କେନ୍ଦ୍ରାପଡା:ରାସ୍ତାରେ ଶୁଖୁଥିଲା ବାଣ । ଏହି ବାଣ ଉପରେ ଚଢିଗଲା କାର । ଭୟଙ୍କର ବିସ୍ଫୋରଣରେ ଛିନଛତ୍ର ହୋଇଗଲା କାର । ଭିତରେ ବସିଥିବା ଯୁବ ଡାକ୍ତରଙ୍କ ଅବସ୍ଥା ମଧ୍ୟ ଗୁରୁତର ହୋଇପଡିଛି । ଏମିତି ଘଟଣା ଆଜି ଘଟିଛି କେନ୍ଦ୍ରାପଡା ଜିଲ୍ଲା ଭରତପୁର ଖଣ୍ଡିଆବନ୍ଧି ଗାଁରେ । ଗୁରୁତର ଅବସ୍ଥାରେ ଡାକ୍ତରଙ୍କୁ କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଯାଇଛି । ଆହତ ଡାକ୍ତର ହେଲେ ୨୮ ବର୍ଷୀୟ ସୁଜିତ ସାମଲ ।
କେନ୍ଦ୍ରାପଡା ମେଡିକାଲରେ କାର୍ଯ୍ୟରତ ସୁଜିତ ତାଙ୍କର ହୋଣ୍ଡା କାରରେ ଆଜି ସକାଳ ୧୦ଟାରେ ଭରତପୁର ଖଣ୍ଡିଆ ବନ୍ଧୀ ଗାଁ ରାସ୍ତାରେ ଯାଉଥିଲେ । ତାଙ୍କର କଟକ ଯିବାର ଥିଲା । ହେଲେ ରାସ୍ତାରେ ବାଣ ଶୁଖା ଯାଇଥିବା ସେ ଜାଣି ନ ଥିଲେ । ବାଣ ଉପରେ ତାଙ୍କ କାର ମାଡି ଯାଇଥିଲା । ଫଳରେ ଭୟଙ୍କର ବିସ୍ଫୋରଣ ହେବା ସହ ତାଙ୍କ ଗାଡ଼ିର ସାମ୍ନାପଟ ସମ୍ପୂର୍ଣ୍ଣ ନଷ୍ଟ ହୋଇ ଯାଇଥିଲା ଏବଂ ଗାଡିରେ ନିଆଁ ବି ଲାଗି ଯାଇଥିଲା ।
ବିସ୍ଫୋରଣରେ ସୁଜିତଙ୍କ ମୁଣ୍ଡ, ହାତ ଓ ଛାତିରେ ଆଘାତ ଲାଗିଛି । ତାଙ୍କୁ କଟକ ସ୍ଥାନାନ୍ତର କରାଯାଇଛି । ଏପଟେ ବାଣ ଶୁଖାଇଥିବା ବ୍ୟକ୍ତି ଏହି ଘଟଣା ପରେ ଫେରାର ହୋଇ ଯାଇଛନ୍ତି ।
Comments are closed.