ଟାଙ୍ଗୀ : ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ପୁଲିସ ଚିଲିକା ବ୍ଲକ୍ ଅଧ୍ୟକ୍ଷାଙ୍କ ସ୍ୱାମୀ ଯିଏକି ଜଣେ ଠିକାଦାର ତାଙ୍କ ବିରୋଧରେ ଆଇପିସିର ଧାରା ୪୨୦ରେ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବ୍ଲକ୍ ଉନ୍ନୟନ ଅଧିକାରୀ (ବିଡିଓ)ଙ୍କ ଦସ୍ତଖତ ଜାଲିଆତି କରି ଠିକାଦାର ୧୫ ଲକ୍ଷ ଟଙ୍କାର ସିକ୍ୟୁରିଟି ଡିପୋଜିଟ୍ ଉଠାଇ ନେଇଥିବା ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, ପୂର୍ବତନ ଜିଲ୍ଲା ପରିଷଦ ସଭ୍ୟ ତଥା ପେଶାରେ ଜଣେ ଠିକାଦାର କିଶୋର ବେହେରା ଏକ ନିର୍ମାଣ ପ୍ରକଳ୍ପ ପାଇଁ ଚୁକ୍ତି କରିଥିଲେ, ଯେଉଁଥିରେ ସେ ସିକ୍ୟୁରିଟି ମନି ବାବଦକୁ ୧୫ ଲକ୍ଷ ଟଙ୍କା ଦେଇଥିଲେ। ଚୁକ୍ତି ଅନୁୟାୟୀ କାମ ସରିବା ପରେ ଜମା ଟଙ୍କା ତାଙ୍କୁ ଫେରସ୍ତ ଦିଆଯିବାର ଥିଲା।
ତେବେ ଟାଙ୍ଗୀ ବ୍ଲକ୍ ଉନ୍ନୟନ ଅଧିକାରୀ (ବିଡିଓ)ଙ୍କ ଦସ୍ତଖତ ଓ ସରକାରୀ ଚିଠିକୁ ଜାଲିଆତି କରି କିଶୋର ବେହେରା ନିର୍ଦ୍ଧାରିତ କାମ ଶେଷ କରିବା ପୂର୍ବରୁ ଜମା ଟଙ୍କା ଉଠାଇ ନେଇଥିବା ଅଭିଯୋଗ ହୋଇଛି। ଏହି ଜାଲିଆତି ଘଟଣା ସେତେବେଳେ ସାମ୍ନାକୁ ଆସିଥିଲା ଯେତେବେଳେ ବିଡିଓ ଏହି ଜାଲିଆତିକୁ ଠାବ କରିଥିଲେ।
ଟାଙ୍ଗୀ ବିଡିଓ ତୁରନ୍ତ ଟାଙ୍ଗୀ ଥାନାରେ ଏତଲା ଦେବା ସହ କିଶୋର ବେହେରା କରିଥିବା ଜାଲିଆତି ସମ୍ପର୍କରେ ଆଲୋକପାତ କରିଥିଲେ। ଏହି ଅଭିଯୋଗ ଆଧାରରେ ପୁଲିସ ତାଙ୍କ ବିରୋଧରେ ଆଇପିସିର ଧାରା ୪୨୦ ଅନୁଯାୟୀ ଠକେଇ ଏବଂ ଅସାଧୁ ଉପାୟରେ ସମ୍ପତ୍ତି ହସ୍ତାନ୍ତର କରିବା ଅଭିଯୋଗରେ ମାମଲା ରୁଜୁ କରିଛି।
ରିପୋର୍ଟ ଲେଖାଯିବା ବେଳକୁ କିଶୋର ବେହେରା ଓ ଟାଙ୍ଗୀ ବିଡିଓଙ୍କ ପ୍ରତିକ୍ରିୟା ମିଳିପାରିନାହିଁ। ତେବେ ଉଭୟ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଦିଗନ୍ତ ରାଉତରାୟ ଓ ଟାଙ୍ଗୀ ଥାନା ଇନ୍ସପେକ୍ଟର କିଶୋର ବେହେରାଙ୍କ ନାଁରେ ମାମଲା ରୁଜୁ ହୋଇଥିବା ସ୍ପଷ୍ଟ କରିଛନ୍ତି।
Comments are closed.