ଭକ୍ତଙ୍କ ଭିଡ଼ରେ ବଡ଼ଦାଣ୍ଡ ଦୁଲୁକୁଛି : ମହାପ୍ରଭୁ ଝୁଲି ଝୁଲି ପହଣ୍ଡି ବିଜେ କଲେ, ଆନନ୍ଦରେ ରଥାରୂଢ ହେଲେ

ପୁରୀ : ଆଜି ମହାପ୍ରଭୁଙ୍କ ପବିତ୍ର ରଥଯାତ୍ରା । ସମସ୍ତ ରତ୍ନବେଦୀ ନିକଟରେ ସମସ୍ତ ପାରମ୍ପରିକ ନୀତିକାନ୍ତି ସମାପ୍ତ ପରେ ଚତୁର୍ଦ୍ଦା ମୂରତୀ ପହଣ୍ଡି ବିଜେ ଶେଷ କଲେ । ପହଣ୍ଡିରେ ଝୁଲି ଝୁଲି ମହାପ୍ରଭୁ ଶ୍ରୀଜଗନ୍ନାଥ ବାଇସି ପାହାଚ ଓ ପରେ ସିଂହଦ୍ୱାର ଦେଇ ଶ୍ରୀମନ୍ଦିର ବାହାରକୁ ଆସିଲେ । ଶହଶହ ଘଣ୍ଟଘଣ୍ଟା ନାଦ, ଶଙ୍ଖଧ୍ୱନୀ ତଥା ବ୍ରାହ୍ମଣ ମାନଙ୍କ ମନ୍ତ୍ରୋଚାରଣରେ ଅରୁଣସ୍ତମ୍ଭ ନିକଟରେ ଏକ ଅପୂର୍ବ ଆଧ୍ୟାତ୍ମିକ ଭାବନା ଉଦ୍ରେକ ହେଉଥିଲା ।

ବଡ଼ଠାକୁର ଶ୍ରୀବଳଭଦ୍ର ନାଚି ନାଚି ଦ୍ରୁତ ଗତିରେ ରଥପାଖକୁ ଝପଟି ଆସୁଥିବାର ଦେଖାଗଲା । ଚକ୍ରରାଜ ସୁଦର୍ଶନଙ୍କୁ ଦ୍ରୁତଗତିରେ ଟେକି ଟେକି ଆଣି ମା’ ସୁଭଦ୍ରାଙ୍କ ରଥରେ ଆସୀନ କରାଇଲେ । ମନୁଆ କାଳିଆ ଜଗତର ନାଥ ଶ୍ରୀଜଗନ୍ନାଥ ଆଜି ବେଶ୍ ସୁନ୍ଦର ଦିଶୁଥିଲେ । ମହାପ୍ରଭୁଙ୍କ ଗୋଲ ଗୋଲ ଚକାଆଖିକୁ ଦେଖି ଲକ୍ଷାଧିକ ଭକ୍ତମାନେ ସେମାନଙ୍କର ଚକ୍ଷୁଯୁଗଳକୁ ପବିତ୍ର କରିପାରିଛନ୍ତି ।

ମହାପ୍ରଭୁ ବେଶ୍ ଖୁସି ମନରେ ଝୁଲି ଝୁଲି ନାଚି ନାଚି ବେଶ୍ ଉତଫୁଲ୍ଲ ବଦନରେ ପହଣ୍ଡିରେ ବିଜେ କରିଛନ୍ତି । ମଥାରେ କୀରିଟ ସାଙ୍ଗକୁ ସୁନ୍ଦର ଟାହିଆରେ ଶ୍ରୀଜଗନ୍ନାଥ ମହାପ୍ରଭୁଙ୍କ ରୂପ ଆଜି ଅବର୍ଣ୍ଣନୀୟ ଦିଶୁଥିଲା । ମହାପ୍ରଭୁଙ୍କ ବେଶ୍ ଖୁସିମନରେ ତାଙ୍କର ପ୍ରିୟ ନନ୍ଦିଘୋଷ ନିକଟରେ ଦଣ୍ଡାୟମାନ କଲେ । ଅବଶ୍ୟ ଚାରମାଳ ନିକଟରେ ମହାପ୍ରଭୁ ଟିକେ ଉଠିବାକୁ ବିଳମ୍ବ କଲେ । ବୋଧେ ରଥ ନିକଟ ପଥରେ ଦଣ୍ଡେ ଅଟକିଗଲେ ଦୂରବାଟିଆ କେଉଁ ଭକ୍ତ ଶିରୋମଣି ଟିକେ ଦର୍ଶନ ଲାଭ କରିବେ ପରା ।

ଆଜିର ଏହି ପବିତ୍ର ଦିବସରେ ଚତୁର୍ଦ୍ଧା ମୁରତୀ ରଥ ଉପରକୁ ଯିବାକୁ ଯେପରି ଉଚ୍ଛନ୍ନ ହେଉଥିଲେ ତାହା ଦେଖିବାର କଥା । ରଥଚକଟାରେ ଏବଂ ସାରା ବଡ଼ଦାଣ୍ଡରେ ଉପସ୍ଥିତ ସହସ୍ରାଧିକ ଶ୍ରଦ୍ଧାଳୁଙ୍କ ଏକସ୍ୱରରେ ‘ଜୟ ଜଗନ୍ନାଥ’ ଧ୍ୱନୀରେ ପ୍ରକମ୍ପିତ ହୋଇ ଉଠୁଥିଲା ପବିତ୍ର ପୁରୀ ବଡ଼ଦାଣ୍ଡ ସରଧାବାଲି ।

ଶ୍ରୀଜଗନ୍ନାଥଙ୍କୁ କୁହାଯାଏ ‘ପତିତ ପାବନ’ । ପତିତ ଅର୍ଥାତ୍ ନୀଚ, ପାବନ ଅର୍ଥାତ୍ ପବିତ୍ର । କଥାହେଲା, ପତିତ ମାନଙ୍କୁ ଉଦ୍ଧାରିବା ଲାଗି ମହାପ୍ରଭୁଙ୍କ ପବିତ୍ର ଶରୀର ଦାରୁବ୍ରହ୍ମରେ ବିଦ୍ୟମାନ । ସ୍ୱୟଂ ଭଗବାନ ଭକ୍ତଙ୍କ ଗହଣରେ ରହି ନିଜର ମାନବୀୟ ଲୀଳାକୁ ଜଗତର ହିତାର୍ଥେ ପ୍ରଦର୍ଶନ କରୁଛନ୍ତି ଏହି ରଥଯାତ୍ରା ଅବସରରେ । ବିଭିନ୍ନ ଧର୍ମ ସମ୍ପ୍ରଦାୟର ଭକ୍ତମାନଙ୍କର ସମାଗମରେ ବଡ଼ଦାଣ୍ଡ ଦୁଲୁକୁଥିଲା ।

ଭକ୍ତମାନଙ୍କର ମୁଖ୍ୟ ଆକର୍ଷଣ ଦାରୁବ୍ରହ୍ମ ରୂପୀ ପରଂବ୍ରହ୍ମ ଶ୍ରୀଜଗନ୍ନାଥ ତାଙ୍କର ମାନବୀୟ ଲୀଳା କରିବାକୁ ରଥାରୁଢ ହେଲେ । ଭକ୍ତମାନଙ୍କୁ ଟିକେ ଦର୍ଶନ ଦେବାକୁ ନିଜେ ଟିକେ ଭକ୍ତମାନଙ୍କ ମେଳରେ ନିଜକୁ ହଜାଇଦେବାକୁ ମହାପ୍ରଭୁ ରଥରେ ଉପବେଶନ କଲେ । ଶାସ୍ତ୍ରରେ ଉଲ୍ଲେଖ ରହିଛି, ‘ଦୋଳେ ଚ ଦୋଳଗୋବିନ୍ଦମ୍, ଚାପେ ଚ ମଧୂସୁଦନଂ । ରଥେ ତ୍ୱଂ ବାମନଂ ଦୃଷ୍ଟô୍ା, ପୁନର୍ଜନ୍ମଂ ନ ବିଦ୍ୟତେ’ । ମହାପ୍ରଭୁଙ୍କ ଅପୂର୍ବ ପହଣ୍ଡି ଦର୍ଶନ କରିବା ପରେ ଭକ୍ତମାନେ ରଥାରୂଢ ନାଥଙ୍କୁ ଦର୍ଶନ କରି ନିଜର ନିଜକୁ ଧନ୍ୟ ମନେକରୁଛନ୍ତି । ରଥାରୂଢ ଶ୍ରୀଜଗନ୍ନାଥଙ୍କୁ ଟିକକ ଦର୍ଶନ ମାତ୍ରେ ହିଁ ମଣିଷ ପାପ/ତାପରୁ ମୁକ୍ତି ପାଇଥାଏ ।

ମୋକ୍ଷ ଲାଭ କରିଥାଏ ଭଗବାନଙ୍କୁ ରଥ ଉପରେ ଦର୍ଶନ କରି । ଆଜି ସେହି ପବିତ୍ର ଦିବସ ଆଜି ହେଉଛି ମହାପ୍ରଭୁଙ୍କ ସେହି ପ୍ରସିଦ୍ଧ ଶ୍ରୀଗୁଣ୍ଡିଚା ଯାତ୍ରା ଯେଉଁ ଯାତ୍ରାରେ ଭକ୍ତମାନେ ତାଙ୍କର ପ୍ରିୟ ମଣିମାଙ୍କୁ ଦର୍ଶନ କରି ଏଜନ୍ମରୁ ମୁକ୍ତି ଲଭିବେ । ମହାପଭୁଙ୍କର ଜୟ ଜୟକାର ଧ୍ୱନୀରେ ପ୍ରକମ୍ପିତ ହେଉଛି ବଡ଼ଦାଣ୍ଡ । ଶ୍ରୀଜୀଉମାନଙ୍କର ଅତ୍ୟନ୍ତ ଘନିଷ୍ଠ ସେବକ, ସେବାୟତ, ବାଡ଼ଗ୍ରାହୀ, ପତିମହାପାତ୍ର ମାନେ ମହାପ୍ରଭୁଙ୍କୁ ତାଙ୍କର ଯାତ୍ରାକାଳରେ ସମସ୍ତ ସେବାଯତ୍ନ କରିଚାଲିଛନ୍ତି । ମହାପ୍ରଭୁଙ୍କର ପ୍ରଥମ ସେବକ ପୁରୀ ଗଜପତି ମହାରାଜା ରଥଉପରେ ସୁନା ଝାଡୁରେ ପାରମ୍ପରିକ ଛେରା ପହଁରା କରିବା ପରେ ଚାରମାଳ ବାହାର କରାଯିବ ରଥଟଣାର ଯଥେଷ୍ଟ ପୂର୍ବରୁ ।