ଥିରୁଅନନ୍ତପୁରମ: ୟୁପିଏସସି ପରୀକ୍ଷା ଫଳ ପ୍ରକାଶନ ପରେ ପରେ ଅନେକ ରୋଚକ କାହାଣୀ ସାମ୍ନାକୁ ଆସିଥାଏ । ସେଥିରୁ କେତେକ ଘଟଣା ପ୍ରେରଣାଦାୟୀ ହୋଇଥିବା ବେଳେ ମିଳିଥାଏ ଅନେକ ଶିକ୍ଷା । ଏଭଳି ଏକ ପ୍ରେରଣାଦାୟକ କାହାଣୀ ହେଉଛି କୁରିଚିୟା ଆଦିବାସୀ ଝିଅ ଶ୍ରୀଧନ୍ୟା ସୁରେଶଙ୍କର । ବାପା ଦିନ ମଜୁରିଆ ହୋଇଥିବାରୁ ଶିକ୍ଷା ଓ ପରବର୍ତ୍ତୀ ପ୍ରତିଯୋଗିତା ମୂଳକ ପରୀକ୍ଷାରେ ସେ ଆବଶ୍ୟକୀୟ ଖର୍ଚ୍ଚ ଭରଣା କରିପାରୁନଥିଲେ । ଯେଉଁଦିନ ଭାରତୀୟ ପ୍ରଶାସନିକ ସେବା ପରୀକ୍ଷାଫଳ ପ୍ରକାଶିତ ହେଲା ସେଦିନ ଶ୍ରୀଧନ୍ୟାଙ୍କ ଆଖିରୁ ଝରି ପଡିଥିଲା କେଇ ବୁନ୍ଦା ଆନନ୍ଦର ଅଶ୍ରୁ । ଏମିତି ସମୟ ଥିଲା ଯେବେ ଶ୍ରୀଧନ୍ୟା ତାଙ୍କ ସାଙ୍ଗ ମାନଙ୍କ ଠାରୁ ଟଙ୍କା ଧାର ନେଇ ୟୁପିଏସସି ସାକ୍ଷାତକାରକୁ ଯାଇଥିଲେ ।
କେରଳର ଥିରୁଅନନ୍ତପୁରମରେ ଜନ୍ମ ହୋଇଥିଲେ ଶ୍ରୀଧନ୍ୟା । ଶ୍ରୀଧନ୍ୟାଙ୍କ ପରିବାର ଆର୍ଥିକ ଅନଗ୍ରସର ଶ୍ରେଣୀର । ବାପା ଶ୍ରମିକ ଭାବେ କାମ କରନ୍ତି । ସମୟ ପାଇଲେ ଲୁହା ଉପକରଣ ନେଇ ବଜାରରେ ବିକ୍ରି କରନ୍ତି । ଏଭଳି ପ୍ରତିକୂଳ ପରିସ୍ଥିତିରେ ମଧ୍ୟ କଠିନ ପରିଶ୍ରମ କରିଚାଲିଥିଲେ ଶ୍ରୀଧନ୍ୟା । ୨୦୧୮ରେ ମିଳିଥିଲା ତାଙ୍କର ଏହି ମେହନତୀର ଫଳ । ସେହି ବର୍ଷ ୟୁପିଏସସିରେ ସେ ତୃତୀୟ ପ୍ରୟାସରେ ହୋଇଥିଲେ କୃତକାର୍ଯ୍ୟ । ସର୍ବଭାରତୀୟ ସ୍ତରରେ ତାଙ୍କୁ ୪୧୦ ତମ ସ୍ଥାନ ମିଳିଥିଲା । ଏହି ପରୀକ୍ଷାରେ ଉତ୍ତୀର୍ଣ୍ଣ ହେବାରେ ସେ ହେଉଛନ୍ତି କେରଳର ପ୍ରଥମ ଆଦିବାସୀ ମହିଳା ।
୨୦୧୬ ଏବଂ ୨୦୧୭ ୟୁପିଏସସି ପରିକ୍ଷାରେ ବିଫଳ ହୋଇଥିଲେ ଶ୍ରୀଧନ୍ୟା । କିନ୍ତୁ, ବିଚ୍ୟୁତ ହୋଇନଥିଲେ ଲକ୍ଷପଥରୁ । ବିଫଳତାକୁ ପଛରେ ପକାଇ ସେ ଆଗକୁ ବଢିଥିଲେ। କଠିନ ପରିଶ୍ରମ ଫଳରେ ଶେଷରେ ୨୦୧୮ରେ ଏହି ପରୀକ୍ଷାରେ ସଫଳତା ହାସଲ କରିଥିଲେ । ଯେତେବେଳେ ତୃତୀୟ ପ୍ରୟାସରେ ସେ ସାକ୍ଷାତକାର ପାଇଁ ଚୟନ ହୋଇଥିଲେ ତାଙ୍କ ପାଖରେ ଦିଲ୍ଲୀ ଆସିବା ପାଇଁ ଟଙ୍କା ନଥିଲା । ନିଜ ସାଙ୍ଗ ପାଖରୁ ସେ ଉଧାର କରି ଦିଲ୍ଲୀ ଆସିଥିଲେ ।
Comments are closed.