ଓଡ଼ିଶାରେ ଓର୍ ଖୋଳିବାକୁ ଓଏମଡିସିକୁ ସୁପ୍ରିମକୋର୍ଟ ଦେଲେ ଅନୁମତି, କହିଲେ ଅନ୍ତତଃ ସରକାରୀ ପାଣ୍ଠିକୁ ଆସିବ ରାଜସ୍ୱ

ନୂଆଦିଲ୍ଲୀ: ସୁପ୍ରିମକୋର୍ଟ ଗୁରୁବାର ଓଡ଼ିଶା ମିନେରାଲସ ଡେଭଲପମେଣ୍ଟ କର୍ପୋରେସନ ଲିମିଟେଡକୁ (ଓଏମଡିସି) ଓର୍ ଉତୋଳନ କରିବାକୁ ଅନୁମତି ଦେଇଛନ୍ତି । ଓଏମଡିସି ଦ୍ୱାରା ଦାଖଲ ଏକ ଆବେଦନ ପତ୍ରକୁ ବିଚାରକୁ ନେଇ ଏହି ରାୟ ଶୁଣାଇଛନ୍ତି । ବେଲକୁଣ୍ଡି ଆଇରନ ଓର୍ ମାଇନ ଏବଂ ବଗେଇବୁରୁ ମାଇନ୍ସରୁ ଖଣିଜ ଉତୋଳନ କରିବାକୁ ଓଏମଡିସି ଏହି ଆବେଦନ ଦାଖଲ କରିଥିଲା ।

ମୁଖ୍ୟ ବିଚାରପତି ଜଷ୍ଟିସ ଏନଭି ରମଣା, ଜଷ୍ଟିସ କ୍ରିଷ୍ଣା ମୁରାରି ଏବଂ ଜଷ୍ଟିସ ହିମା କୋହଲିଙ୍କ ଗଠିତ ଖଣ୍ଡପୀଠ ଏହି ମାମଲାର ବିଚାର କରୁଥିଲେ ।

‘କମନ କଜ୍’ ନାମକ ଏକ ଏନଜିଓ ୨୦୧୪ ମସିହାରେ ଓଡ଼ିଶାରେ ହେଉଥିବା ଖଣି ଦୁର୍ନୀତିକୁ ବିଷୟ କରି ସୁପ୍ରିମକୋର୍ଟରେ ଏକ ଜନସ୍ୱାର୍ଥ ପିଟିସନ ଦାଖଲ କରିଥିଲା । ଜଙ୍ଗଲ ଓ ପରିବେଶ ନୀତି ଏବଂ ସ୍ଥାନୀୟ ଆଦିବାସୀ ଓ ଗ୍ରାମବାସୀଙ୍କ ଅଧିକାରକୁ ଅବମାନନା କରୁଥିବା ଅଭିଯୋଗରେ ଏହି ପିଟିସନ ଦାଖଲ ହୋଇଥିଲା ।

ଓଏମଡିସି ଖଣିଜ ଓର୍ ଉତୋଳନ ଅନୁମତି ପାଇଁ ସୁପ୍ରିମକୋର୍ଟରେ ଆବେଦନ କରିଥିଲା । ଯାହା ଉପରୋକ୍ତ ପିଟିସନର ପ୍ରତିକ୍ରିୟା ଅଂଶବିଶେଷ ।

ପିଟିସନରଙ୍କ ପକ୍ଷରୁ ମାମଲା ଲଢୁଥିଲେ ବରିଷ୍ଠ ଓକିଲ ପ୍ରଶାନ୍ତ ଭୂଷଣ । ପ୍ରଶାନ୍ତ ଯୁକ୍ତି ରଖିଥିଲେ ଯେ, ଅନେକ କମ୍ପାନୀ ସଂପୃକ୍ତ ଖଣି ଅଞ୍ଚଳରୁ ଖାଦାନ ସକାଶେ ଆବେଦନ କରିଛନ୍ତି । କୋର୍ଟ ଏନେଇ ଏକ କେନ୍ଦ୍ରୀୟ କମିଟି ଗଠନ କରି ତାହା ଯାଞ୍ଚ କରନ୍ତୁ । ଗଚ୍ଛିତ ଖଣିଜ ଆଇନସିଦ୍ଧତା ଯାଞ୍ଚ କରିବାର ଆବଶ୍ୟକତା ଅଛି ବୋଲି କୋର୍ଟଙ୍କୁ କହିଥଲେ ପ୍ରଶାନ୍ତ ।

କୋର୍ଟ କହିଥିଲେ, ଆବେଦନ କରିଥିବା କମ୍ପାନୀ ଏକ ସରକାରୀ ଅଟେ । ଏହାର ଉତ୍ତରରେ ପ୍ରଶାନ୍ତ କହିଥିଲେ ଯେ, ସରକାରୀ କମ୍ପାନୀକୁ ମଧ୍ୟ ମାତ୍ରାଧିକ ଜରିମନା ଦେବାକୁ ପଡ଼ିଛି । ସରକାରଙ୍କ ପକ୍ଷରୁ ଆଡଭୋକେଟ ଜେନେରାଲ କହିଥିଲେ, ଯେଉଁଠି ଅନଧିକୃତ ଥିଲା । କେବଳ ସେଠାରେ ଜରିମନା ଦିଆଯାଇଛି ।

ପୁନଶ୍ଚ କୋର୍ଟ କହିଥିଲେ ଯେ, ଆମେ ଘରୋଇ କମ୍ପାନୀକୁ ଉତୋଳନ ପାଇଁ ଅନୁମତି ଦେଇଛୁ । ଏଠି ଆବେଦନ କରିଥିବା କମ୍ପାନୀ ହେଉଛି ସରକାରୀ । ଏଠି ଅନୁମତି ନ ଦେବା ଉଚିତ୍ ହେବନି । ସରକାରୀ କମ୍ପାନୀ ହୋଇଥିବାରୁ ସରକାରଙ୍କ ପାଣ୍ଠିକୁ ଅନ୍ତତଃ ରାଜସ୍ୱ ଆସିବ ବୋଲି କୋର୍ଟ କହିଥିଲେ । ପ୍ରଶାନ୍ତ କୋର୍ଟଙ୍କ ମତ ସହ ରାଜି ହୋଇଥିଲେ । ପରେ କୋର୍ଟ ଓଏମଡିସିକୁ ଓର୍ ଖୋଳିବା ପାଇଁ ଅନୁମତି ମିଳିଥିଲା ।