ରାୟପୁର: ଛାଡପତ୍ର ମାମଲାର ଶୁଣାଣି ବେଳେ ଛତିଶଗଡ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। କୋର୍ଟ କହିଛନ୍ତି ଯେ ଯଦି କୌଣସି ପତ୍ନୀ ପାନ ମସାଲା, ଗୁଟଖା ଏବଂ ପୁରୁଷଙ୍କ ପରି ମଦ୍ୟପାନ କରି ସ୍ୱାମୀଙ୍କୁ ହଇରାଣ କରନ୍ତି, ତେବେ ଏହା ନିଷ୍ଠୁରତା। ଜଷ୍ଟିସ ଗୌତମ ଭଦୁରୀ ଏବଂ ଜଷ୍ଟିସ ରାଧାକ୍ରିଷ୍ଣ ଅଗ୍ରୱାଲଙ୍କ ଜୁଇ ଜଣିଆ ଖଣ୍ଡପୀଠ ମାମଲାର ଶୁଣାଣି କରି କହିଛନ୍ତି, ଏପରି କରିବା ଠିକ୍ ନୁହେଁ। ଏହା ଏକ ପ୍ରକାର ଅତ୍ୟାଚାର ।
ସୂଚନାନୁସାରେ, କୋବ୍ରା ଜିଲ୍ଲାର ବାଙ୍କିମୋଙ୍ଗ୍ରାଠାରେ ରହୁଥିବା ଜଣେ ଯୁବକ କଟଘୋରା ସହରର ଜଣେ ଯୁବତୀଙ୍କୁ ବିବାହ କରିଥିଲେ। ବିବାହର ୭ ଦିନ ପରେ ୨୬ ମେ ୨୦୧୫ ଦିନ ସକାଳେ ପତ୍ନୀ ବିଛଣାରେ ଅଚେତ ଅବସ୍ଥାରେ ପଡ଼ିଥିଲେ। ଯେତେବେଳେ ତାଙ୍କ ସ୍ୱାମୀ ତାଙ୍କୁ ଚିକିତ୍ସା ପାଇଁ ଡାକ୍ତରଙ୍କ ନିକଟକୁ ନେଇଥିଲେ, ସେତେବେଳେ ଜଣାପଡିଥିଲା ଯେ ସେ ମଦ୍ୟପାନ କରିବା ସହିତ ଗୁଟଖା ସହିତ ନିଶାସକ୍ତ ଥିଲେ। ଯେତେବେଳେ ମହିଳାଙ୍କ ଶାଶୁମାନେ ଏହା ଜାଣିଲେ, ସେମାନେ ତାଙ୍କ ନିଶାରୁ ମୁକ୍ତି ପାଇବା ପାଇଁ ତାଙ୍କୁ ବିଭିନ୍ନ ଉପାୟରେ ମନାଇବା ପାଇଁ ଚେଷ୍ଟା କରିଥିଲେ, କିନ୍ତୁ ମହିଳା ଜଣକ ତାଙ୍କ ମଦ୍ୟପାନ ଛାଡିବାକୁ ମନା କରିଦେଇଥିଲେ।
ଏହା ପରେ ସେ ତାଙ୍କ ଶାଶୁମାନଙ୍କ ସହିତ ଯୁକ୍ତିତର୍କ ଆରମ୍ଭ କରିଥିଲେ। ଗୁରୁତ୍ୱପୂର୍ଣ୍ଣ କଥା ହେଉଛି, ଗୁଟଖା ଖାଇବା ପରେ ମହିଳା ଜଣକ ଶୋଇବା ଘରର ଯେକୌଣସି ସ୍ଥାନରେ ଛେପ ପକାଉଥିଲେ ଏବଂ ଏଥିପାଇଁ ତାଙ୍କୁ ଅଟକାଇବା ସମୟରେ ସ୍ୱାମୀଙ୍କ ସହ ଝଗଡା କରୁଥିଲେ। ମହିଳାଙ୍କ ଏପରି ଆଚରଣରେ ଥକି ଯାଇ ସ୍ୱାମୀ ଛାଡପତ୍ର ପାଇଁ ଆବେଦନ କରିଥିଲେ।
ଏହି ଆବେଦନରେ କୁହାଯାଇଛି ଯେ ମହିଳା ମଧ୍ୟ ଡିସେମ୍ବର ୩୦, ୨୦୧୫ ରେ ଆତ୍ମହତ୍ୟା ଉଦ୍ୟମ କରିଥିଲେ। ଏଥିପାଇଁ ସେ ଦୁଇଥର ଛାତରୁ ଡେଇଁପଡିଥିଲେ ଏବଂ ପରେ ଦୁଇଥର କୀଟନାଶକ ପିଇଥିଲେ। ତେବେ ସେହି ସମୟରେ ସେ ବଞ୍ଚି ଯାଇଥିଲେ।
ପତ୍ନୀଙ୍କ ଆଚରଣ ଯୋଗୁଁ ଘଟିଥିବା ମାନସିକ ଯନ୍ତ୍ରଣାକୁ ନେଇ ସ୍ୱାମୀ ପରିବାର କୋର୍ଟରେ ଛାଡପତ୍ର ପାଇଁ ଆବେଦନ କରିଥିଲେ। କିନ୍ତୁ ସ୍ୱାମୀ ଆବେଦନକୁ ପରିବାର କୋର୍ଟ ପ୍ରତ୍ୟାଖ୍ୟାନ କରିଥିଲେ। ପରେ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ସ୍ୱାମୀ ହାଇକୋର୍ଟରେ ଆବେଦନ କରିଥିଲେ। ବର୍ତ୍ତମାନ ହାଇକୋର୍ଟର ଏକ ଦୁଇ ଜଣିଆ ଖଣ୍ଡପୀଠ ପରିବାର କୋର୍ଟଙ୍କ ଆଦେଶକୁ ଖାରଜ କରି ସ୍ୱାମୀଙ୍କ ଛାଡପତ୍ର ଆବେଦନକୁ ଅନୁମତି ଦେଇଛନ୍ତି।
Comments are closed.