ମୁମ୍ବାଇ: ଦେଶର ଆର୍ଥିକ ରାଜଧାନୀ ମୁମ୍ବାଇର ପ୍ରତିଷ୍ଠିତ ତାଜମହଲ ପ୍ୟାଲେସ ହୋଟେଲକୁ ବୋମା ଧମକ ମିଳିଛି । ଏହା ପରେ ସୁରକ୍ଷା ଏଜେନ୍ସିଗୁଡ଼ିକ ଆହୁରି ସତର୍କ ହୋଇଯାଇଛନ୍ତି । ବିଳମ୍ବିତ ରାତିରେ ନଭି ମୁମ୍ବାଇ ପୋଲିସକୁ ଏକ ଅଜଣା ନମ୍ବରରୁ ଫୋନ୍ କଲ୍ ଆସିଥିଲା । ଏଥିରେ ହୋଟେଲକୁ ଟାର୍ଗେଟ କରିବାକୁ ଧମକ ଦିଆଯାଇଥିଲା । ସୂଚନା ପାଇବା ପରେ ନଭି ମୁମ୍ବାଇ ପୋଲିସ ତୁରନ୍ତ ମୁମ୍ବାଇ ପୋଲିସକୁ ସତର୍କ କରାଇ ଦେଇଥିଲା ।
ଏହା ପରେ, ପୋଲିସ ଏବଂ ସୁରକ୍ଷା ଏଜେନ୍ସିଗୁଡ଼ିକ ତାଜ ହୋଟେଲ ପରିସରରେ ପୁଙ୍ଖାନୁପୁଙ୍ଖ ଯାଞ୍ଚ କରିଥିଲେ । ତଦନ୍ତ ସମୟରେ କୌଣସି ସନ୍ଦେହଜନକ ବସ୍ତୁ ମିଳିନଥିଲା, କିନ୍ତୁ ପୋଲିସ ଧମକପୂର୍ଣ୍ଣ ଫୋନ୍ କରିଥିବା ବ୍ୟକ୍ତିଙ୍କୁ ଚିହ୍ନଟ କରିବା ଏବଂ ତାଙ୍କ ଲୋକେସନ ଟ୍ରେସ୍ କରିବାକୁ ଚେଷ୍ଟା କରୁଛି । ହୋଟେଲର ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।
୨୦୦୮ ମସିହା ନଭେମ୍ବର ୨୬ରେ ଆତଙ୍କବାଦୀ ଆକ୍ରମଣରେ ତାଜ୍ ହୋଟେଲ୍ ମୁଖ୍ୟ ଟାର୍ଗେଟ୍ ଥିବାରୁ, ଏଭଳି ଯେକୌଣସି ଧମକପୂର୍ଣ୍ଣ କଲ୍ କୁ ସୁରକ୍ଷା ଏଜେନ୍ସିଗୁଡ଼ିକ ଅତ୍ୟନ୍ତ ଗମ୍ଭୀରତାର ସହ ନେଇଛନ୍ତି । ବର୍ତ୍ତମାନ ହୋଟେଲ୍ ରେ ସ୍ଥିତି ସ୍ୱାଭାବିକ ରହିଛି ଏବଂ ସୁରକ୍ଷାକର୍ମୀ ହାଇ ଆଲର୍ଟରେ ଅଛନ୍ତି ।