ଅର୍ଜୁନ ପୁରସ୍କାର ପାଇଁ ଅଣଦେଖା ହେଲେ ଓଡିଶାର ବୀରେନ୍ଦ୍ର ଲାକ୍ରା, ଦୀପଗ୍ରେସ ଏକ୍କା !

ଭୁବନେଶ୍ୱର: ୨୦୨୧ ଅର୍ଜୁନ ପୁରସ୍କାର ପାଇଁ ହକି ଇଣ୍ଡିଆ କେଉଁ ନୀତି ଆପଣାଇଛି ତାହା ଜଣାପଡୁ ନାହିଁ । ପ୍ରଦର୍ଶନ, ଅଭିଜ୍ଞତା ନା ଆଉ କିଛି ? ତେବେ ଏଥର ଅର୍ଜୁନ ପୁରସ୍କାର ପାଇଁ ଭାରତର ଦୁଇ ଆନ୍ତର୍ଜାତୀୟ ଷ୍ଟାର ବୀରେନ୍ଦ୍ର ଲାକ୍ରା ଏବଂ ଦୀପଗ୍ରେସ ଏକ୍କାଙ୍କ ନାମ ପଠାଯାଇ ନାହିଁ । ଏହି ଦୁଇ ଖେଳାଳିଙ୍କ କ୍ଷେତ୍ରରେ ନୁହେଁ ଓଡିଶାକୁ ବାରମ୍ବାର ଏ ନେଇ କୋଣଠେସା କରାଯାଉଛି । ୬୦ ବର୍ଷ ମଧ୍ୟରେ ମାତ୍ର ୯ଜଣ ଓଡିଆ ଖେଳାଳି ଏହି ସମ୍ମାନ ପାଇଛନ୍ତି । ହକି ଇଣ୍ଡିଆ ତରବରିଆ ଭାବେ ଖେଳରତ୍ନ ପୁରସ୍କାର ପାଇଁ ଶ୍ରୀଜେସ,ଦୀପିକା ଏବଂ ଅର୍ଜୁନ ପୁରସ୍କାର ପାଇଁ ହରମନପ୍ରୀତ ସିଂ, ବନ୍ଦନା କାଟରିୟା ଏବଂ ନଭଜୋତ କୌରଙ୍କ ନାମ ପଠାଇଛି ।ଏମାନଙ୍କ ତୁଳନାରେ ବୀରେନ୍ଦ୍ର ଏବଂ ଦୀପଗ୍ରେସଙ୍କ ପ୍ରଦର୍ଶନ କଣ ଖରାପ ଥିଲା? ଅଲିମ୍ପିକ ଟିମରେ ପକ୍ଷପାତିତା ସ୍ୱର ଜୋର ଧରିବା ପରେ ଏହାକୁ ଲୁଚାଇବା ପାଇଁ ଉପରୋକ୍ତ ଦୁଇ ଖେଳାଳିଙ୍କୁ ଜାତୀୟ ଦଳର ଉପ ଅଧିନାୟକ କରି ଦିଆଗଲା । ବୀରେନ୍ଦ୍ର ୧୯୭ ଆନ୍ତର୍ଜାତୀୟ ମ୍ୟାଚ ଖେଳିଥିବା ବେଳେ ହରମନପ୍ରୀତ ୧୧୯ ମ୍ୟାଚ ଖେଳିଛନ୍ତି । ସେହିପରି ଦୀପଗ୍ରେସଙ୍କ ପ୍ରଦର୍ଶନକୁ ସବୁ ମହଲରେ ପ୍ରଶଂସା କରାଯାଉଥିବା ବେଳେ ତାଙ୍କୁ ଆଡେଇ ନଭଜୋତଙ୍କ ନାଁ ସୁପାରିଶ କରାଗଲା ।ସରକାରଙ୍କ ନୂତନ ନିୟମ ଅନୁସାରେ ରାଜ୍ୟ ସରକାର, କ୍ରୀଡା ସଂଗଠନ ଏବଂ କ୍ରୀଡାବିତ୍ ବ୍ୟକ୍ତିଗତ ଭାବେ ନିଜ ନାମ ସୁପାରିଶ କରିପାରିବେ । ତେବେ କମିଟି ଜାତୀୟ ଫେଡେରେଶନ ପଠାଇଥିବା ନାମକୁ ଗୁରୁତ୍ୱ ଦେଇଥାଏ । ଯଦି ଏହା ବିଚାରକୁ ନିଆଯାଏ ତାହାହେଲେ ଏଥର ହକି ଇଣ୍ଡିଆ ପଠାଇଥିବା ଖେଳାଳି ପୁରସ୍କାର ହକଦାର ହେବେ । କମିଟି ଯଦି ପ୍ରକୃତରେ ନିରପେକ୍ଷ ବିଚାର କରେ ତାହାହେଲେ ହୁଏତ ଓଡିଶା ଖେଳାଳିଙ୍କୁ ଉପଯୁକ୍ତ ନ୍ୟାୟ ମିଳିପାରିବ । ଏବେ କେବଳ ସମୟକୁ ଅପେକ୍ଷା ।