ସ୍ୱିଜରଲ୍ୟାଣ୍ଡ: ଯେତେବେଳେ ଜଣେ ଗାୟକ କିମ୍ବା ସଂଗୀତକାର ଗିଟାର ବଜାଉଥିବାର ଦେଖିବେ, ଆପଣ ମଧ୍ୟ ତାଙ୍କ ପରି ଏହାକୁ ବଜାଇବା ଭଳି ଅନୁଭବ କରିବେ । ଆଜିର ଯୁବପିଢୀ ଗିଟାର ପ୍ରତି ଅଧିକ ଆଗ୍ରହ ଦେଖାଉଛନ୍ତି । ଅନେକ ଗିଟାରକୁ ଘରେ ମଧ୍ୟ ରଖିଥାନ୍ତି । କିନ୍ତୁ ଦୁନିଆରେ ଏପରି ଏକ ଗିଟାର ଅଛି, ଯାହାକୁ କେହି ବଜାଇ ନଥିଲେ ମଧ୍ୟ ଦେଖିବା ପାଇଁ ଭିଡ଼ ଜମାଇଥିବେ । ଆମେ ଦୁନିଆର ସବୁଠୁ ଦାମୀ ଗିଟାର ବିଷୟରେ କହୁଛୁ, ଯାହାର ମୂଲ୍ୟ ଜାଣିଲେ ଆପଣ ଆଶ୍ଚର୍ଯ୍ୟ ହେବା ସ୍ୱଭାବିକ ।
ଅନ୍ଲାଇନ୍ରେ ୪ ହଜାରରୁ ୧୦ ହଜାର ପର୍ଯ୍ୟନ୍ତ ଏକ ସାଧାରଣ ଗିଟାର ଉପଲବ୍ଧ ରହିଛି । ଆହୁରି ଅଧିକ ଦାମୀ ଗିଟାର ମଧ୍ୟ ବଜାରରେ ମିଳିଥାଏ । କିନ୍ତୁ ଆପଣ କେବେ ଚିନ୍ତା କରିଛନ୍ତି କି ଦୁନିଆର ସବୁଠୁ ଦାମୀ ଗିଟାରର ମୂଲ୍ୟ କେତେ? ଏହା ଏତେ ମହଙ୍ଗା ଯେ ସେହି ପରିମାଣର ଅର୍ଥରେ ଘର, କାର, ପୋଷାକ, ଖାଦ୍ୟ କିଣିହେବ । ଏତେ ଖର୍ଚ୍ଚ କଲା ପରେ ବି ଆହୁରି ଟଙ୍କା ବଳକା ରହିଯିବ । ଏହି ଗିଟାରର ନାମ ହେଉଛି ଇଡ଼େନ୍ ଅଫ କରୋନେଟ । ସ୍ୱିଜରଲ୍ୟାଣ୍ଡ ବେସେଲର ଆରୋନ ଶୁମ୍ ନାମକ ଜଣେ ବ୍ୟକ୍ତି ଏହି ଗିଟାର ତିଆରି କରିଛନ୍ତି । ଏହା ୨୦୧୫ ମସିହା ମାର୍ଚ୍ଚ ୧୬ ତାରିଖରେ ତିଆରି କରାଯାଇଥିଲା । ସବୁଠାରୁ ମହଙ୍ଗା ଗିଟାର ଭାବେ ଏହା ଗିନିଜ୍ ୱାର୍ଲ୍ଡ ରେକର୍ଡ ମଧ୍ୟ କରିଛି ।
ବାସ୍ତବରେ, ଏହି ଗିଟାରରେ ୧୧, ୪୪୧ ହୀରା ଖଞ୍ଜାଯାଇଛି । ଏହା ସହିତ ୧୮ କ୍ୟାରେଟ୍ ସୁନା ମଧ୍ୟ ବ୍ୟବହୃତ ହୋଇଛି । ଯାହାର ଓଜନ ୧.୬୩୭ କିଲୋଗ୍ରାମ ରହିଛି । ଏହି ଗିଟାରକୁ ୬୮ ଜଣ ଲୋକ ତିଆରି କରିଥିଲେ । ଏଥିଲାଗି ସେମାନଙ୍କୁ ୭୦୦ ଦିନ ସମୟ ଲାଗିଥିଲା । ଏହି ଗିଟାରର ମୂଲ୍ୟ ରହିଛି ୧୬ କୋଟି ଟଙ୍କା । ଅଳଙ୍କାର ଡିଜାଇନର୍ ଆରୋନ ଶୁମ୍ ଏବଂ ସଂଗୀତଜ୍ଞ ବା ଡିଜାଇନର୍ ମାର୍କ ଲିୟୁଙ୍କ ସହଯୋଗରେ ଗିବସନ୍ କମ୍ପାନୀ ଦ୍ୱାରା ଏହି ଗିଟାର ତିଆରି କରାଯାଇଛି । ଏଥିରେ ଏତେ ପରିମାଣର ହୀରା ଖଞ୍ଜା ଯାଇଥିଲେ ବି ଏହାକୁ ସହଜରେ ବଜାଯାଇପାରିବ । ଏହା ପ୍ରଥମେ ସ୍ୱିସ୍ ବେସେଲ ୱାଲର୍ଡ ପ୍ରଦର୍ଶନୀରେ ପ୍ରଦର୍ଶିତ କରାଯାଇଥିଲା । ଏଥିସହିତ ଏହି ଗିଟାର ବିଭିନ୍ନ ପ୍ରଦର୍ଶନୀରେ ମଧ୍ୟ ପ୍ରଦର୍ଶିତ କରାଯାଇଛି ।
