ପୁଣି ଚୀନରେ ସମ୍ଭାବ୍ୟ ସ୍ବାସ୍ଥ୍ୟ ଜରୁରୀକାଳୀନ ପରିସ୍ଥିତି, ହସ୍ପିଟାଲରେ ଭର୍ତ୍ତି ହେଉଛନ୍ତି ଛୋଟ ପିଲା

ବେଜିଂ: କୋଭିଡ୍ ମହାମାରୀରୁ ଏବେ ବି ଆରୋଗ୍ୟ ଲାଭ କରିନଥିବା ଚୀନ୍ ଏବେ ଆଉ ଏକ ସମ୍ଭାବ୍ୟ ସ୍ବାସ୍ଥ୍ୟ ଜରୁରୀକାଳୀନ ପରିସ୍ଥିତିର ସମ୍ମୁଖୀନ ହୋଇଛି। ଏକ ରହସ୍ୟମୟ ନିମୋନିଆ ପ୍ରକୋପ ବେଜିଂ ଏବଂ ଲିଆଓନିଙ୍ଗ୍ ପ୍ରଦେଶର ସ୍କୁଲ୍ ଗୁଡ଼ିକରେ ଦେଖାଦେଇଛି।

କୋଭିଡ୍ ମହାମାରୀର ପ୍ରାରମ୍ଭିକ ପର୍ଯ୍ୟାୟରେ ଉଭୟ ପିଲା ଓ ଶିକ୍ଷକ ଅସୁସ୍ଥ ହୋଇପଡ଼ିଥିଲେ। ତେଣୁ ଏବେ ପୁଣିଥରେ ଛୋଟ ଛୁଆ ଅସୁସ୍ଥ ହେବା ସମାନ ଘଟଣାକୁ ମନେ ପକାଇ ଦେଉଛି। ସଙ୍କଟର ଗମ୍ଭୀରତାକୁ ଦେଖି ଅନେକ ସ୍କୁଲରେ ପାଠପଢ଼ା ବନ୍ଦ କରି ଦିଆଯାଇଛି।

ଆକ୍ରାନ୍ତ ପିଲାଙ୍କଠାରେ ଉଚ୍ଚ ଜ୍ୱର ଏବଂ ଫୁସଫୁସରେ ସମସ୍ୟା ଥିଲା ଭଳି ଲକ୍ଷଣ ଅନୁଭବ କରୁଛନ୍ତି। କିନ୍ତୁ ସେମାନଙ୍କଠାରେ କାଶ ନାହିଁ, ଯାହା ଇନଫ୍ଲୁଏଞ୍ଜା କିମ୍ବା ଅନ୍ୟାନ୍ୟ ଶ୍ୱାସକ୍ରିୟା ଭାଇରାଲ ରୋଗର ବୈଶିଷ୍ଟ୍ୟ ଅଟେ।

ବର୍ତ୍ତମାନ ସୁଦ୍ଧା ଏହାର କାରଣ ଜଣାପଡ଼ି ନାହିଁ, କିନ୍ତୁ ଚିହ୍ନଟ ହୋଇନଥିବା ନିମୋନିଆ ବିଷୟରେ ବିଶ୍ୱସ୍ତରୀୟ ରୋଗ ନିରୀକ୍ଷଣ ନେଟଓ୍ୱର୍କ ProMed ସତର୍କ ସୂଚନା ଜାରି କରିଛି। ଏହି ପ୍ରକୋପ ବୟସ୍କମାନଙ୍କୁ ପ୍ରଭାବିତ କରୁଥିବା ଲକ୍ଷ୍ୟ କରାଯାଇନାହିଁ। କିନ୍ତୁ ପିଲାଙ୍କ ମଧ୍ୟରେ ଏହାର ଦ୍ରୁତଭାବେ ବ୍ୟାପିବା ଏହା ବିଦ୍ୟାଳୟର ପରିବେଶ ସହିତ ଜଡିତ ହେବାର ସମ୍ଭାବନାକୁ ବଢ଼ାଇଛି।

ବିଶେଷକରି ଅକ୍ଟୋବର ଆରମ୍ଭରେ ଚୀନରେ ଜାତୀୟ ଦିବସ ଛୁଟି ପରଠାରୁ ଚୀନରେ ଡାକ୍ତରଖାନା ଗୁଡ଼ିକରେ ନିର୍ଣ୍ଣୟ ହୋଇନଥିବା ନିମୋନିଆ ରୋଗୀଙ୍କ ସଂଖ୍ୟା ବୃଦ୍ଧି ପାଇଥିବା ସୂଚନା ମିଳିଛି। ବର୍ତ୍ତମାନ ସୁଦ୍ଧା କୌଣସି ମୃତାହତର ସୂଚନା ମିଳିନାହିଁ, କିନ୍ତୁ ଏହି ମହାମାରୀ ସ୍ବାସ୍ଥ୍ୟ ବିଶେଷଜ୍ଞଙ୍କ ପାଇଁ ଚିନ୍ତାର କାରଣ ପାଲଟିଛି।

ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଚୀନରୁ ଶ୍ୱାସ ରୋଗ ବୃଦ୍ଧି ଏବଂ ଶିଶୁ ନିମୋନିଆ କ୍ଲଷ୍ଟର ବିଷୟରେ ଆନୁଷ୍ଠାନିକ ଭାବରେ ବିସ୍ତୃତ ତଥ୍ୟ ନେଉଛି।

ସେହିପରି ଚୀନରେ ଶ୍ୱାସ ରୋଗର ଆଶଙ୍କାକୁ ହ୍ରାସ କରିବା ପାଇଁ କିଛି ପଦକ୍ଷେପ ନେବାକୁ ହୁ’ ସୁପାରିଶ କରିଛି। ଯେପରିକି ଟିକା ନେବା, ଅସୁସ୍ଥ ଲୋକଙ୍କୁ ଦୂରେଇ ରଖନ୍ତୁ, ଅସୁସ୍ଥ ହେଲେ ଘରେ ରୁହନ୍ତୁ, ପରୀକ୍ଷା କରିବା ଏବଂ ଆବଶ୍ୟକ ସମୟରେ ଡାକ୍ତରୀ ଚିକିତ୍ସା ଗ୍ରହଣ କରିବା, ଆବଶ୍ୟକସ୍ଥଳେ ମାସ୍କ ପିନ୍ଧିବାକୁ କୁହାଯାଇଛି ପର୍ଯ୍ଯାପ୍ତ ପରିମାଣରେ ଘରେ ଭେଣ୍ଟିଲେସନ ସୁନିଶ୍ଚିତ କରିବା ଏବଂ ନିୟମିତ ହାତ ଧୋଇବାକୁ କୁହାଯାଇଛି ।