ବଜାରରେ ହଜିଲା ମୋବାଇଲ, ଆକାଉଣ୍ଟରୁ ୧.୨୫ ଲକ୍ଷ ଗାଏବ

ବ୍ରହ୍ମପୁର: ବଜାରରେ ସଉଦା କିଣିଲା ବେଳେ ହଜିଗଲା ମୋବାଇଲ୍‌। ଆଉ ଏହାର କିଛି ସମୟ ପରେ ବ୍ୟାଙ୍କ ଆକାଉଣ୍ଟରୁ ଗାଏବ ହୋଇଗଲା ୧ଲକ୍ଷ ୨୫ ହଜାର ଟଙ୍କା। ଠକେଇର ଶିକାର ହୋଇଥିବା ବ୍ୟକ୍ତି ଏନେଇ ବ୍ରହ୍ମପୁର ସାଇବର ଓ ଅର୍ଥନୈତିକ ଅପରାଧ ଥାନାରେ ଅଭିଯୋଗ କରିଛନ୍ତି। ମିଳିଥିବା ସୂଚନା ଅନୁଯାୟୀ, ଭଞ୍ଜନଗର ଭେଜିପୁଟ ଅଞ୍ଚଳର ଜଣେ ବ୍ୟକ୍ତି ବ୍ରହ୍ମପୁର ଇଞ୍ଜନିୟରିଂ ସ୍କୁଲ ଛକ ନିକଟରେ ଏକ ଆପାର୍ଟମେଣ୍ଟରେ ରହୁଛନ୍ତି। ଗତ ୨୪ ତାରିଖ ଦୀପାବଳି ପାଇଁ ସାମଗ୍ରୀ କିଣିବାକୁ ଆଙ୍କୁଲି ଶିଳ୍ପାଞ୍ଚଳ ବଜାରକୁ ଯାଇଥିଲେ। ଦୋକାନ ବୁଲି ବୁଲି ସାମଗ୍ରୀ କିଣୁଥିଲେ। ଏହି ସମୟରେ କେଉଁ ଏକ ଦୋକାନରେ ମୋବାଇଲ ଛାଡ଼ି ଦେଲେ। ଆଖପାଖରେ ଖୋଜାଖୋଜି ପରେ ମଧ୍ୟ ମୋବାଇଲ୍‌ ମିଳିଲାନି। ଶେଷରେ ସେ ସେହି ନମ୍ବରର ଆଉ ସିମ୍‌ କାର୍ଡ ଏବଂ ମୋବାଇଲ ନେଇଥିଲେ। ସେହି ମୋବାଇଲରେ ଫୋନ ପେ’ ଇନଷ୍ଟଲ୍‌ କରିବା ପରେ ବ୍ୟାଙ୍କ ଆକାଉଣ୍ଟ ଦେଖିଲା ବେଳକୁ ଟଙ୍କା ଗାଏବ ହୋଇଯାଇଥିଲା। ୧୦ଟି ପର୍ଯ୍ୟାୟରେ ଟଙ୍କା ଗାଏବ ହୋଇଛି ଜାଣିବାକୁ ପାଇଥିଲେ। ଏନେଇ ସେ ସାଇବର ଥାନାରେ ଅଭିଯୋଗ କରିଛନ୍ତି।