ମେମୋରୀ ଚିପ୍ ଖୋଲିବ ମାନସ ସ୍ୱାଇଁ ହତ୍ୟା ଗୁମର, ରିମାଣ୍ଡରେ ଯିବେ ନିରଞ୍ଜନ ସେଠୀ

ଭଦ୍ରକ: କ୍ୟାମେରାମ୍ୟାନ୍ ମାସନ ସ୍ୱାଇଁ ହତ୍ୟାର ଗୁମର ଧିରେ ଧିରେ ଫିଟାବାରେ ଲାଗିଛି । ମେମୋରୀ ଚିପ୍ ପାଇଁ ମାନସଙ୍କୁ ଅପହରଣ ପରେ ହତ୍ୟା କରାଯାଇଛି । କେଉଁଠି ଅଛି ସେହି ମେମୋରୀ ଚିପ୍ ? ଏଯାଏ ପୋଲିସର ହସ୍ତଗତ ହୋଇନି । ପ୍ରଶ୍ନ ଉଠୁଛି ମେମୋରୀ ଚିପରେ ଏମତି କଣ ଥିଲା ? କି ରହସ୍ୟ ସେଥିରେ ଷ୍ଟୋର୍ କରିଥିଲେ ମାନସ ? ଯେଉଁଥିପାଇଁ ତାଙ୍କୁ ଜୀବନ ଦେବାକୁ ପଡ଼ିଲା ।

ମାନସଙ୍କ ପାଖରେ ଥିବା ମେମୋରୀ କାର୍ଡକୁ ପାଇବା ପାଇଁ ଏମିତି କାହିଁକି ବ୍ୟାକୁଳ ହୋଇଥିଲେ ଶର୍ମିଷ୍ଠା ଓ ନିରଞ୍ଜନ । ଯେଉଁଥିପାଇଁ ଏତେବଡ଼ କିଡନାପ୍ ଓ ମର୍ଡର ଷଡଯନ୍ତ୍ର ରଚିଲେ । ନିରଞ୍ଜନ ସେଠୀଙ୍କର ଭୂମିକା କଣ ? ଶର୍ମିଷ୍ଠାଙ୍କ ସହ ତାଙ୍କର ଲିଙ୍କ କଣ ଥିଲା ? ଏସବୁ ପ୍ରଶ୍ନର ରହସ୍ୟ ଭେଦିବାକୁ ଉଦ୍ୟମ ଚଳାଇଛି ଭଦ୍ରକ ପୋଲିସ ।

ଯେଉଁ ମେମୋରୀ କାର୍ଡ ପାଇଁ ମାନସଙ୍କୁ ବୀଭତ୍ସ ହତ୍ୟା କରାଗଲା ସେହି ଚିପକୁ ଖୋଜି ବାହାର କରିବା କାମରେ ଲାଗିଛି ପୋଲିସ ଟିମ୍ । ନିରଞ୍ଜନଙ୍କ ମୁହଁରୁ ସତ ଉଗାରିବ ପୋଲିସ । ଏଥିପାଇଁ ଖୁବଶୀଘ୍ର ନିରଞ୍ଜନ ସେଠୀଙ୍କୁ ରିମାଣ୍ଡରେ ଆଣିବ ଭଦ୍ରକ ପୋଲିସ । ତାଙ୍କ ପାଖର ବହୁ ଗୁରୁତ୍ୱପୂର୍ଣ୍ଣ ତଥ୍ୟ ମିଳିପାରେ ।

ମାଷ୍ଟରମାଇଣ୍ଡ ୱେବ ଚ୍ୟାନେଲ୍ ମାଲିକାଣୀ ଶର୍ମିଷ୍ଠା ରାଉତ ଓ ଜଣେ ମହିଳା ସହଯୋଗୀ ଫେରାର୍ ଅଛନ୍ତି । ସେମାନେ କେଉଁଠି ଅଛନ୍ତି ? ସେମାନଙ୍କୁ ଫେରାର୍ କରାଇବାରେ ନିରଞ୍ଜନ ସେଠୀଙ୍କର ଭୂମିକା ରହିଛି କି ? ନିରଞ୍ଜନଙ୍କୁ ରିମାଣ୍ଡରେ ଆଣି ମାରାଥନ୍ ଜେରା କଲେ ସତ ସାମନାକୁ ବାହାରି ଆସିବ । ଶର୍ମିଷ୍ଠା ଧରା ପଡ଼ିଲେ ମାନସ ମର୍ଡର ମିଷ୍ଟ୍ରିର ସମ୍ପୂର୍ଣ୍ଣ ପର୍ଦ୍ଦାଫାସ ହୋଇଯିବ ।