ଭୁବନେଶ୍ୱର: ଯୁକ୍ତ ଦୁଇ ବା ପ୍ଲସ୍ ଟୁ ପରୀକ୍ଷାକୁ ଆଉ ମାତ୍ର ତିନି ଦିନ ବାକି ରହିଛି। ହେଲେ ଏବେ ବି ୬୬୨ ବର୍ଗର କଲେଜର ଅଧ୍ୟାପକମାନେ ଭୁବନେଶ୍ୱର ଲୋୟର ପିଏମଜିରେ ଆନ୍ଦୋଳନ କରୁଛନ୍ତି। ତେଣୁ ଛାତ୍ରଛାତ୍ରୀ ଓ ଅଭିଭାବକମାନେ ଚିନ୍ତାରେ ପଡ଼ିଯାଇଛନ୍ତି।
ଚଳିତ ବର୍ଷ ପ୍ରାୟ ୩.୫ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେବାକୁ ଯାଉଛନ୍ତି। ସେଥିମଧ୍ୟରୁ ୬୬୨ ବର୍ଗର କଲେଜରେ ପ୍ରାୟ ୨ ଲକ୍ଷ ଛାତ୍ରଛାତ୍ରୀ ଏକାକୀ ପଢ଼ୁଛନ୍ତି। ମାର୍ଚ୍ଚ ୧ ତାରିଖରୁ ସେମାନଙ୍କ ପରୀକ୍ଷା ଆରମ୍ଭ ହେବ। ଏପରି ସ୍ଥିତିରେ ଯେଉଁ ଅଧ୍ୟାପକମାନେ ପରୀକ୍ଷା ପରିଚାଳନା କରିବେ ସେମାନେ ‘ସମାନ ଗ୍ରେଡକୁ, ସମାନ ଦରମା’ ଦାବି ନେଇ ଭୁବନେଶ୍ୱରରେ ଧାରଣାରେ ବସିଛନ୍ତି। ୬୬୨ ବର୍ଗ ଶିକ୍ଷକ ସଙ୍ଘ ବ୍ୟାନରରେ ଶିକ୍ଷକମାନେ ଆନ୍ଦୋଳନ ଆରମ୍ଭ କରିବାର ୧୩ ଦିନ ବିତିଛି। ଛାତ୍ରଛାତ୍ରୀଙ୍କ ପରୀକ୍ଷା ଓ ମୂଲ୍ୟାୟନରେ ଅଂଶଗ୍ରହଣ କରିବେ ନାହିଁ ବୋଲି ଆନ୍ଦୋଳନରତ ଶିକ୍ଷକମାନେ ଚେତାବନୀ ଦେଇଛନ୍ତି। ଆଶ୍ଚର୍ଯ୍ୟର କଥା ଏଯାଏଁ ସରକାର ସେମାନଙ୍କୁ ଆଲୋଚନା ପାଇଁ ଡାକି ନାହାନ୍ତି।
ମନ୍ତ୍ରୀ କିମ୍ବା ତାଙ୍କ ସଚିବ ଏବଂ ମୁଖ୍ୟ ସଚିବ ଆଲୋଚନା ପାଇଁ ଆମ ପାଖକୁ ଆସି ନାହାନ୍ତି। ପ୍ଲସ୍ ଟୁ ଛାତ୍ରଛାତ୍ରୀଙ୍କ ମଧ୍ୟରୁ ୭୨ ପ୍ରତିଶତ ୬୬୨ ବର୍ଗର କଲେଜରେ ପଢ଼ୁଛନ୍ତି। ସାଧାରଣତଃ ଆନ୍ଦୋଳନରତ ଶିକ୍ଷକମାନେ ପରୀକ୍ଷାକୁ ନିୟନ୍ତ୍ରଣ କରିଥାନ୍ତି। ଯଦି ସେମାନେ ପରୀକ୍ଷାରୁ ଦୂରେଇ ରୁହନ୍ତି ତେବେ ପରୀକ୍ଷା ପରିଚାଳନାରେ ବିଶୃଙ୍ଖଳା ସୃଷ୍ଟି ହେବାର ସମ୍ଭାବନା ଅଧିକ ବୋଲି ସଙ୍ଘର ସଭାପତି ଗୋଲକ ନାୟକ କହିଛନ୍ତି। ଯଦି ସରକାର ଠୋସ୍ ନିଷ୍ପତ୍ତି ନ ନିଅନ୍ତି ତେବେ ପ୍ରଥମେ ପରୀକ୍ଷା ଓ ପରେ ମୂଲ୍ୟାୟନକୁ ବର୍ଜନ କରାଯିବ ବୋଲି ଗୋଲକ ନାୟକ ଚେତାବନୀ ଦେଇଛନ୍ତି।
ଅପରପକ୍ଷରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ଛାତ୍ରଛାତ୍ରୀଙ୍କ ଭୟକୁ ପ୍ରଶମିତ କରିବାକୁ ଚେଷ୍ଟା କରି କହିଛନ୍ତି ଯେ କୌଣସି ଅସୁବିଧା ହେବ ନାହିଁ। ଏନେଇ ସମସ୍ତ ପ୍ରସ୍ତୁତି ଶେଷ ପର୍ୟ୍ୟାୟରେ ପହଞ୍ଚିଛି। ପ୍ରଶ୍ନପତ୍ରଗୁଡ଼ିକୁ ପ୍ରଶ୍ନ କେନ୍ଦ୍ରକୁ ପଠାଯାଇସାରିଛି। ଛାତ୍ରଛାତ୍ରୀଙ୍କ ସ୍ୱାର୍ଥ ପାଇଁ ଆନ୍ଦୋଳନରତ ଶିକ୍ଷକମାନଙ୍କୁ ଆନ୍ଦୋଳନରୁ ଓହରିବାକୁ ସେ ଅନୁରୋଧ କରିଛନ୍ତି। ସେମାନଙ୍କ ସମସ୍ୟା ସମ୍ପର୍କରେ ଆଲୋଚନା କରାଯାଇ ସମାଧାନ କରାଯିବ ବୋଲି ମନ୍ତ୍ରୀ କହିଛନ୍ତି।
Comments are closed.