ଆପାର୍ଟମେଣ୍ଟରୁ ଅଭିନେତ୍ରୀଙ୍କ ମୃତଦେହ ଉଦ୍ଧାର; ଦିନକ ପୂର୍ବରୁ ଇନଷ୍ଟାରେ କରିଥିଲେ ଭିଡିଓ ସେୟାର

ଥିରୁଅନନ୍ତପୁରମ:ମଲାୟାଲମ ଅଭିନେତ୍ରୀ ରେଞ୍ଜୁସା ମେନନଙ୍କ ମୃତଦେହ ତାଙ୍କ ଫ୍ଲାଟର ବେଡରୁମରୁ ସୋମବାର ଉଦ୍ଧାର କରାଯାଇଛି । ୩୫ ବର୍ଷୀୟ ଅଭିନେତ୍ରୀ ରେଞ୍ଜୁସା ସ୍ୱାମୀ ମନୋଜଙ୍କ ସହ କାରିୟାମର ଏକ ଆପାର୍ଟମେଣ୍ଟରେ ରହୁଥିଲେ । ତାଙ୍କର ସ୍ୱାମୀ ମଧ୍ୟ ଜଣେ ଅଭିନେତା । ସ୍ୱାମୀଙ୍କ ବ୍ୟତୀତ ତାଙ୍କ ବାପା ସିଜି ରବୀନ୍ଦ୍ରନାଥ ଏବଂ ମା ଉମାଦେବୀ ମଧ୍ୟ ରହୁଥିଲେ ।
ପ୍ରାଥମିକ ସୂଚନା ଅନୁଯାୟୀ, ଅଭିନେତ୍ରୀ ରଞ୍ଜୁସା ଆତ୍ମହତ୍ୟା କରିଥିବା ଅନୁମାନ କରାଯାଉଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରାଯାଇଛି ।
ତେବେ କୁହାଯାଉଛି, ଅଭିନେତ୍ରୀ କିଛି ମାସ ହେବ ଆର୍ଥିକ ସଙ୍କଟ ଦେଇ ଗତି କରୁଥିଲେ । ମୃତ୍ୟୁର ଦିନକ ପୂର୍ବରୁ ସେ ସୋସିଆଲ ମିଡିଆରେ ଶେଷ ପୋଷ୍ଟ କରିଥିଲେ । ତାଙ୍କର ସହ-ଅଭିନେତ୍ରୀ ଶ୍ରୀଦେବୀ ଅନିଲଙ୍କ ସହ ଏକ ଫନି ଭିଡଓ ତାଙ୍କ ଇନଷ୍ଟାରେ ସେୟାର କରିଥିଲେ ।
ତାଙ୍କର ଅଚାନକ ମୃତ୍ୟୁ ପରିବାର ଏବଂ ଆତ୍ମୀୟ ସ୍ୱଜନଙ୍କୁ ଶକ୍ତ ଧକ୍କା ଦେଇଛି । କୋଚିର ମୂଳ ବାସିନ୍ଦା ରେଞ୍ଜୁସା ଟିଭିରେ ତାଙ୍କର କ୍ୟାରିୟର ଆରମ୍ଭ କରିଥିଲେ । ପରେ ସିଟି ଅଫ ଗଡ, ବମ୍ବେ ମାର୍ଚ୍ଚ, ୱାନ ୱେ ଟିକେଟ, କାର୍ଯ୍ୟସ୍ଥାନ ପରି ଅନେକ ଫିଲ୍ମରେ ଅଭିନୟ କରିଥିଲେ ।