Poland backs India’s anti-terror stance:‘ଆମେ ଭାରତ ସହ ଅଛୁ’: ଆତଙ୍କବାଦ ବିରୋଧୀ ଲଢ଼େଇରେ ଏହି ଦେଶ ଭାରତକୁ ସମ୍ପୂର୍ଣ୍ଣ ସମର୍ଥନ ଜଣାଇଛି
ନୂଆଦିଲ୍ଲୀ:ଆତଙ୍କବାଦ ବିରୋଧୀ ଲଢ଼େଇରେ ଭାରତକୁ ଖୋଲା ସମର୍ଥନ ଜଣାଇ ପୋଲାଣ୍ଡ ଏକ ବାର୍ତ୍ତା ପ୍ରଦାନ କରିଛି। ଭାରତରେ ପୋଲାଣ୍ଡର ରାଷ୍ଟ୍ରଦୂତ ପିଓଟର୍ ଆଣ୍ଟୋନି ସ୍ୱିଟାଲ୍ସ୍କି କହିଛନ୍ତି ଯେ, ବିଶ୍ୱର ଯେକୌଣସି ସ୍ଥାନରେ ଥିବା ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଅଧିକାର ଭାରତର ରହିଛି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ପୋଲାଣ୍ଡ ନିଜେ ଆତଙ୍କବାଦର ଶିକାର ହୋଇଛି ,ତେଣୁ ଭାରତର ସ୍ଥିତିକୁ ଭଲ ଭାବରେ ବୁଝିପାରୁଛି।
ନୂଆଦିଲ୍ଲୀରେ ଆୟୋଜିତ ଏକ କାର୍ଯ୍ୟକ୍ରମରେ ସ୍ୱିଟାଲସ୍କି ( Piotr Antoni Switalski) ଆତଙ୍କବାଦ ପ୍ରସଙ୍ଗରେ ପୋଲାଣ୍ଡର ଆଭିମୁଖ୍ୟ ସ୍ପଷ୍ଟ କରିଥିଲେ। ସେ କହିଥିଲେ, “ଆତଙ୍କବାଦ ପ୍ରସଙ୍ଗରେ ଆମେ ଆପଣଙ୍କ ସହିତ ରହିଛୁ, କାରଣ ଆମେ ନିଜେ ମଧ୍ୟ ଆତଙ୍କବାଦର ଶିକାର ହୋଇଛୁ।” ଭାରତରେ ଘଟିଥିବା ପ୍ରମୁଖ ଆତଙ୍କବାଦୀ ଆକ୍ରମଣଗୁଡ଼ିକର ଉଲ୍ଲେଖ କରି ସେ ଜମ୍ମୁ-କଶ୍ମୀରର ପହଲଗାମଠାରେ ଏପ୍ରିଲ୍ ୨୦୨୫ରେ ଘଟିଥିବା ଆତଙ୍କବାଦୀ ଆକ୍ରମଣକୁ ମଧ୍ୟ ମନେ ପକାଇଥିଲେ।
ସେ କହିଲେ, “ଆମେ ଏହାର ତୁଳନା କରିପାରିବୁ ନାହିଁ, କାରଣ ପୂର୍ବ ବର୍ଷଗୁଡ଼ିକରେ ଭାରତୀୟ ଜନସାଧାରଣଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣଗୁଡ଼ିକ—ଯେଉଁଥିରେ ୨୦୨୫ ମସିହାରେ କାଶ୍ମୀରରେ ହୋଇଥିବା ଆକ୍ରମଣ ମଧ୍ୟ ଅନ୍ତର୍ଭୁକ୍ତ—ଅତ୍ୟନ୍ତ ଭୟଙ୍କର ଥିଲା। ” ସେ ଆହୁରି ମଧ୍ୟ କହିଲେ, “ଆତଙ୍କବାଦୀମାନେ ଯେଉଁଠାକୁ ବି ଯାଆନ୍ତୁ ନା କାହିଁକି, ସେମାନଙ୍କ ପିଛା କରିବାର ଆପଣଙ୍କ ଅଧିକାରକୁ ଆମେ ସମର୍ଥନ କରୁ; କାରଣ ଏହି ପ୍ରସଙ୍ଗରେ ଆମର ନୀତି ସମ୍ପୂର୍ଣ୍ଣ ସ୍ପଷ୍ଟ ଏବଂ ଆମେ ଏହାକୁ ଖୋଲାଖୋଲି ଭାବେ ପ୍ରକାଶ କରିଛୁ।”
ପୋଲାଣ୍ଡର ରାଷ୍ଟ୍ରଦୂତ ମଧ୍ୟ ଆତଙ୍କବାଦ ପ୍ରସଙ୍ଗକୁ ନିଜର ବ୍ୟକ୍ତିଗତ ଅନୁଭୂତି ସହିତ ଯୋଡ଼ିଥିଲେ। ସେ ଉଲ୍ଲେଖ କରିଥିଲେ ଯେ ୨୦୨୫ ମସିହାର ପହଲଗାମ୍ ଆତଙ୍କବାଦୀ ଆକ୍ରମଣର ଠିକ୍ ପୂର୍ବରୁ ସେ ଜମ୍ମୁ ଓ କାଶ୍ମୀରରେ ଥିଲେ। ସେ କହିଥିଲେ, “ଗତ ବର୍ଷ ମୁଁ କାଶ୍ମୀରରେ ଇଷ୍ଟର ପର୍ବ ପାଳନ କରିଥିଲି ଏବଂ ଆତଙ୍କବାଦୀ ଆକ୍ରମଣର ପୂର୍ବ ରାତିରେ ଶ୍ରୀନଗର ଛାଡ଼ିଥିଲି। ପରଦିନ ମୋର ସେଠାକୁ ଯିବାର କାର୍ଯ୍ୟକ୍ରମ ଥିଲା। ତେଣୁ, ଏହା ମୋ ପାଇଁ ଅତ୍ୟନ୍ତ ବ୍ୟକ୍ତିଗତ ବିଷୟ।”
‘ଅପରେସନ୍ ସିନ୍ଦୂର’ର ପ୍ରାରମ୍ଭିକ ପର୍ଯ୍ୟାୟରେ ପାକିସ୍ତାନୀ ଲକ୍ଷ୍ୟସ୍ଥଳ ବିରୁଦ୍ଧରେ ପୋଲାଣ୍ଡ-ନିର୍ମିତ ଡ୍ରୋନ୍ ବ୍ୟବହାର ସମ୍ବନ୍ଧୀୟ ଖବର ଉପରେ ମଧ୍ୟ ସ୍ୱିଟାଲସ୍କି ପ୍ରତିକ୍ରିୟା ରଖିଥିଲେ। ସେ ଉଲ୍ଲେଖ କରିଥିଲେ ଯେ ଭାରତ ଓ ପାକିସ୍ତାନ – ଉଭୟ ପକ୍ଷରୁ ଏଭଳି ଡ୍ରୋନ୍ ବ୍ୟବହାର କରାଯାଇଥିବା ନେଇ ଖବର ସାମ୍ନାକୁ ଆସିଥିଲା।
ସେ କହିଛନ୍ତି ଯେ, ତାଙ୍କ ସନ୍ଦେହ ହେଉଛି ସେଗୁଡ଼ିକୁ “କେବଳ ଧୋକା ଦେବା ପାଇଁ ବ୍ୟବହାର କରାଯାଉଥିଲା ଏବଂ ସେମାନେ ସେହି ଡ୍ରୋନ୍ଗୁଡ଼ିକର ପରୀକ୍ଷଣ କରୁଥିଲେ—ଯାହା ବିଷୟରେ ବିଶେଷଜ୍ଞମାନେ ମଧ୍ୟ ଇଙ୍ଗିତ କରୁଥିଲେ।”
ପାକିସ୍ତାନ ପ୍ରସଙ୍ଗରେ ପୋଲାଣ୍ଡକୁ ଟାର୍ଗେଟ କରି ଦିଆଯାଇଥିବା ବୟାନ ଉପରେ ସ୍ୱିଟାଲସ୍କି ମଧ୍ୟ ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ସେ କହିଛନ୍ତି, “ପୋଲାଣ୍ଡ ଉପରେ ଆକ୍ରମଣ କରିବା ପାଇଁ ‘ପାକିସ୍ତାନ ଫ୍ୟାକ୍ଟର’ ବ୍ୟବହାର କରୁଥିବା କିଛି ବୟାନ ଶୁଣି ମୁଁ ପ୍ରକୃତରେ ବହୁତ ଆଶ୍ଚର୍ଯ୍ୟ ହୁଏ। କେତେକ ସମୟରେ, ମୁଁ ଏହା ପଛରେ କୌଣସି ପ୍ରକାରର ବିଦେଶୀ ଏଜେଣ୍ଡା ଅନୁଭବ କରେ।”
ପାକିସ୍ତାନ ସହିତ ପୋଲାଣ୍ଡର ସମ୍ପର୍କ ବିଷୟରେ ସେ କହିଲେ ଯେ, ଇସଲାମାବାଦ ସହିତ କୂଟନୈତିକ ସମ୍ପର୍କ ବଜାୟ ରଖିଛି ଏବଂ ଏଥିରେ କିଛି ଆର୍ଥିକ ସ୍ୱାର୍ଥ ମଧ୍ୟ ଜଡ଼ିତ ରହିଛି। ତଥାପି, ପୋଲାଣ୍ଡ ତୁଳନାରେ ଅନ୍ୟ ଅନେକ ପଶ୍ଚିମ ୟୁରୋପୀୟ ଦେଶ ପାକିସ୍ତାନର ଅର୍ଥନୀତିରେ ବହୁତ ଅଧିକ ସକ୍ରିୟ ରହିଛନ୍ତି।
ସ୍ୱିଟାଲସ୍କି କହିଛନ୍ତି ଯେ ପୋଲାଣ୍ଡ ପ୍ରତିରକ୍ଷା କ୍ଷେତ୍ରରେ ଅରବ ୟୁରୋ ଖର୍ଚ୍ଚ କରୁଛି ଏବଂ ଭାରତକୁ ଏକ ଆକର୍ଷଣୀୟ ଅଂଶୀଦାର ଭାବରେ ବିବେଚନା କରୁଛି। ସେ ଉଲ୍ଲେଖ କରିଛନ୍ତି ଯେ ଭାରତର ପ୍ରତିରକ୍ଷା ଉତ୍ପାଦନ କ୍ଷମତା ଏବଂ ଏହାର ବିଶାଳ ବଜାର ଉଭୟ ଦେଶ ମଧ୍ୟରେ ସହଯୋଗ ପାଇଁ ନୂତନ ସୁଯୋଗ ସୃଷ୍ଟି କରୁଛି। ସେ କୃଷି ସମେତ ଅନ୍ୟାନ୍ୟ କ୍ଷେତ୍ରରେ ମଧ୍ୟ ସହଯୋଗ ବୃଦ୍ଧି କରିବା ବିଷୟରେ ଆଲୋଚନା କରିଥିଲେ।
ସେ ଆହୁରି ମଧ୍ୟ କହିଛନ୍ତି ଯେ ପୋଲାଣ୍ଡର କମ୍ପାନୀଗୁଡ଼ିକ ଭାରତରେ ନିଜର ଉପସ୍ଥିତି ବୃଦ୍ଧି କରିବାକୁ ଚାହୁଁଛନ୍ତି। ସେ ଭାରତୀୟ କମ୍ପାନୀଗୁଡ଼ିକୁ ପୋଲାଣ୍ଡକୁ ଏକ ବନ୍ଧୁତ୍ୱପୂର୍ଣ୍ଣ ପ୍ରବେଶପଥ ଭାବରେ ବିଚାର କରିବାକୁ ଆହ୍ୱାନ ଦେଇଛନ୍ତି, ଯାହା ମାଧ୍ୟମରେ ସେମାନେ ୟୁରୋପୀୟ ସଂଘର ବିଶାଳ ବଜାରରେ ପ୍ରବେଶ କରିପାରିବେ।