ବିହାରରେ ବିଜେପି ଏବେ ବିରୋଧୀ ଦଳର ଭୂମିକାରେ ରହିଛି । ତେବେ ଗୃହମନ୍ତ୍ରୀ ଅମିତ ଶାହ ବିହାରରେ 2024 ନିର୍ବାଚନ ପାଇଁ ମିଶନ 35 ଟାର୍ଗେଟ ଦେଇଛନ୍ତି । ଅମିତ ଶାହଙ୍କ ଟାର୍ଗେଟ ପୂରଣ କରିବା ପାଇଁ ବିଜେପି ନେତାମାନେ ଏବେ ବିହାରରେ କସରତ ଆରମ୍ଭ କରିଦେଇଛନ୍ତି ।
ବିଜେପିକୁ ବାଏ ବାଏ କହି ଜେଡିୟୁ ଏବେ ଆରଜେଡି , କଂଗ୍ରେସ ଏବଂ ଅନ୍ୟାନ୍ୟ ଦଳ ସହ ମିଳିତ ମଞ୍ଚ ଗଠନ କରି ସରକାର ଗଠନ କରିଛି । ଜେଡିୟୁର ଅଚାନକ ହୃଦୟ ପରିବର୍ତ୍ତନକୁ ବିଜେପି ବିଶ୍ବାସ କରିପାରିନଥିବା ବେଳେ ଏବେ ଜେଡିୟୁ କୁ ପାନେ ଦେବାକୁ ରଣନୀତି ଆରମ୍ଭ କରିଛନ୍ତି ଗୃହମନ୍ତ୍ରୀ ଅମିତ ଶାହ । ଏନେଇ ଦଳୀୟ ନେତା ଓ କର୍ମୀଙ୍କୁ ରଣନୀତି କରି ଆଗାମୀ ନିର୍ବାଚନରେ ଜେଡିୟୁ ଠାରୁ ଆସନ ଛଡ଼ାଇବାକୁ ଅମିତ ଶାହ ବିହାର ଗସ୍ତ କରିବାକୁ ଯୋଜନା କରିଛନ୍ତି ।
2019 ରେ ଅନୁଷ୍ଠିତ ସାଧାରଣ ନିର୍ବାଚନରେ ବିହାରର 40 ଟି ଲୋକସଭା ଆସନରୁ 39 ଟି ଆସନରେ ଏନଡିଏ ଜିତିଥିଲା। ଜେଡିୟୁ ଏହି 39 ଟି ଲୋକସଭା ଆସନ ମଧ୍ୟରୁ 16 ଟି ଜିତିଥିଲା। ଯାହା ଉପରେ ଏବେ ଅମିତ ଶାହ ଫୋକସ କରୁଛନ୍ତି । ଜେଡିୟୁ ଜିତିଥିବା ଆସନରେ ବିଜେପିର ମଧ୍ୟ ପଲା ଭାରି ଅଛି ।
ବର୍ତ୍ତମାନ ଏନଡିଏ ପାଖରେ ପାଖରେ 23 ଟି ସିଟ୍ ଅଛି। 2024 ବର୍ଷ ପାଇଁ, ବିଜେପି 35 ଟି ଆସନ ଧାର୍ଯ୍ୟ କରିଛି । ମିଶନ 35 ବିଜେପି ପାଇଁ ଏଥର କେତେ କଷ୍ଟକର ହେବ ତାହା କହିହେବ ନାହିଁ । ତେବେ ସେପ୍ଟେମ୍ବର ମାସରୁ ବିହାରରେ ନିଜର ମିଶନ 35 ଲକ୍ଷ୍ୟ ପୂରଣ କରିବା ପାଇଁ ଅମିତ ଶାହ ବିହାର ଗସ୍ତ କାର୍ଯ୍ୟସୂଚୀ କରିଛନ୍ତି । ଲୋକ ଜନଶକ୍ତି ପାର୍ଟି ର 5 ସଦସ୍ୟ ଏନଡିଏରେ ରହିଛନ୍ତି । ଅବଶ୍ୟ ଚିରାଗ ପାଶଓ୍ବାନ ବିଜେପି ସହ ଯିବାର ସଂଭାବନା କମ ରହିଛି ।
ବିହାର ଲୋକସଭାରେ ପୂର୍ବସ୍ଥିତି ଆଣିବାକୁ ଏଥର ବିଜେପି ଆଗୁଆ ରାଲି, ସଭା କରିବା ସହ ଲୋକଙ୍କ ପାଖକୁ ଯିବାକୁ ନିଷ୍ପତ୍ତି ନେଇଛି । ସେପଟେ ଆରଜେଡି ଏବେ ନୀତିଶଙ୍କ ଜେଡିୟୁ ସହ ସରକାରରେ ଥିବାରୁ ଲୋକସଭା ନିର୍ବାଚନରେ ଏଥର ବିଜେପିକୁ ଟକ୍କର ଦେବାପାଇଁ ଅଧିକ ପରିଶ୍ରମ କରିବାକୁ ଏହାର ନେତାଙ୍କୁ ନିର୍ଦେଶ ଦେଇଛି । ଗତ ନିର୍ବାଚନରେ ଆରଜେଡି ଖାତା ଖୋଲିପାରିନଥିଲା । କଂଗ୍ରେସ ମାତ୍ର ଗୋଟିଏ ଆସନରେ ବିଜୟୀ ହୋଇଥିଲା ।
ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ କହିଛନ୍ତି ଆମେ ବିଜେପିର ରଣନୀତିକୁ ଭେଦିବାକୁ ଚେଷ୍ଟା କରୁଛୁ । ଅମିତ ଶାହଙ୍କ ମିଶନ 35କୁ ଆମେ ବାଧାଦେବୁ । ବିଜେପି କେବେହେଲେ ବିହାରରେ ତାର ଲକ୍ଷ୍ୟ ପୂରଣ କରିପାରିବ ନାହିଁ ।
ମୁଖ୍ୟମନ୍ତ୍ରୀ ନୀତିଶ କୁମାର 2024ରେ ବିରୋଧୀ ଦଳର ପ୍ରଧାନମନ୍ତ୍ରୀ ପ୍ରାର୍ଥୀ ହେବାର ଯଥେଷ୍ଟ ସଂଭାବନା ରହିଛି । ଆରଜେଡି ସହ କଂଗ୍ରେସ ନେତାମାନେ ନୀତିଶଙ୍କୁ ଏହି ପ୍ରତିଶ୍ରୁତି ଦେଇଥିବା ଚର୍ଚା ହେଉଛି ।
ତେବେ ବିହାରରେ ବିଜେପିର ମିଶନ 35 ଲକ୍ଷ୍ୟ ପୂରଣ ହୋଇପାରୁଛି ନା ମିଳିତ ବିରୋଧୀ ମଂଚ ବିଜେପି ର ପକ୍ଷ ଛେଦନ କରିବ ତାକୁ ନେଇ ବିହାର ରାଜନୀତି ଏବେ ସରଗରମ ହେବାରେ ଲାଗିଛି ।