ପୁରୀ: ଆଜି ଶ୍ରୀଜିଉଙ୍କ ନୀଳାଦ୍ରିବିଜେ। ଏହାପରେ ରତ୍ନସିଂହାସନକୁ ଫେରିଯିବା ସହିତ ସହିତ ଶେଷ ହୋଇଯିବ ରଥଯାତ୍ରା। ତେବେ ଶ୍ରୀମନ୍ଦିର ଭିତରକୁ ପ୍ରବେଶ କରିବା ପୂର୍ବରୁ ମହାପ୍ରଭୁ ଶ୍ରୀଜଗନ୍ନାଥଙ୍କୁ ମା’ଲକ୍ଷ୍ମୀଙ୍କ ମାନଭଞ୍ଜନ କରିବାକୁ ହେବ। ଦେବୀ ଲକ୍ଷ୍ମୀ ତାଙ୍କୁ ଭିତରକୁ ଛାଡ଼ିବେ ନାହିଁ, କାରଣ ହେରାପଞ୍ଚମୀରେ ତାଙ୍କୁ ଭେଟିବାକୁ ନଦେବାରୁ ସେ ଏବେ ବି ତାଙ୍କ ଉପରେ ରୁଷିଛନ୍ତି।
ମା’ ଲକ୍ଷ୍ମୀଙ୍କୁ ପ୍ରସନ୍ନ କରିବା ପାଇଁ ଶ୍ରୀଜଗନ୍ନାଥ ତାଙ୍କୁ ରସଗୋଲା ଅର୍ପଣ କରିବେ। ଦୀର୍ଘ ସମୟ ଧରି କଥା ହେବା ପରେ ଶେଷରେ ସେ ଶାନ୍ତ ହୋଇ ତାଙ୍କ କ୍ଷମା ପ୍ରାର୍ଥନାକୁ ଗ୍ରହଣ କରିବେ। ମା’ ଲକ୍ଷ୍ମୀଙ୍କୁ ଶାନ୍ତ କରିବାର ବିଧିକୁ ମାନଭଞ୍ଜନ କୁହାଯାଏ। ନୀଳାଦ୍ରି ବିଜେ ଦିନଟିକୁ ଓଡ଼ିଶାରେ ରସଗୋଲା ଦିବସ ଭାବେ ମଧ୍ୟ ପାଳନ କରାଯାଏ। ଏହି ଅବସରରେ ଶ୍ରୀମନ୍ଦିର ସହ ଓଡ଼ିଶାର ବହୁ ବର୍ଷର ରସଗୋଲା ସମ୍ପର୍କକୁ ପାଳନ କରିବା ପାଇଁ ଏହି କାର୍ଯ୍ୟକ୍ରମ ଆୟୋଜନ କରାଯାଉଛି।
ନୀଳାଦ୍ରିବିଜେ ଦିନ ସୁଦର୍ଶନଙ୍କୁ ଗୋଟି ପହଣ୍ଡିରେ ଶ୍ରୀମନ୍ଦିରକୁ ନିଆଯିବ। ଆଜି ମଧ୍ୟାହ୍ନରେ ଶ୍ରୀଜିଉଙ୍କ ପହଣ୍ଡି ବିଜେ କରାଯିବାର କାର୍ଯ୍ୟକ୍ରମ ରହିଛି। ଗୋଟି ପହଣ୍ଡି ପୂର୍ବରୁ ରଥ ଉପରେ ମଙ୍ଗଳ ଆଳତି, ମଇଲମ, ସକଳଧୂପ, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି, ସନ୍ଧ୍ୟାଧୂପ ଆଦି ବେଶ ଅନୁଷ୍ଠିତ ହେବ। ସମସ୍ତ ରୀତିନୀତି ଅନୁଯାୟୀ ଚାରମାଳ ବନ୍ଧାଯିବ।
ଶୁକ୍ରବାର ଅଧରପଣା ନୀତି ଅନୁଷ୍ଠିତ ହୋଇଥିବା ବେଳେ ଏଥିରେ ଦେବଦେବୀଙ୍କୁ ନିଜ ନିଜ ରଥରେ ସ୍ୱତନ୍ତ୍ର ପଣା ଲାଗି କରାଯାଇଥିଲା। ଏହି ପାନୀୟକୁ ବଡ ମାଟି ପାତ୍ରରେ ଅର୍ପଣ କରାଯାଇଥିଲା। ପରେ ରଥରେ ଭାଙ୍ଗି ଦିଆଯାଇଥିଲା। ରଥରେ ବାସ କରୁଥିବା ଦୁଷ୍ଟ ଆତ୍ମା, ପ୍ରେତାତ୍ମା ଓ ଅନ୍ୟାନ୍ୟ ଅଦୃଶ୍ୟ ଜୀବମାନଙ୍କୁ ମୁକ୍ତ କରିବା ପାଇଁ ଏହା କରାଯାଇଥିଲା।