ମସ୍କୋ: ଗୁଇନ୍ଦା ବେଲୁନକୁ ନେଇ ଏବେ ରାଜନୀତି ଜୋର ଧରିଛି । ଆମେରିକା ଆକାଶରେ ଏକାଧିକ ବେଲୁନ ଉଡିବା ପରେ ଆମେରିକା–ଚୀନ ବିବାଦ ବଢିବାରେ ଲାଗିଛି । ଏପଟେ ରୁଷ ସେନା ୟୁକ୍ରେନ ଆକାଶରେ ଛାଡିଛି ଗୁଇନ୍ଦା ବେଲୁନ । ଗୁଇନ୍ଦା ବେଲୁନ ୟୁକ୍ରେନ ଆକାଶରେ ଛାଡି ଏହାର ବାୟୁ ପ୍ରତିରକ୍ଷା ବ୍ୟବସ୍ଥାରୁ ତଥ୍ୟ ଯୋଗାଡ କରିବାକୁ ଚେଷ୍ଟା କରୁଛି ରୁଷ । ବେଲୁନ ତଥ୍ୟ ଅନୁସାରେ ମିସାଇଲ ମାଡ କରୁଛି ରୁଷ ସେନା ।
ଆଉ ଅଳ୍ପଦିନ ପରେ ରୁଷ–ୟୁକ୍ରେନ ଯୁଦ୍ଧକୁ ଏକ ବର୍ଷ ପୂରିବ । ଫେବ୍ରୁଆରୀ ୧୪ ତାରିଖରେ ୟୁକ୍ରେନ ବିରୋଧରେ ଯୁଦ୍ଧ ଆରମ୍ଭ କରିଥିଲା ରୁଷ । ପ୍ରଥମେ ଡ୍ରୋନ ବ୍ୟବହାର କରି ରୁଷ ସେନା ୟୁକ୍ରେନର ଭିତ୍ତିଭୂମି ବ୍ୟବସ୍ଥାକୁ ନଷ୍ଟ କରି ଦେଇଥିଲେ । ଏବେ ରୁଷ ଗୁଇନ୍ଦା ବେଲୁନ ସାହାଯ୍ୟରେ ତଥ୍ୟ ହାସଲ କରୁଛି । ଏହାଦ୍ୱାରା ରୁଷକୁ ଅଧିକ ଖର୍ଚ୍ଚ କରିବାକୁ ପଡୁନି । ନିକଟରେ ରାଜଧାନୀ କିଭରେ ୬ଟି ଗୁଇନ୍ଦା ବେଲୁନକୁ ଦେଖିବାକୁ ମିଳିଥିଲା । ଗତକାଲି ମଧ୍ୟ ସେଭାଷ୍ଟୋପୋଲ ନିକଟରେ ଆଉ ଦୁଇଟି ବେଲୁନକୁ ଦେଖିବାକୁ ମିଳିଥିଲା । ତେବେ ୟୁକ୍ରେନ ସେନା ଏହାକୁ ମାରି ଖସାଇ ଦେଇଛନ୍ତି ।
ୟୁକ୍ରେନ ସେନାର ଅଭିଯୋଗ ଯେ ରୁଷ ଗୋଇନ୍ଦା ବେଲୁନ ସହାୟତାରେ ତଥ୍ୟ ସଂଗ୍ରହ କରୁଛି ଏବଂ ତା ପରେ ମିସାଇଲ ମାଡ କରୁଛି । ରୁଷର ଡ୍ରୋନ ସଂଖ୍ୟା କମି କମି ଆସୁଥିବାରୁ ଏବେ ସେ ବେଲୁନର ସହାୟତା ନେଇଛି । ଏକଥା ମଧ୍ୟ କୁହାଯାଉଛି, ୟୁକ୍ରେନର ମିସାଇଲ ସଂଖ୍ୟା କମାଇବା ପାଇଁ ରୁଷର ଏହା ପ୍ଲାନ । କାରଣ ବେଲୁନ ଖସାଇବା ପାଇଁ ଯେତେ ମିସାଇଲ ମାରିବ, ୟୁକ୍ରେନର ମିସାଇଲ ସଂଖ୍ୟା ସେତେ କମିବ ।
ତେବେ ବୁଧବାର ରାତିରୁ ଗୁରୁବାର ସକାଳ ପର୍ଯ୍ୟନ୍ତ ୟୁକ୍ରେନ ଉପରେ ଘନ ଘନ ମିସାଇଲ ମାଡ କରିଛି ରୁଷ । ଏହି ମିସାଇଲ ଭିତରେ ରହିଛି ଏୟାର ଓ ସମୁଦ୍ରଭିତ୍ତିକ କ୍ରୁଜ ମିସାଇଲ, ଗାଇଡେଷ ଏୟାର–ଟୁ– ସରଫେସ ମିସାଇଲ ଏବଂ ଆଣ୍ଟିସିପ ମିସାଇଲ । ତେବେ ୟୁକ୍ରେନ ସେନା ଏଥିମଧ୍ୟରୁ ୧୬ଟି ମାରି ଖସାଇ ଦେଇଛନ୍ତି ।