ନ୍ୟୁୟର୍କ: ଆଜିକାଲି ଦୁନିଆରେ ଦିନକୁ ଦିନ ଅଜବ ଘଟଣା ସାମ୍ନାକୁ ଆସୁଛି । ଏଥିମଧ୍ୟରୁ କିଛି ସ୍ୱାଭାବିକ ମନେ ହୋଇଥାଏ । ଆଉ କିଛି ଏମିତି ଘଟଣା ଅଛି ଯାହା ବିଷୟରେ ଶୁଣିଲେ ଅଦ୍ଭୁତ ମନେ ହୋଇଥାଏ । ଆମେରିକାର କଲମ୍ବିଆରୁ ମଧ୍ୟ ଏଭଳି ଏକ ଘଟଣା ସାମ୍ନାକୁ ଆସିଛି । ଏଠାରେ ଜଣେ ମହିଳାଙ୍କ କାନରେ ଏପରି ଜୀବ ଏକ ପଶିଯାଇଥିଲା, ଯାହାକୁ ଦେଖିଲେ ଆପଣ ଭୟଭୀତ ହୋଇପଡ଼ିବେ । ସବୁଠୁ ବଡ଼କଥା, ମହିଳାଙ୍କ କାନରୁ ଏହି ଜୀବ ବାହାରକୁ ଆସିବା ପରେ ମଧ୍ୟ ଜୀବିତ ଥିଲା ।
ଅଧିକାଂଶ ଲୋକ ଅସରପା ଦେଖିଲେ ଭୟ କରିବା ସହ ଘୃଣା ମଧ୍ୟ କରିଥାନ୍ତି । ଏହାକୁ ଘରୁ ଦୂର କରିବା କଷ୍ଟକର ହୋଇଥାଏ । ଥରେ ଗୋଟେ ଅସରପା ଘରେ ପଶିଗଲେ ତାହା ବହୁତ ଶୀଘ୍ର ବଂଶବିସ୍ତାର କରିଦେଇଥାଏ । ସବୁ ଜିନିଷରେ ଏମାନେ ପଶିଯାଇଥାନ୍ତି । ସେଥିଲାଗି ଲୋକେ ଘରୁ ଅସରପାକୁ ହଟାଇବା ପାଇଁ ବିଭିନ୍ନ କୀଟନାଶକ ବ୍ୟବହାର କରିଥାନ୍ତି ।
ନିକଟରେ କଲମ୍ବିଆର ବାସିନ୍ଦା ହିଲାଙ୍କ କାନ ଯନ୍ତ୍ରଣା ଆରମ୍ଭ ହୋଇଥିଲା । ଧୀରେ ଧୀରେ ଏହି ଯନ୍ତ୍ରଣା ଅସହ୍ୟ ହୋଇପଡ଼ିଲା । କାନରେ କିଛି ପଶିଯାଇଥିବା ଅନୁଭବ କଲେ । ପରେ ସେ ତାଙ୍କ ବନ୍ଧୁଙ୍କୁ ଏ ବିଷୟରେ କହିଲେ । ତାଙ୍କ ବନ୍ଧୁ କାନରେ ଲାଇଟ୍ ପକାଇ ଦେଖିବାରୁ ଭିତରେ କିଛି ଜୀବ ଥିବା ଜାଣିବାକୁ ପାଇଲେ । ଶେଷରେ, ସେ ଏକ ଟ୍ୱିଜର ସାହାଯ୍ୟରେ ହିଲାଙ୍କ ବାମ କାନ ଭିତରୁ ଏହି ଜୀବକୁ ବାହାର କରିବାରେ ସକ୍ଷମ ହୋଇଥିଲେ । ଏହା ଏକ ଅସରପା ଥିଲା । ସବୁଠୁ ଆଶ୍ଚର୍ଯ୍ୟକର କଥା, ହିଲାଙ୍କ କାନ ଭିତରେ ଅସରପାଟି ପଶିଥିଲେ ମଧ୍ୟ ବାହାରକୁ କାଡ଼ିବା ପରେ ତାହା ଜୀବିତ ଥିବା ଦେଖିବାକୁ ମିଳିଥିଲା ।
ଲୋକଙ୍କ କାନରେ କୌଣସି ଜୀବ ପଶିଯିବା ନୂଆ କଥା ନୁହେଁ, କିନ୍ତୁ ଅସରପା କାନରେ ପ୍ରବେଶ କରିବା ଘଟଣା ପ୍ରଥମ ବୋଲି କୁହାଯାଉଛି । ପୂର୍ବରୁ ଜଣେ ମହିଳାଙ୍କ କାନରେ ଏକ ସ୍ପାଇଡର ପଶିଯାଇଥିବା ଏକ ଭିଡିଓ ଭାଇରାଲ ହୋଇଥିଲା । କେବଳ ଏତିକି ନୁହେଁ, ମହିଳାଙ୍କ କାନରେ ସାପ ପଶିଯାଇଥିବା ନଜିର ରହିଛି । ଏବେ ଜୀବନ୍ତ ଅସରପା କାନ ବାହାରକୁ ଆସିବା ପରେ ଲୋକମାନେ ଆଶ୍ଚର୍ଯ୍ୟ ହୋଇଯାଇଛନ୍ତି । ଆଉ କହିଛନ୍ତି ଯେ, ଏହା କାନ ଭିତରେ ଅଣ୍ଡା ଦେଇଛି କି ନାହିଁ , ତାହା ଯାଞ୍ଚ କରିବା ଆବଶ୍ୟକ ।
Comments are closed.