ବ୍ରହ୍ମପୁର: ନିକଟରେ ବଲାଙ୍ଗୀର ଜିଲ୍ଲାରେ ଜଣେ ମହିଳା ଶିକ୍ଷୟତ୍ରୀ ଚାକିରି ପାଇବାକୁ ଯାଇ ନକଲି ସାର୍ଟିଫିକେଟ୍ ବ୍ୟବହାର କରିଥିବା ଅଭିଯୋଗରେ ଗିରଫ ହେବା ପରେ ଏବେ ଆଉ ଜଣେ ମହିଳା ଶିକ୍ଷୟତ୍ରୀ ଗଞ୍ଜାମ ଜିଲ୍ଲାରେ ଅନୁରୂପ ପରିସ୍ଥିତିରେ ଧରାପଡ଼ିଛନ୍ତି। ସେହିପରି ଭବାନୀପାଟଣାରେ ବାପ-ପୁଅ ଧରାପଡିଛନ୍ତି।
ଗଞ୍ଜାମ ଜିଲ୍ଲା ହିଞ୍ଜିଳି ବ୍ଲକ ପୋଡିଙ୍ଗି ଶ୍ୟାମଳାଇ ହାଇସ୍କୁଲରେ ଶିକ୍ଷୟିତ୍ରୀ ଭାବେ ନିଯୁକ୍ତି ପାଇଥିବା ଲତିକା ବରାଡଙ୍କ ବିରୋଧରେ ଅଭିଯୋଗ ଆସିବା ପରେ ତାଙ୍କୁ ହେପାଜତକୁ ନିଆଯାଇଥିବା ରିପୋର୍ଟରୁ ଜଣାପଡ଼ିଛି। ଶିକ୍ଷକ ଚୟନ ପ୍ରକ୍ରିୟାରେ ସେ ନକଲି ସାର୍ଟିଫିକେଟ୍ ଉପସ୍ଥାପନ କରିଥିବା ଅଭିଯୋଗ ହୋଇଛି। ପ୍ରାୟ ଛଅ ମାସ ତଳେ ରାଜ୍ୟର ବିଭିନ୍ନ ସ୍ଥାନରେ ନକଲି ସାର୍ଟିଫିକେଟ୍ ରାକେଟର ଏକ ସଂଗଠିତ ନେଟଓ୍ୱାର୍କର ପର୍ଦ୍ଦାଫାସ ହେବା ପରେ ଜିଲ୍ଲାସ୍ତରରେ ଦାଖଲ ହୋଇଥିବା ସାର୍ଟିଫିକେଟ୍ଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ କରିଥିଲେ।
ଯାଞ୍ଚ ବେଳେ ଲତିକା ଦେଇଥିବା ସାର୍ଟିଫିକେଟ୍ ଜାଲିଆତି ହୋଇଥିବା ଜଣାପଡ଼ିଛି। ଏହାପରେ ହିଞ୍ଜିଳି ବ୍ଲକ ଶିକ୍ଷା ଅଧିକାରୀ (ବିଇଓ) ଥାନାରେ ବିଧିବଦ୍ଧ ଅଭିଯୋଗ କରିଥିଲେ। ଗିରଫ ପରେ ସମ୍ପୃକ୍ତ ଶିକ୍ଷୟିତ୍ରୀଙ୍କୁ କୋର୍ଟ ଚାଲାଣ କରାଯାଇଛି।
ବଲାଙ୍ଗୀରରେ ଏକ ପୃଥକ ଘଟଣାରେ ଜିଲ୍ଲା ଶିକ୍ଷାଧିକାରୀ (ଡିଇଓ) 4ଜଣ ଶିକ୍ଷକଙ୍କ ବିରୋଧରେ ନକଲି ସାର୍ଟିଫିକେଟ୍ ଦାଖଲ ନେଇ ଥାନାରେ ଅଭିଯୋଗ କରିଥିଲେ। ସେମାନଙ୍କ ମଧ୍ୟରେ ଗତ ଏକ ଦଶନ୍ଧି ଧରି ଜିଲ୍ଲାର ପୁଇଁତଳା ବ୍ଲକ୍ ଅନ୍ତର୍ଗତ ଏକ ହାଇସ୍କୁଲରେ ହିନ୍ଦୀ ଶିକ୍ଷୟିତ୍ରୀ ଭାବେ କାମ କରିଥିବା ମୃଣ୍ମୟୀ ପଣ୍ଡା ଗୁରୁବାର ଧରାପଡ଼ିଛନ୍ତି। ତେବେ ଅନ୍ୟ ତିନି ଜଣ ଶିକ୍ଷକ ଆତ୍ମଗୋପନ କରିଥିବାରୁ ସେମାନଙ୍କୁ ଗିରଫ କରିବାରେ ପୁଲିସକୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି।
ସେହିପରି ଭବାନୀପାଟଣାରେ ଦୁଇ ଠକ ବାପ-ପୁଅ ଜାଲ ସାର୍ଟିିଫିକେଟ ମାମଲାରେ ଧରା ପଡି ଗିରଫ ହୋଇଛନ୍ତି। ପ୍ରଭାତ ମହାନନ୍ଦ ପୋଷ୍ଟ ମାଷ୍ଟର ଚାକିରି କରିବାକୁ ନକଲି ସାର୍ଟିଫିକେଟ ଦେଇଥିବା ବେଳେ ତାଙ୍କ ବାପା ପଦ୍ମନାଭ ମହାନନ୍ଦ ଗିରଫ ହୋଇଛନ୍ତି।