ନୂଆଦିଲ୍ଲୀ: ଭାରତୀୟ କୁସ୍ତି ମହାସଂଘର ନିର୍ବାଚନ ଅଗଷ୍ଟ ୧୨ ତାରିଖରେ ହେବ । ଏଥିନେଇ ସୋମବାର ଚୂଡାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇଛି । ପୂର୍ବତନ ରେସଲର କର୍ତାର ସିଂଙ୍କ ସମେତ ୪ ଉପସଭାପତି ଓ ୫ ପ୍ରାର୍ଥୀଙ୍କ ନାମ ରହିଛି । କର୍ତାର ୧୯୭୮ ଓ ୧୯୮୬ ଏସିଆନ ଗେମ୍ସରେ ଭାରତ ପାଇଁ ସ୍ୱର୍ଣ୍ଣ ପଦକ ଜିତିଥିଲେ । ଡବ୍ଲ୍ୟୁଏଫଆଇ ସେକ୍ରେଟାରୀ ଜେନେରାଲ ଭାବେ ମଧ୍ୟ ସେ ଦାୟିତ୍ୱ ତୁଲାଇ ସାରିଛନ୍ତି । ଉପ ସଭାପତି ପାଇଁ ବେଙ୍ଗଲର ଅସିତ କୁମାର ଶାହା, ଦିଲ୍ଲୀର ଜୟ ପ୍ରକାଶ, ମଧ୍ୟପ୍ରଦେଶର ମୋହନ ଯାଦବ ଓ ମଣିପୁରର ଏନ ଫୋନି ରହିଛନ୍ତି ।
ଅପରପକ୍ଷରେ ସଭାପତି ଦୌଡରେ ସଞ୍ଜୟ କୁମାର ସିଂ ଓ ଅନୀତା ଶେଓରାନଙ୍କ ମଧ୍ୟରେ ମୁକାବିଲା ହେବ । ରେସଲର ଦୁଷ୍କର୍ମ ମାମଲାରେ ସଭାପତି ପଦ ହରାଇଥିବା ବ୍ରିଜଭୂଷଣ ଶରଣ ସିଂଙ୍କ ଏକାନ୍ତ ଅନୁଗତ ଭାବେ ସଞ୍ଜୟଙ୍କୁ ବିଚାର କରାଯାଏ । ସେହିପରି ୨୦୧୦ ରାଜ୍ୟଗୋଷ୍ଠୀ କ୍ରୀଡା ସ୍ୱର୍ଣ୍ଣ ପଦକ ବିଜେତା ଅନୀତା ମଧ୍ୟ ତାଙ୍କ କଡା ଟକ୍କର ଦେବେ ବୋଲି ଅନୁମାନ କରାଯାଉଛି ।
Comments are closed.