ତମାନ ବାୟୁସେନାରେ ସାମିଲ ହେବ ସି-୨୯୫ ଏମଡବ୍ଲ୍ୟୁ ଟ୍ରାନ୍ସପୋର୍ଟ ଏୟାରକ୍ରାଫ୍ଟ । ସ୍ପେନର ଏହି ଏୟାରକ୍ରାଫଟକୁ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ ଭି.ଆର ଚୌଧରୀ ଗ୍ରହଣ କରିଛନ୍ତି।
ପ୍ରଥମ ସି-୨୯୫ ସାମରିକ ବିମାନ ସ୍ପେନରୁ ଶୀଘ୍ର ଭାରତ ଆସିବାକୁ ଯାଉଛି। ଗତ ବର୍ଷ ସେପ୍ଟେମ୍ବରରେ ଭାରତ ଏୟାରବସ ପ୍ରତିରକ୍ଷା ଏବଂ ମହାକାଶ ୫୬ ଟି ସି-୨୯୫ ବିମାନ ପାଇଁ ଏକ ଚୁକ୍ତି କରିଥିଲା, ଯାହା ଆଭ୍ରୋ -୭୪୮ ବିମାନର ସ୍ଥାନ ନେବ। ଏୟାରବସ ଡିଫେନ୍ସ ଏବଂ ସ୍ପେସ ବୁଧବାର ପ୍ରଥମ ସି-୨୯୫ ପରିବହନ ବିମାନକୁ ଭାରତୀୟ ବାୟୁସେନାକୁ ହସ୍ତାନ୍ତର କରିଛି। ଏହି ଟ୍ରାନ୍ସପୋର୍ଟ ଏୟାରକ୍ରାଫ୍ଟର ୫ରୁ ୧୦ଟନ୍ ଓଜନର ମାଲ ପରିବହନ କ୍ଷମତା ରହିଛି। ଏଥିସହ ଏକାଥରକେ ୭୦ ଜଣ ଯବାନ ଏଥିରେ ବସିପାରିବେ।
ପ୍ରତିରକ୍ଷା ମନ୍ତ୍ରଣାଳୟ ଏବଂ ସ୍ପେନର ଏୟାରବସ ପ୍ରତିରକ୍ଷା ଏବଂ ମହାକାଶ କମ୍ପାନୀ ସେପ୍ଟେମ୍ବର ୨୦୨୧ ରେ ଭାରତୀୟ ବାୟୁସେନା ପାଇଁ ୫୬ଟି ସି-୨୯୫ ବିମାନ ଉତ୍ପାଦନ ପାଇଁ ଏକ ଚୁକ୍ତିନାମା ସ୍ବାକ୍ଷର କରିଥିଲେ। ଭାରତୀୟ ବାୟୁସେନା ଏହିପରି ୫୬ ବିମାନ ପାଇଁ ଚୁକ୍ତି ସ୍ବାକ୍ଷର କରିଛି। ସେଥିମଧ୍ୟରୁ ୧୬ଟି ବିମାନ ସ୍ପେନରେ ତିଆରି ହେବ। ଗୁଜରାଟର ଭଦୋଦରାରେ ୪୦ଟି ବିମାନ ଉତ୍ପାଦନ ହେବ। ସେପ୍ଟେମ୍ବର ୨୫ରେ ଉତ୍ତରପ୍ରଦେଶର ଗାଜିଆବାଦର ହିଣ୍ଡନ ଏୟାରବେସରେ ଏହି ବିମାନ ଅବତରଣ କରିବ ବୋଲି ଆଶା କରାଯାଉଛି। ଭାରତ ଏହି ଚୁକ୍ତି ୨୧ ହଜାର କୋଟି ଟଙ୍କାରେ କରିଥିଲା। ଚୁକ୍ତିନାମା ଅନୁଯାୟୀ ଚାରି ବର୍ଷ ମଧ୍ୟରେ ୧୬ଟି ବିମାନ ବିତରଣ କରାଯିବ। ଟାଟା ଏବଂ ଏୟାରବସ୍ ମିଳିତ ଭାବେ ଏହାକୁ ନିର୍ମାଣ କରୁଛନ୍ତି ।