ପୁଣେ:ମହାରାଷ୍ଟ୍ରର ରାୟଗଡ଼ ଜିଲ୍ଲା ଅନ୍ତର୍ଗତ ଦିଭେଗର (Diveagar) ସମୁଦ୍ରକୂଳରେ ଗୁରୁବାର ଦିନ ଏକ ଦୁଃଖଦ ଘଟଣା ଘଟିଛି । ପୁଣେର ଆଲାଣ୍ଡି ଅଞ୍ଚଳର ଆଠ ଜଣ ଛାତ୍ର ସମୁଦ୍ରରେ ଗାଧୋଇବା ସମୟରେ ବୁଡ଼ି ଯାଇଛନ୍ତି। ସୂଚନାନୁଯାୟୀ, ହଠାତ୍ ପ୍ରବଳ ଢେଉର ଶିକାର ହେବାରୁ ସେମାନେ ବୁଡ଼ି ଯାଇଥିଲେ। ଘଟଣା ସମ୍ପର୍କରେ ଖବର ପାଇବା ପରେ ସ୍ଥାନୀୟ ବାସିନ୍ଦା ଏବଂ ଉଦ୍ଧାରକାରୀ ଦଳ ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା।
ମହାକାଳୀ ୱାଟର ସ୍ପୋର୍ଟସ୍ର କର୍ମଚାରୀ ଏବଂ ସ୍ଥାନୀୟ ବାସିନ୍ଦାଙ୍କ ସହାୟତାରେ ସମୁଦ୍ରରୁ ସମସ୍ତ ଆଠ ଜଣ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି। ମୃତଦେହଗୁଡ଼ିକୁ ବୋର୍ଲି ପଞ୍ଚାତନ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ପଠାଯାଇଛି।
ରିପୋର୍ଟ ଅନୁଯାୟୀ, ପୁଣେ ଜିଲ୍ଲାର ଆଲାଣ୍ଡିସ୍ଥିତ ଏକ ଘରୋଇ କୋଚିଂ ସଂସ୍ଥା ‘ୱିନର୍ସ ଏକାଡେମୀ’ର ୪୨ ଜଣ ଛାତ୍ରଛାତ୍ରୀ ପିକନିକ୍ ପାଇଁ ଦିଭେଗର (Diveagar) ଆସିଥିଲେ। ଏହି ଦଳରେ ଏକାଦଶ ଓ ଦ୍ୱାଦଶ ଶ୍ରେଣୀର ଛାତ୍ରଛାତ୍ରୀମାନେ ସାମିଲ ଥିଲେ।
ଅପରାହ୍ନରେ, ସେହି ଦଳର ଆଠ ଜଣ ଛାତ୍ରଛାତ୍ରୀ ପହଁରିବା ପାଇଁ ସମୁଦ୍ର ଭିତରକୁ ଯାଇଥିଲେ। ହଠାତ୍ ସମୁଦ୍ରର ସ୍ଥିତି ବଦଳିଯାଇଥିଲା; ପ୍ରବଳ ସ୍ରୋତ ଓ ଉଚ୍ଚ ଢେଉର ପ୍ରଭାବରେ ସେହି ଆଠ ଜଣଯାକ ଛାତ୍ରଛାତ୍ରୀ ଗଭୀର ପାଣି ଭିତରକୁ ଭାସିଯାଇଥିଲେ ଏବଂ କେହି କିଛି କରିବା ପୂର୍ବରୁ ହିଁ ସେମାନଙ୍କର ବୁଡ଼ି ମୃତ୍ୟୁ ହୋଇଯାଇଥିଲା।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ବାହାରୁ ଆସୁଥିବା ପର୍ଯ୍ୟଟକ ଓ ଛାତ୍ରଛାତ୍ରୀମାନଙ୍କର ସମୁଦ୍ରର ଗଭୀରତା ଏବଂ ଜଳସ୍ତରର ପରିବର୍ତ୍ତନଶୀଳତା ସମ୍ପର୍କରେ ପ୍ରାୟତଃ ସଠିକ୍ ଧାରଣା ନଥାଏ। ତେଣୁ, ପାଣିକୁ ଓହ୍ଲାଇବା ସମୟରେ ସେମାନଙ୍କୁ ବିଶେଷ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଥାଏ ।