ନୂଆଦିଲ୍ଲୀ: ଥାଇଲାଣ୍ଡରେ ଏକ ପଶୁ ଡାକ୍ତର ଟିମର ଉଦ୍ୟମକୁ ସାରା ବିଶ୍ୱ ପ୍ରଶଂସା କରିବାରେ ଲାଗିଛି । ସେମାନଙ୍କ ଆପ୍ରାଣ ଉଦ୍ୟମ ଯୋଗୁ ଏକ ମାଆ ଓ ଛୁଆ ହାତୀଙ୍କୁ ବଂଚା ଯାଇପାରିଥିଲା । ଏହାର ଭିଡିଓ ସୋସିଆଲ ସାଇଟରେ ଶେୟାର ହେବା ପରେ ଏହା ଭାଇରାଲ ହେବାରେ ଲାଗିଛି । ଘଟଣାଟି ଏହିପରି.. ଏଠାରେ ପ୍ରବଳ ବର୍ଷା ଯୋଗୁ ବାଟ ଜାଣି ନ ପାରି ଛୁଆ ହାତୀଟି ଏକ ବଡ ଗାତରେ ପଡି ଯାଇଥିଲା । ତାର ବିକଳ ଚିତ୍କାର ଶୁଣି ମାଆ ହାତୀ ବଂଚାଇବା ପାଇଁ ଯଥାସମ୍ଭବ ଉଦ୍ୟମ କରିଥିଲେ ମଧ୍ୟ ସଫଳ ହୋଇପାରୁ ନ ଥିଲା । ଇତି ମଧ୍ୟରେ ବନ ବିଭାଗ କର୍ମଚାରୀ ଓ ପଶୁ ଡାକ୍ତର ଟିମ ସେଠାରେ ପଂହଚିଥିଲେ । ଛୁଆ ହାତୀକୁ ବଂଚାଇବା ପାଇଁ ମାଆକୁ ସେମାନେ ଟ୍ରାଙ୍କୁଲାଇଜର କରିଥିଲେ । ମାତ୍ର ଏହା ସେମାନଙ୍କ ପାଇଁ ବୁମେରାଂ ସାବ୍ୟସ୍ତ ହୋଇଥିଲା । ମାଆ ହାତୀ ମୁହଁ ମାଡି ଗାତ ଭିତରେ ପଡି ରହିଥିଲା ।
ସ୍ଥିତି ନିୟନ୍ତ୍ରଣ ବାହାରକୁ ଯିବାରୁ କ୍ରେନ ଆଣି ମାଆ ହାତୀକୁ ବାହାରକୁ ଅଣା ଯାଇଥିଲା । ଏହା ପରେ ବହୁ କଷ୍ଟରେ ଛୁଆ ହାତୀଙ୍କୁ ବଂଚା ଯାଇଥିଲା । ତେବେ ସେତେବେଳକୁ ମାଆ ହାତୀର ଜୀବନ ଏକପ୍ରକାର ଚାଲି ଯାଇଥିଲା କହିଲେ ଭୁଲ ହେବନି । ତଥାପି ଡାକ୍ତର ଟିମ ଏବଂ ବନ ବିଭାଗ କର୍ମଚାରୀମାନେ ଆଶା ଛାଡି ନ ଥିଲେ । ହାତୀର ଛାତି ଉପରେ ସେମାନେ ସିପିଆର ଦେବା ଆରମ୍ଭ କରିଥିଲେ । ଏଥିପାଇଁ ସେମାନଙ୍କୁ ହାତୀ ଉପରେ ବହୁ ଦାୟିତ୍ୱରେ ଡେଇଁବାକୁ ପଡିଥିଲା । କିଛି ସମୟରେ ହାତୀଟି ବଂଚିଥିଲା ଏବଂ ଛୁଆକୁ ନେଇ ଜଙ୍ଗଲ ଅଭିମୁଖେ ଯାଇଥିଲା । ଏହି ଦୃଶ୍ୟ ଦେଖି ଅନେକଙ୍କ ଆଖିରେ ଆନନ୍ଦର ଲୁହ ଝରି ଯାଇଥିଲା ।
Comments are closed.