ଯାଜପୁର: ମାଡି ଆସିଲା ଲୌହ ଦାନବ । କ’ଣ ହେଲା ଭାବିଲା ବେଳକୁ ଚାଲିଗଲାଣି ୩ ଜୀବନ । ଯାଜପୁର ଜିଲ୍ଲା କୋରେଇ ରେଳ ଷ୍ଟେଶନ ଦୁର୍ଘଟଣାରେ ଆଖି ବୁଜିଦେଲେ ପାର୍ବତୀ ବିନ୍ଧାଣି, ତାଙ୍କ ଝିଅ କଣ୍ଡେଇ ବିନ୍ଧାଣି ଓ ଅବଜୁଲ ବିବି । ମୃତକଙ୍କ ଶବ ସତ୍କାର ପାଇଁ ରେଳ ବିଭାଗ ପକ୍ଷରୁ ଦିଆଯାଇଛି ସହାୟତା । ପ୍ରତ୍ୟେକଙ୍କ ପାଇଁ ୧୦ ହଜାର ଟଙ୍କା ଲେଖାଏ ପ୍ରଦାନ କରିଛି ବିଭାଗ । ମୃତକ ମାନଙ୍କ ଶବ ବ୍ୟବଚ୍ଛେଦ କାର୍ଯ୍ୟ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ କରାଯାଇଛି। ରେଳ ବିଭାଗ ର ବରିଷ୍ଠ ଅଧିକାରୀ ଏହି ଆର୍ଥିକ ସହାୟତା ମୃତକଙ୍କ ପରିବାର ବର୍ଗଙ୍କୁ ପ୍ରଦାନ କରିଛନ୍ତି ।
ଯାଜପୁର ଜିଲ୍ଲା କୋରେଇ ରେଳଷ୍ଟେସନରେ ସୋମବାର ଏକ ମର୍ମନ୍ତୁଦ ରେଳ ଦୁର୍ଘଟଣା ଘଟିଛି। ସୂଚନା ଅନୁଯାୟୀ ଯାଜପୁର କେନ୍ଦୁଝର ରୋଡ ରେଳଷ୍ଟେସନ ଠାରୁ ମାତ୍ର ୧୦ କିମି ଦୂରରେ ଥିବା କୋରେଇ ରେଳଷ୍ଟେସନର ୧ ନଂ ପ୍ଲାଟଫର୍ମ ନିକଟରେ ହିଁ ଘଟିଥିଲା ଏଭଳି ସାଂଘାତିକ ଦୁର୍ଘଟଣା। ଲାଇନଚ୍ୟୁତ ହୋଇଥିଲା ମାଲବାହୀ ଟ୍ରେନ । ଟ୍ରେନଟିର ବେଗ ଅଧିକ ରହିଥିବାରୁ ଉକ୍ତ ବଗି ଗୁଡ଼ିକ ବିକ୍ଷିପ୍ତ ଭାବେ ଏଣେତେଣେ ଛିଟିକି ଯାଇଥିଲା।
ଦୁର୍ଘଟଣାରେ ୪ଟି ଡବା ପ୍ଲାଟଫର୍ମ ଉପରକୁ ମାଡ଼ିଯିବା ସହିତ ଫୁଟ ଓଭର ବ୍ରିଜ ଭାଙ୍ଗିଯାଇଥିଲା । ଏଥିସହିତ ଯାତ୍ରୀ ବିଶ୍ରାମ ଗୃହ ସମେତ ଟିକେଟ କାଉଣ୍ଟର ଗୃହ ମଧ୍ୟ ସମ୍ପୂର୍ଣ୍ଣ ରୂପେ ନଷ୍ଟ ହୋଇଯାଇଥିଲା l ଏଥିରେ ଷ୍ଟେସନମାଷ୍ଟର କାର୍ଯ୍ୟାଳୟ ମଧ୍ଯ ଅଧା ଭାଙ୍ଗିଯାଇଛି।
ପୂର୍ବତଟ ରେଳବାଇର ଅଧିକାରୀ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ବର୍ତ୍ତମାନ ସୁଦ୍ଧା ୩ ଜଣଙ୍କ ମୃତ୍ୟୁ ହୋଇଥିବା ସରକାରୀ ସ୍ତରରେ ସୂଚନା ମିଳିଛି। ଆଗକୁ ଏହି ସଂଖ୍ୟା ବୃଦ୍ଧି ପାଇବାର ଆଶଙ୍କା ମଧ୍ଯ ରହିଛି।
ଏଠି କହିରଖିବୁ, କୋରେଇ ରେଳ ଷ୍ଟେସନରେ ଟ୍ରେନ ଦୁର୍ଘଟଣାରେ ମୃତକଙ୍କ ପରିବାର ଓ ଗ୍ରାମବାସୀଙ୍କ ପକ୍ଷରୁ ଧାରଣା ଦିଆଯାଇଛି । ୫୦ ଲକ୍ଷ ଟଙ୍କା ଓ ଚାକିରୀ ଦାବିରେ ଷ୍ଟେସନରେ ଧାରଣା ଦେଇଛନ୍ତି ପରିବାର ସଦସ୍ୟ । କୋରେଇ ରେଳ ଷ୍ଟେସନରେ ମାଲବାହି ଟ୍ରେନ ଦୁର୍ଘଟଣାରେ ମୃତ ହୋଇଥିବା ଅବୁଜୁଲା ବିବିଙ୍କ ପରିବାର ପକ୍ଷରୁ ଏହି ରଣା ଦିଆଯାଇଛି ।
Comments are closed.