ଉପରାଷ୍ଟ୍ରପତି ନିର୍ବାଚନ: ୧୫ ଭୋଟ ଅବୈଧ, କ୍ରସ ଭୋଟିଂ ସଂଖ୍ୟା ଅସ୍ପଷ୍ଟ

ନୂଆଦିଲ୍ଲୀ: ଭାରତର ୧୭ତମ ଉପରାଷ୍ଟ୍ରପତି ନିର୍ବାଚନରେ ସିପି ରାଧାକୃଷ୍ଣନ ବିଜୟୀ ହୋଇଛନ୍ତି। ସେ ମୋଟ ୪୫୨ ଭୋଟ ପାଇଛନ୍ତି। ଇଣ୍ଡିଆ ମେଣ୍ଟର ପ୍ରାର୍ଥୀ ବି ସୁଦର୍ଶନ ରେଡ୍ଡୀ ୩୦୦ ଭୋଟ ପାଇ ପରାଜିତ ହୋଇଛନ୍ତି। ନିର୍ବାଚନରେ ୯୮.୨% ଭୋଟିଂ ହୋଇଥିଲା। କିନ୍ତୁ ୧୫ଟି ଭୋଟ ଅବୈଧ ଘୋଷିତ ହୋଇଛି। କ୍ରସ ଭୋଟିଂର ସଂଖ୍ୟା ଏବେ ବି ଅସ୍ପଷ୍ଟ।

ସଂସଦରେ ମୋଟ ସାଂସଦଙ୍କ ସଂଖ୍ୟା ୭୮୮। ବର୍ତ୍ତମାନ ୭ଟି ଆସନ ଖାଲି ରହିଛି। ତେଣୁ ୭୮୧ ଜଣ ସାଂସଦଙ୍କୁ ଭୋଟ ଦେବାର ଥିଲା। ଏଥିରୁ ୧୩ ଜଣ ସାଂସଦ ଅନୁପସ୍ଥିତ ଥିଲେ। ଏମାନଙ୍କ ମଧ୍ୟରେ ବିଆରଏସର ୪ ଜଣ, ବିଜେଡିର ୭ ଜଣ, ଶିରୋମଣି ଅକାଳୀ ଦଳର ୧ ଜଣ ଏବଂ ଜଣେ ନିର୍ଦଳୀୟ ସାଂସଦ ସରବଜିତ ସିଂ ଖାଲସା ଭୋଟ ଦେଇନଥିଲେ। ଅମୃତପାଲ ସିଂ ପୋଷ୍ଟାଲ ବ୍ୟାଲଟ ମାଧ୍ୟମରେ କାହାକୁ ଭୋଟ ନଦେବେ ବୋଲି ଜଣାଇଥିଲେ।

ଗଣିତର ବିବରଣୀ

• ଏନଡିଏ: ୪୨୭ ସାଂସଦ

• ବିପକ୍ଷ: ୩୫୪ ସାଂସଦ

• ଇଣ୍ଡିଆ ମେଣ୍ଟ: ୩୧୫ ସାଂସଦ

• ଅନ୍ୟାନ୍ୟ: ୩୫୪-୩୧୫ = ୩୯ ସାଂସଦ (ଯେଉଁମାନେ ଏନଡିଏ କିମ୍ବା ଇଣ୍ଡିଆ ବ୍ଲକରେ ନଥିଲେ)

• ମୋଟ ଭୋଟ: ୭୮୮

• ଖାଲି ଆସନ: ୭

• ଭୋଟ ଦେବାକୁ ଥିବା ସାଂସଦ: ୭୮୧ (୭୮୮-୭)

• ୱାଇଆରସିପି: ୧୧ ଜଣ ସାଂସଦ ଏନଡିଏକୁ ଭୋଟ ଦେଇଛନ୍ତି। ଏଥିସହ ଏନଡିଏର ସଂଖ୍ୟା ୪୩୮ ହୋଇଛି।

• ବାକି ସାଂସଦ: ୩୯-୧୧ = ୨୮

• ଅନୁପସ୍ଥିତ: ବିଜେଡି (୭), ଅକାଳୀ ଦଳ (୧), ବିଆରଏସ (୪), ସ୍ୱାଧୀନ (୧), ଅମୃତପାଲ ସିଂ (୧) = ୧୪

• ବାକି ଭୋଟ: ୨୮-୧୪ = ୧୪

• ଅବୈଧ ଭୋଟ: ୧୫ (ଏନଡିଏର ୧୦, ବିରୋଧରେ ୫ଟି ଭୋଟ୍ ବୋଲି ସୂତ୍ରରୁ ଜଣାପଡିଛି)

ଏହି ୧୪ ଭୋଟ ମଧ୍ୟରୁ କେତେକ ଅବୈଧ ହୋଇଛି କିମ୍ବା ଏନଡିଏକୁ ମିଳିଛି। କ୍ରସ ଭୋଟିଂର ସଂଖ୍ୟା ପ୍ରାୟ ୧୦ ହେବ ବୋଲି ଅନୁମାନ କରାଯାଉଛି।

କେଉଁ ରାଜ୍ୟରୁ କ୍ରସ ଭୋଟିଂ?

ସୂତ୍ର ଅନୁସାରେ, ମହାରାଷ୍ଟ୍ର ଓ ଝାଡ଼ଖଣ୍ଡର କିଛି ସାଂସଦ କ୍ରସ ଭୋଟିଂରେ ଭାଗ ନେଇଥିଲେ। ସିପି ରାଧାକୃଷ୍ଣନ ମହାରାଷ୍ଟ୍ରର ରାଜ୍ୟପାଳ ଅଛନ୍ତି। ଏହାପୂର୍ବରୁ ସେ ଝାଡ଼ଖଣ୍ଡର ରାଜ୍ୟପାଳ ଥିଲେ। ଏହି କାରଣରୁ ବିଜେପି ନେତୃତ୍ୱ ଉଭୟ ରାଜ୍ୟର ରାଜନୈତିକ ଦଳମାନଙ୍କୁ ଏନଡିଏ ପ୍ରାର୍ଥୀଙ୍କ ପାଇଁ ଭୋଟ ଦେବାକୁ ଅନୁରୋଧ କରିଥିଲେ। ରାଜସ୍ଥାନର କିଛି ସାଂସଦ ମଧ୍ୟ କ୍ରସ ଭୋଟିଂରେ ସାମିଲ ହୋଇଥାଇ ପାରନ୍ତି।

ଭୋଟ ନଦେଇଥିବା ୧୩ ଜଣ ସାଂସଦ

• ସସ୍ମିତ ପାତ୍ର – ବିଜେଡି
• ମୁନ୍ନା ଖାନ – ବିଜେଡି
• ନିରଞ୍ଜନ ବିଶୀ – ବିଜେଡି
• ମାନସ ରଞ୍ଜନ ମଙ୍ଗରାଜ – ବିଜେଡି
• ସୁଲତା ଦେଓ – ବିଜେଡି
• ଦେବାଶିଷ ସାମନ୍ତରାୟ – ବିଜେଡି
• ଶୁଭାଶିଷ ଖୁଣ୍ଟିଆ – ବିଜେଡି
• ସୁରେଶ ରେଡ୍ଡୀ – ବିଆରଏସ
• ରବି ଚନ୍ଦ୍ର ବଦ୍ଦୀରାଜୁ – ବିଆରଏସ
• ଦାମୋଦର ରାଓ ଦିବାକୋଣ୍ଡା – ବିଆରଏସ
• ବି ପାର୍ଥସାରଥି ରେଡ୍ଡୀ – ବିଆରଏସ
• ହରସିମରତ କୌର – ଶିରୋମଣି ଅକାଳି ଦଳ
• ସରବଜିତ ସିଂ ଖାଲସା – ନିର୍ଦଳୀୟ

ଏହି ନିର୍ବାଚନରେ କ୍ରସ ଭୋଟିଂ ଏକ ବଡ଼ ଚର୍ଚ୍ଚାର ବିଷୟ ହୋଇଛି। ତଥାପି, ସଠିକ ସଂଖ୍ୟା ଏବେ ବି ସ୍ପଷ୍ଟ ହୋଇନାହିଁ।