ଗଜପତିରୁ ୫୦ ଲକ୍ଷରୁ ଅଧିକ ଟଙ୍କାର ଗଞ୍ଜେଇ ଜବତ, ଜଣେ ଗିରଫ, ୩ ଫେରାର

ଗଜପତି : ଗଜପତି ପୋଲିସକୁ ବଡ଼ ସଫଳତା । ଆର. ଉଦୟଗିରି ଥାନା ପୋଲିସର ପାଟ୍ରୋଲିଂ ବେଳେ ଜବତ ହୋଇଛି ବିପୁଳ ପରିମାଣର ଗଞ୍ଜେଇ । ପତେଇଗୁଡା ଗ୍ରାମ ଓ ଅନୁଗୁରୁ ଗ୍ରାମ ମଧ୍ୟରେ ଥିବା ଘଞ୍ଚ ଜଙ୍ଗଲରୁ ୯ କ୍ବିଣ୍ଟାଲରୁ ଅଧିକ ଗଞ୍ଜେଇ ଜବତ କରିଛି ପୋଲିସ । ଘଟଣାରେ ଜଣଙ୍କୁ ଗିରଫ କରାଯାଇଥିବା ବେଳେ, ୩ ଜଣ ଫେରାର ଅଛନ୍ତି ।

ଗିରଫ ଅଭିଯୁକ୍ତ ଜଣକ ହେଲେ ବିହାର ରୋହତାସ ଜିଲ୍ଲା ବିକ୍ରମଗଞ୍ଜ ଥାନା ଅନ୍ତର୍ଗତ ଧନୀଗାଁ ଗ୍ରାମର ସୋନୁ ପାଶଓ୍ବାନ । ବିହାରକୁ ଏହି ଗଞ୍ଜେଇ ଚାଲାଣ କରିବା ଉଦ୍ଦେଶ୍ୟରେ ୨୪ଟି ଗଞ୍ଜେଇ ବାସ୍ତା ରାସ୍ତା କଡରେ ରଖାଯାଇଥିଲା । ଖବର ପାଇ ପୋଲିସ ଅତର୍କିତ ଚଢ଼ାଉ କରି ଏହି ଗଞ୍ଜେଇକୁ ଜବତ କରିଥିଲା । ଘଟଣାସ୍ଥଳରୁ ୩ ଜଣ ଫେରାର ହୋଇଥିବା ବେଳେ, ଅନ୍ୟ ଜଣଙ୍କୁ କାବୁ କରିଥିଲା ପୋଲିସ । ଜବତ ଗଞ୍ଜେଇର ଆନୁମାନିକ ମୂଲ୍ୟ ୫୦ ଲକ୍ଷ ଟଙ୍କାରୁ ଅଧିକ ହେବ । ତେବେ ଆଗକୁ ଚଢ଼ାଉକୁ ଜୋରଦାର କରାଯିବ ବୋଲି ସୂଚନା ଦେଇଛନ୍ତି ଗଜପତି ଏସପି ଜୟରାମ ଶତପଥୀ ।