ଯେଉଁଠି ଦିଦି ଥିଲେ ଅପରାଜେୟ, ସେଠି କିଏ ଲେଖିଲା ପରାଜୟର ସ୍କ୍ରିପ୍ଟ? ଭବାନୀପୁର ପରଜାୟ ପଛର ବଡ଼ ରହସ୍ୟ
କୋଲକାତା: ରାଜନୀତିର ଏକ ନିଷ୍ଠୁର ସତ୍ୟ ହେଉଛି, ଗଣତନ୍ତ୍ରରେ କେହି ବି ଅପରାଜେୟ ନୁହଁନ୍ତି ଏବଂ କୌଣସି ବି ଗଡ଼ ଅଭେଦ୍ୟ ନୁହେଁ। ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନର ଫଳାଫଳ ଏହି ଉକ୍ତିକୁ ଅକ୍ଷରେ ଅକ୍ଷରେ ସତ୍ୟ ପ୍ରମାଣିତ କରିଛି। ତୃଣମୂଳ କଂଗ୍ରେସର ବିପର୍ଯ୍ୟୟ ଏବଂ ବିଜେପିର କ୍ଷମତା ଦଖଲ ଯେତିକି ଚର୍ଚ୍ଚାର ବିଷୟ ପାଲଟିଛି, ତା’ଠାରୁ ଅଧିକ ସ୍ତବ୍ଧ କରିଛି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବ୍ୟକ୍ତିଗତ ପରାଜୟ। ନିଜର ସବୁଠାରୁ ସୁରକ୍ଷିତ ତଥା ପାରମ୍ପରିକ ଆସନ ‘ଭବାନୀପୁର’ରୁ ଦିଦିଙ୍କ ପରାଜୟ ସାରା ଦେଶର ରାଜନୈତିକ ସମୀକ୍ଷକଙ୍କୁ ଚକିତ କରିଦେଇଛି।
ଯେଉଁ ଭବାନୀପୁର ମମତାଙ୍କର ପରିଚୟ ଥିଲା, ଯେଉଁ ମାଟି ତାଙ୍କୁ ସବୁବେଳେ ସୁରକ୍ଷା କବଚ ଯୋଗାଇ ଆସିଥିଲା, ସେଠାରେ ବିଜେପିର ସୁନାମି କିପରି ଆସିଲା?ଭବାନୀପୁର କେବଳ ଏକ ନିର୍ବାଚନ ମଣ୍ଡଳୀ ନୁହେଁ; ଏହା ହେଉଛି ମମତା ବାନାର୍ଜୀଙ୍କ ‘ହୋମ୍ ଟର୍ଫ’। ତାଙ୍କର ବାସଭବନ କାଳୀଘାଟ ଏହି ଆସନ ଅଧୀନରେ ଆସେ। ୨୦୧୧ ଏବଂ ୨୦୨୧ ଉପ-ନିର୍ବାଚନ ସମେତ ୨୦୧୬ ସାଧାରଣ ନିର୍ବାଚନରେ ସେ ଏଠାରୁ ବିପୁଳ ମାତ୍ରାରେ ବିଜୟୀ ହୋଇଥିଲେ। ୨୦୨୧ରେ ନନ୍ଦୀଗ୍ରାମରେ ଶୁଭେନ୍ଦୁ ଅଧିକାରୀଙ୍କ ଠାରୁ ହାରିବା ପରେ ଭବାନୀପୁର ହିଁ ତାଙ୍କୁ ପୁଣିଥରେ ମୁଖ୍ୟମନ୍ତ୍ରୀ ଚୌକିରେ ବସାଇଥିଲା। ହୁଏତ ଏହି ଅତୀତର ରେକର୍ଡ ଟିଏମ୍ସି ନେତୃତ୍ୱଙ୍କ ଭିତରେ ଏକ ଅତ୍ୟଧିକ ଆତ୍ମବିଶ୍ୱାସ ଭରିଦେଇଥିଲା ଯେ- “ବେଙ୍ଗଲରେ ଯାହା ବି ହେଉ, ଭବାନୀପୁର ଦିଦିଙ୍କ ହାତରୁ କେବେ ଖସିବନି।” ଆଉ ଏହି ଭ୍ରମ ହିଁ ପରାଜୟର ପ୍ରଥମ କାରଣ ସାଜିଲା।
ଭବାନୀପୁରର ଡେମୋଗ୍ରାଫି ଏକ ‘ମିନି ଇଣ୍ଡିଆ’ ସଦୃଶ। ଏଠାରେ ବଙ୍ଗାଳୀ ଭୋଟରଙ୍କ ସହ ଗୁଜରାଟୀ, ମାରୱାଡ଼ି, ପଞ୍ଜାବୀ ଏବଂ ଅନ୍ୟାନ୍ୟ ହିନ୍ଦୀଭାଷୀ ସମ୍ପ୍ରଦାୟର ବଡ଼ ଭୋଟ୍ ବ୍ୟାଙ୍କ ରହିଛି। ବିଜେପିର ଚାଣକ୍ୟ ଅମିତ ଶାହ ଏବଂ ରାଜ୍ୟ ନେତୃତ୍ୱ ଏହି ଅଣ-ବଙ୍ଗାଳୀ ଏବଂ ବ୍ୟବସାୟୀ ଗୋଷ୍ଠୀଙ୍କୁ ସମ୍ପୂର୍ଣ୍ଣ ରୂପେ ଏକଜୁଟ କରିବାରେ ସଫଳ ହେଲେ। କେନ୍ଦ୍ର ସରକାରଙ୍କ ଆର୍ଥିକ ନୀତିର ପ୍ରଭାବ ଏବଂ ରାଜ୍ୟରେ ଶିଳ୍ପାୟନର ଅଭାବକୁ ନେଇ ସହରାଞ୍ଚଳ ଭୋଟରଙ୍କ ଅସନ୍ତୋଷ ବିଜେପି ସପକ୍ଷରେ ଭୋଟ୍ ଆକାରରେ ପରିଣତ ହେଲା।
ସାଧାରଣତଃ ସହରାଞ୍ଚଳର ଭୋଟରମାନେ ମୁହଁ ଖୋଲି କିଛି ହୁଅନ୍ତି ନାହିଁ, କିନ୍ତୁ ଇଭିଏମ୍ ରେ ନିଜର କ୍ଷୋଭ ପ୍ରକାଶ କରନ୍ତି। ଟିଏମ୍ସି ନେତାଙ୍କ ଦୁର୍ନୀତି, ସନ୍ଦେଶଖାଲି ଭଳି ଘଟଣାକୁ ନେଇ ମଧ୍ୟବିତ୍ତ ବଙ୍ଗାଳୀ ସମାଜରେ ଥିବା ତୀବ୍ର ଅସନ୍ତୋଷ ଭବାନୀପୁରର ଶିକ୍ଷିତ ଏବଂ ଭଦ୍ରଲୋକ ସମ୍ପ୍ରଦାୟକୁ ବିଜେପି ଆଡ଼କୁ ଟାଣି ନେଇଥିଲା।
ମମତା ସାରା ରାଜ୍ୟର ଦାୟିତ୍ୱ ନେଇ ବୁଲୁଥିବା ବେଳେ, ବିଜେପି ଭବାନୀପୁର ପାଇଁ ଏମିତି ଜଣେ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇଥିଲା ଯିଏ ଘରକୁ ଘର ବୁଲି ସିଧାସଳଖ ଲୋକଙ୍କ ସହ ସମ୍ପର୍କ ସ୍ଥାପନ କରିଥିଲେ। ଟିଏମ୍ସିର ‘ଭିଆଇପି ସିଣ୍ଡ୍ରୋମ୍’ ବିରୋଧରେ ବିଜେପିର ଏହି ଡୋର୍-ଟୁ-ଡୋର୍ ଅଭିଯାନ ସ୍ଥାନୀୟ ଭୋଟରଙ୍କୁ ଆପଣାର ଲାଗିଥିଲା।
ଶେଷରେ, ଭବାନୀପୁରର ଏହି ଫଳାଫଳ କେବଳ ଗୋଟିଏ ଆସନର ହାର୍-ଜିତ୍ ନୁହେଁ। ଏହା ହେଉଛି ତୃଣମୂଳ କଂଗ୍ରେସର ମୂଳଦୁଆ ଦୋହଲିଯିବାର ସବୁଠାରୁ ବଡ଼ ପ୍ରମାଣ। ରାଜନୀତିରେ ଯେତେବେଳେ ସୁନାମୀ ଆସେ, ସେତେବେଳେ ତାହା ଦୁର୍ବଳ କୁଡ଼ିଆ ଠାରୁ ଆରମ୍ଭ କରି ବଡ଼ ବଡ଼ ଅଭେଦ୍ୟ ଦୁର୍ଗକୁ ମଧ୍ୟ ଛାଡ଼େ ନାହିଁ ବୋଲି ଭବାନୀପୁରର ଏହି ଐତିହାସିକ ଜନାଦେଶ ପ୍ରମାଣିତ କରିଦେଇଛି।
