ଭୁବନେଶ୍ୱର: ସାଧାରଣ ଲୋକକଥା ଅଛି ‘ବ୍ରହ୍ମା ବିଳିବିଳି ହେଲେ ବେଦ’ କିନ୍ତୁ ବିଜୁ ଜନତା ଦଳର ମୁଖିଆ ନବୀନ ବାବୁ ଯାହା ବିଳିବିଳି ହୋଇ କୁହନ୍ତି ତାହା ସିଦ୍ଧ ବୋଲି ବିଜେଡି ବିଶ୍ୱାସ କରେ । ବାସ୍ତବତା ହେଉଛି କୌଣସିଥିରେ ବି ସିଦ୍ଧାନ୍ତରେ ପହଁଚିପାରନ୍ତି ନାହିଁ । ଏଥିପାଇଁ ସାରା ଦେଶରେ ଓଡ଼ିଶା ତଥା ଓଡ଼ିଶାବାସୀଙ୍କ ସମ୍ମାନହାନୀ ହୋଇଥାଏ । ଏପରି କହି ବିଜେଡି ଉପରେ ବର୍ଷିଛନ୍ତି ବୋଲି ବିଜେପି ରାଜ୍ୟ ମୁଖପାତ୍ର ମନୋଜ ମହାପାତ୍ର ।
ମନୋଜ ମହାପାତ୍ର ଆହୁରୀ କହିଛନ୍ତି ଯେ, ଗତକାଲି ନୂଆ ଜିଲ୍ଲା ଘୋଷଣା ନେଇ ମାନ୍ୟବର ହାଇକୋର୍ଟ ରାଜ୍ୟ ସରକାରଙ୍କ ଘୋଷଣା ଉପରେ ଅଙ୍କୁଶ ଲଗାଇଛନ୍ତି । ପଦ୍ମପୁର ନିର୍ବାଚନ ସମୟରେ ସେଠାକାର ଲୋକଙ୍କ ପାଖରୁ ଭୋଟ ହାତେଇବା ପାଇଁ “ପଦ୍ମପୁର”କୁ ଜିଲ୍ଲା ଘୋଷଣା କରିଥିଲେ ମୁଖ୍ୟମନ୍ତ୍ରୀ । ୨୦୨୩ ଡିସେମ୍ବର ସୁଦ୍ଧା ଜିଲ୍ଲା ହେବ କିନ୍ତୁ ଗତକାଲି ରାଇରଙ୍ଗପୁର ‘କ୍ରିୟାନୁଷ୍ଠାନର ପିଟିସନ’ ଉପରେ ରୋକ୍ ଲଗାଇଛନ୍ତି ମାନ୍ୟବର ହାଇକୋର୍ଟ । ମୁଖ୍ୟମନ୍ତ୍ରୀ କାହିଁକି ଏମିତି ନିଷ୍ପତି ନେଉଛନ୍ତି ଯାହାକି ପରବର୍ତ୍ତୀ ସମୟରେ ମାନ୍ୟବର କୋର୍ଟ ରୋକ୍ ଲଗାଉଛନ୍ତି । ମୁଖ୍ୟମନ୍ତ୍ରୀ ଜାଣିଶୁଣି “ଡାହାଣୀ ହୋଇ ଲାଗୁଛନ୍ତି ଓ ଗୁଣିଆ ହୋଇ ଝାଡୁଛନ୍ତି” ।
ଶ୍ରୀ ମହାପାତ୍ର କହିଛନ୍ତି ଯେ, ଏହା ପୂର୍ବରୁ କ୍ୟାବିନେଟ୍ରେ ଆଦିବାସୀ ଜମିକୁ ନେଇ ନିଷ୍ପତ୍ତି ନେଲେ ପରବର୍ତ୍ତୀ ସମୟରେ ତାକୁ ବଦଳାଇବାକୁ ପଡିଲା । ସେହିପରି ରତ୍ନଭଣ୍ଡାର ପ୍ରସଙ୍ଗରେ ମାନ୍ୟବର ହାଇକୋର୍ଟଙ୍କ ଦ୍ୱାରା ବାରମ୍ବାର ଭତ୍ସନା ଶୁଣିବାକୁ ପଡୁଛି । ୧୯୭୫ ମସିହାରେ ଜଷ୍ଟିସ ରାଜ କିଶୋର ଦାସ କମିଶନଙ୍କୁ ଅନୁସରଣ କରିଛନ୍ତି ନା ତାଙ୍କ ବାପା ବିଜୁ ବାବୁଙ୍କ ସମୟର ମନ୍ତ୍ରୀସ୍ତରୀୟ ସବ୍କମିଟି ଗଠନ ନିଷ୍ପତ୍ତି କୁ ଅନୁସରଣ କରିଛନ୍ତି? ମୁଖ୍ୟମନ୍ତ୍ରୀ କ’ଣ ସମ୍ବିଧାନରୁ ଊର୍ଦ୍ଧ୍ୱରେ କି ବୋଲି ସେ ପ୍ରଶ୍ନ କରିଛନ୍ତି ।
ବିଜୁ ଜନତା ଦଳ ଉତ୍ତର ରଖୁ ଯେ, ୨୦୨୩ ଡିସେମ୍ବର ସୁଦ୍ଧା ପଦ୍ମପୁରକୁ ନୂଆ ଜିଲ୍ଲା କରିପାରିବେ କି? ରାଇରଙ୍ଗପୁର, ଚଣ୍ଡିଖୋଲ, ଘୁମୁସର, କଣ୍ଟାବାଞ୍ଝି, ଟିଟିଲାଗଡ, କୁଚିଣ୍ଡା ଆଦି ଅନେକ ଅଞ୍ଚଳବାସୀ ଜିଲ୍ଲାଦାବି କରୁଛନ୍ତି । ସରକାର ଗମ୍ଭୀରତାର ସହ ସମସ୍ତ ଦାବିକୁ ଗ୍ରହଣ କରନ୍ତୁ । ଭୋଟ ହାତେଇବା ପାଇଁ ମନ୍ଦ ଉଦ୍ଦେଶ୍ୟ ରଖି ନିର୍ବାଚନ ସମୟରେ ମନଇଚ୍ଛା ଜିଲ୍ଲା ଗଠନର ପ୍ରତିଶ୍ରୁତି ଦେଇ ଚାଲିଛନ୍ତି । ଓଡ଼ିଶାବାସୀଙ୍କୁ ପ୍ରତାରଣା ଓ ବିଶ୍ୱାସଘାତକତା କରିବାରେ ସମସ୍ତ ସୀମା ଉଲଘଂନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି ଶ୍ରୀ ମହାପାତ୍ର କହିଛନ୍ତି ।
ଜିଲ୍ଲା ଗଠନ ସକାଶେ ଆନ୍ଧ୍ରରେ ନିଜସ୍ୱ ଆଇନ “ଆନ୍ଧ୍ର ଡିଷ୍ଟ୍ରିକ୍ଟ ଫର୍ମେସନ ଆପ୍” ଥିବାବେଳେ ଓଡ଼ିଶାରେ କାହିଁକି ନାହିଁ? ମୁଖ୍ୟମନ୍ତ୍ରୀ ନିଜର ଏବଂ ନିଜ ଦଳୀୟ ସ୍ୱାର୍ଥ ପାଇଁ ସବୁବେଳେ ଏଭଳି ଏକ ତରଫା ନିଷ୍ପତି ନିଅନ୍ତି, ଯାହାର ବାସ୍ତବ ରୂପ ଦେବା ତାଙ୍କ କ୍ଷମତା ବାହାରେ । ଫିତା ମାପିଲେ ଜିଲ୍ଲା ହୁଏ ନାହିଁ ବରଂ ସେଥିପାଇଁ ବିଧିବ୍ୟବସ୍ଥା ରହିଛି । କ’ଣ ପାଇଁ ମୁଖ୍ୟମନ୍ତ୍ରୀ ବିଧି ବ୍ୟବସ୍ଥାକୁ ଅନୁସରଣ ନକରି ମନଇଛା ନିଷ୍ପତି ଥୋପି ଦେଉଛନ୍ତି ତାହାର ଉତ୍ତର ରଖିବାକୁ ସେ ଦାବି କରିଛନ୍ତି ।
ଯଦି ମୁଖ୍ୟମନ୍ତ୍ରୀଙ୍କର ଜିଲ୍ଲା ଗଠନ କରିବା ପାଇଁ ଆନ୍ତରିକତା ଥାନ୍ତା ତାହାଲେ ଗତ ଶୀତକାଳୀନ ଅଧିବେଶନରେ ବିଧିବଦ୍ଧ ଆଇନ ଆଣିଥାନ୍ତେ । ଯଦି ତାଙ୍କର ଇଚ୍ଛାଶକ୍ତି ଅଛି ତାହେଲେ ଦଳୀୟ ରାଜନୀତିରୁ ଊର୍ଦ୍ଧ୍ୱକୁ ଉଠନ୍ତୁ । ବିଧାନସଭାର ସ୍ୱତନ୍ତ୍ର ଅଧିବେଶନ ଡାକି ଆଇନ ପ୍ରଣୟନ କରି ପଦ୍ମପୁର ସମେତ ଅନ୍ୟାନ୍ୟ ଅଞ୍ଚଳରେ ଯେଉଁ ଜିଲ୍ଲା ଗଠନ ଦାବି ହେଉଛି ସମସ୍ତଙ୍କୁ ନ୍ୟାୟଦେଇ ପାରନ୍ତେ । ବିଜେପି ସରକାରକୁ ଆସିଲେ ଜିଲ୍ଲା ଗଠନକୁ ଗୁରୁତର ସହ ବିଚାର କରି ଲୋକଙ୍କୁ ନ୍ୟାୟ ଦେବ ବୋଲି ଶ୍ରୀ ମହାପାତ୍ର କହିଛନ୍ତି ।
Comments are closed.