ସାଂସଦଙ୍କ ତୃତୀୟ ବିବାହ: ୧୮ ବର୍ଷିୟ ମହିଳାଙ୍କୁ ବିବାହ କରି ଚର୍ଚ୍ଚାରେ ପାକିସ୍ତାନ ସାଂସଦ

ନୂଆଦିଲ୍ଲୀ: ତୃତୀୟ ଥର ପାଇଁ ବିବାହ କରିଛନ୍ତି ପାକିସ୍ତାନର ସାଂସଦ ଆମିର ଲିଆକତ୍ । ସେ ପାକିସ୍ତାନର ଜଣେ ଲୋକପ୍ରିୟ ଟେଲିଭିଜନ ହୋଷ୍ଟ ଭାବେ ମଧ୍ୟ ପରିଚିତ । ତାଙ୍କୁ ବର୍ତ୍ତମା ୪୯ ବର୍ଷ । ସେ ଯାହାକୁ ବିବାହ କରିଛନ୍ତି ତାଙ୍କ ନାମ ସୟିଦା ଦାନିଆ । ତାଙ୍କ ବୟସ ୧୮ । ଆମିର ଲିଆକତ୍ ୧୮ ବର୍ଷିଆ ସୟିଦା ଦାନିଆ ଶାହାଙ୍କୁ ବିବାହ କରିବା ଘଟଣା ପାକିସ୍ତାନରେ ଏବେ ଚର୍ଚ୍ଚାର ବିଷୟ ପାଲଟିଛି । ତାଙ୍କ ବାହାଘର ବୁଧବାର ହୋଇଛି ବୋଲି ସାଂସଦ ନିଜେ ତାଙ୍କ ଇନଷ୍ଟାରେ ପୋଷ୍ଟ କରିଛନ୍ତି ।

ଅନ୍ୟପଟେ ସେହି ବୁଧବାର ଅମିରଙ୍କ ଦ୍ୱିତୀୟ ପତ୍ନୀ ମଧ୍ୟ ଇନଷ୍ଟାରେ ତାଙ୍କୁ ଛାଡ଼ପତ୍ର ଦେଇଥିବା ଜଣାଇଛନ୍ତି । ଆମିର ୨୦୧୮ରେ ଦ୍ୱିତୀୟ ବିବାହ କରିଥିଲେ । ସେ ଯେତେବେଳେ ଏହି ବିବାହର ଘୋଷଣା କରିଥିଲେ ସେହି ସମୟରେ ଆମିରଙ୍କ ପ୍ରଥମ ପତ୍ନୀ ସୟିଦ ବୁସରା ଇକବାଲ ସୋସିଆଲ ମିଡିଆରେ ଘୋଷଣା କରିଥିଲେ ଆମିର ତାଙ୍କୁ ଫୋନରେ ତଲାକ ଦେଇଛନ୍ତି । ବୁସରା କହିଥିଲେ ଏହାଦ୍ୱାରା ତାଙ୍କ ପିଲା ଓ ତାଙ୍କୁ ଗଭିର କ୍ଷତି ପହଞ୍ଚିଛି। ୨୦୨୧ରେ ଆମିର ତାଙ୍କ ବିବାହକୁ ନେଇ ଦାବି କରିଥିଲେ ତାଙ୍କର କେବଳ ଜଣେ ପତ୍ନୀ ହିଁ ଅଛନ୍ତି ।