‘World Would Be Torn To Pieces’: ‘ଯଦି ମୁଁ ନଥାନ୍ତି…ଖଣ୍ଡ ଖଣ୍ଡ ହୋଇଯାଇଥାନ୍ତା ବିଶ୍ଵ’

ନୂଆଦିଲ୍ଲୀ: ବଡବୋଲା ଟ୍ରମ୍ପଙ୍କ ଆଉ ଏକ ବଡ଼ ଦାବି

ସିଏ ନଥିଲେ ଛିନଭିନ୍ ହୋଇଯାଇଥାନ୍ତା ବିଶ୍ୱ

‘ବିଶ୍ୱକୁ ବଞ୍ଚାଇ ରଖିଛନ୍ତି ରାଷ୍ଟ୍ରପତି ଟ୍ରମ୍ପ’

ନିଜକୁ ବିଶ୍ଵ ନିଅଁନ୍ତା ଭାବୁଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସାକ୍ଷାତକାରରେ କହିଲେ ମୁଁ ବିଶ୍ୱକୁ ଧ୍ଵଂସ ପାଇବାରୁ ରୋକିଛି। ତେବେ ଦେଶ ଦେଶ ମଧ୍ୟରେ ହେଉଥିବା ଯୁଦ୍ଧକୁ ରୋକି ଶାନ୍ତି ବଜାୟ ରଖିବା ନେଇ ବାରମ୍ବାର ଦାବି କରୁଥିବା ଟ୍ରମ୍ପ, ଏବେ ନିଜେ ଯୁଦ୍ଧରେ ଫସିଛନ୍ତି। ଇରାନ ଉପରେ ଆକ୍ରମଣ କରି ମଧ୍ୟପ୍ରାଚ୍ୟରେ ଅଶାନ୍ତି ଖେଳାଇଛନ୍ତି। ଆଉ ଏବେ କିଛି ଦିନ ପାଇଁ ଅସ୍ଥାୟୀ ଯୁଦ୍ଧବିରତି ଲାଗିଥିବା ବେଳେ ଏହା ଯେକୌଣସି ମୁହୂର୍ତ୍ତରେ ଭାଙ୍ଗିପଡ଼େ ବୋଲି ଆଶଙ୍କା ସୃଷ୍ଟି ହେଲାଣି। କାରଣ ଇସଲାମବାଦରେ ଦୁଇ ଦେଶ ମଧ୍ୟରେ ସ୍ଥାୟୀ ଯୁଦ୍ଧବିରତି ନେଇ ଆଲୋଚନା ଫେଳ ହେବ ପରେ ଏବେ ଦୁଇ ଦେଶ ମଧ୍ୟରେ ପୁଣି ଉତ୍ତେଜନା ବୃଦ୍ଧି ପାଇଛି। ଯାହା ପୁଣି ମଧ୍ଯପ୍ରାଚ୍ୟ ଶାନ୍ତିକୁ ଅନିଶ୍ଚିତତା ଭିତରକୁ ଠେଲି ଦେଇଛି।

ଏହି ସମୟରେ ଇରାନ ଯୁଦ୍ଧ ସହିତ ବିଶ୍ୱକୁ ନେଇ ବଡ଼ ବୟାନ ଦେଇଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଟ୍ରମ୍ପ ଏକ ପ୍ରମୁଖ ଦାବି କରି କହିଛନ୍ତି ଯେ ଯଦି ସେ ରାଷ୍ଟ୍ରପତି ନ ହୋଇଥାନ୍ତେ, ତେବେ ବିଶ୍ୱ ଖଣ୍ଡ ଖଣ୍ଡ ହୋଇଯାଇଥାନ୍ତା। ଏହି ବକ୍ତବ୍ୟ ଯେତେ ବିବାଦୀୟ ହୋଇପାରେ, ଏହା ଟ୍ରମ୍ପଙ୍କ ବିଶ୍ୱାସକୁ ଫମ୍ପା ଆତ୍ମବିଶ୍ୱାସକୁ ପରିପ୍ରକାଶ କରେ ଯେ ସେ ନିଜକୁ ବିଶ୍ୱ ସଙ୍କଟର ଏକମାତ୍ର ସମାଧାନ ଭାବରେ ଦେଖନ୍ତି। ସେହି ସମାନ ସାକ୍ଷାତକାରରେ ଟ୍ରମ୍ପ ସ୍ପଷ୍ଟ କରିଛନ୍ତି ଯେ ସେ ଇରାନ ସହିତ ଦୁଇ ସପ୍ତାହର ଯୁଦ୍ଧବିରତି ବୃଦ୍ଧି କରିବା ନେଇ ବିଚାର କରୁନାହାଁନ୍ତି। ଟ୍ରମ୍ପ ବିଶ୍ୱାସ କରନ୍ତି ଯେ ଯୁଦ୍ଧବିରତି ବୃଦ୍ଧି କରିବାର କୌଣସି ଆବଶ୍ୟକତା ନାହିଁ। କିନ୍ତୁ ଏହାର ଅର୍ଥ ନୁହେଁ ଯେ ସେ ଯୁଦ୍ଧ ଜାରି ରଖିବାକୁ ଚାହାଁନ୍ତି। ସେ ଆହୁରି ମଧ୍ୟ ଦାବି କରିଛନ୍ତି ଯେ ଏହା ପୂର୍ବରୁ ଇରାନ ସହିତ ଆମେରିକା ଏକ ଚୁକ୍ତିରେ ପହଞ୍ଚିବ। ସେମାନଙ୍କର ପସନ୍ଦ ଏକ ଚୁକ୍ତି। ଏଥିସହିତ ଟ୍ରମ୍ପ୍ ଇରାନ ଦେଇଥିବା ଚୁକ୍ତିକୁ ମଧ୍ୟ ଭଲ ବୋଲି କହିଥିଲେ। ଏଥିପାଇଁ ଆଗାମୀ ଦୁଇଦିନକୁ ଗୁରୁତ୍ବପୂର୍ଣ୍ଣ ବୋଲି କହିଥିଲେ ଟ୍ରମ୍ପ। ଟ୍ରମ୍ପ କହିଥିଲେ, “ମୁଁ ଭାବୁଛି ଆପଣ ଆଗାମୀ ଦୁଇ ଦିନରେ କିଛି ଆଶ୍ଚର୍ଯ୍ୟଜନକ ଘଟଣା ଘଟିବାର ଦେଖିବେ।” ଯାହା ଇରାନ ସହ ଦ୍ୱିତୀୟ ଆଲୋଚନାର ସଂକେତ। କାରଣ ଟ୍ରମ୍ପ ଏହାର କିଛି ଘଣ୍ଟା ପୂର୍ବରୁ କହିଥିଲେ ଯେ ଆଗାମୀ ଦୁଇ ଦିନରେ ଇରାନ ସହିତ ଦ୍ୱିତୀୟ ପର୍ଯ୍ୟାୟ ଆଲୋଚନା ହୋଇପାରେ। ତଥାପି ଏନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ତାରିଖ କିମ୍ବା ସ୍ଥାନ ଚୂଡ଼ାନ୍ତ ହୋଇନାହିଁ। କିନ୍ତୁ ଦୁଇ ଦେଶ ମଧ୍ୟରେ ଭିତିରି ଆଲୋଚନା ଜୋରଦାର ଚାଲିଛି ବୋଲି କୁହାଯାଉଛି।