ନୂଆଦିଲ୍ଲୀ: ଆମ୍ ଆଦମୀ ପାର୍ଟି (ଆପ୍) ବିଧାୟକଙ୍କୁ ବିଜେପି କିଣିବାକୁ ଚେଷ୍ଟା କରୁଥିବା ଅଭିଯୋଗରେ ଦିଲ୍ଲୀ ପୁଲିସର କ୍ରାଇମବ୍ରାଞ୍ଚ ୟୁନିଟର ଏକ ଟିମ୍ ଶୁକ୍ରବାର ସନ୍ଧ୍ୟାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଵାଲଙ୍କ ବାସଭବନରେ ପହଞ୍ଚି ନୋଟିସ୍ ପ୍ରଦାନ କରିଛି।
ତେବେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ କ୍ରାଇମବ୍ରାଞ୍ଚ ଅଧିକାରୀମାନେ ନୋଟିସ୍ ନଦେଇ ଫେରାର ହୋଇ ଯାଇଛନ୍ତି।
ଜାନୁଆରୀ ୩୦ ତାରିଖରେ ବିଜେପିର ଏକ ପ୍ରତିନିଧି ଦଳ ପୁଲିସ କମିଶନରଙ୍କୁ ଭେଟି ବିଜେପି ଆପ୍ ବିଧାୟକଙ୍କୁ ପ୍ରଲୋଭିତ କରିଥିବା ନେଇ କେଜ୍ରିଓ୍ଵାଲଙ୍କ ବିଭ୍ରାନ୍ତିକର ଅଭିଯୋଗର ତଦନ୍ତ ଦାବି କରିବା ପରେ କ୍ରାଇମବ୍ରାଞ୍ଚ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି।ସ୍ୱତନ୍ତ୍ର ତଦନ୍ତକାରୀ ଟିମ୍ (ଏସଆଇଟି) ଦ୍ୱାରା ତଦନ୍ତ କରିବାକୁ ବିଜେପି ପ୍ରତିନିଧି ଦଳ ଦାବି କରିଛନ୍ତି।
ଗତ ସପ୍ତାହରେ ଏକ ସାମ୍ବାଦିକ ସମ୍ମିଳନୀରେ ଦିଲ୍ଲୀ ମନ୍ତ୍ରୀ ଆତିଶୀ ଅଭିଯୋଗ କରିଥିଲେ ଯେ ବିଜେପି ତାଙ୍କ ଦଳର ୭ ଜଣ ବିଧାୟକଙ୍କୁ ଦଳ ଛାଡିବା ପାଇଁ ୨୫ କୋଟି ଟଙ୍କା ଲେଖାଏଁ ପ୍ରସ୍ତାବ ଦେଇଛି ଏବଂ କେଜ୍ରିୱାଲ ସରକାରକୁ ଭାଙ୍ଗିବାକୁ ଧମକ ଦିଆଯାଇଛି।
ଦଳର ଜଣେ ବିଧାୟକଙ୍କ ସହ ଯୋଗାଯୋଗ କରିଥିବା ବ୍ୟକ୍ତିଙ୍କ ରେକର୍ଡିଂ ଉପଲବ୍ଧ ଅଛି ଏବଂ ପରେ ସାର୍ବଜନୀନ କରାଯିବ ବୋଲି ସେ ଦାବି କରିଛନ୍ତି।
ଏକ୍ସରେ ଏକ ପୋଷ୍ଟରେ କେଜ୍ରିୱାଲ ଦାବି କରିଛନ୍ତି ଯେ ତାଙ୍କ ଦଳର ୭ ଜଣ ବିଧାୟକଙ୍କୁ ବିଜେପି ଯୋଗାଯୋଗ କରିଛି ଏବଂ ତାଙ୍କୁ ଖୁବଶୀଘ୍ର ଗିରଫ କରାଯାଇପାରେ ବୋଲି ଚେତାବନୀ ଦିଆଯାଇଛି। ଆପ୍ ନେତା ଅଭିଯୋଗ କରିଛନ୍ତି ଯେ ଦିଲ୍ଲୀ ସରକାର ଭାଙ୍ଗିବା ପରେ ବିଧାୟକମାନଙ୍କୁ ନିର୍ବାଚନ ଲଢ଼ିବା ପାଇଁ ୨୫ କୋଟି ଟଙ୍କା ଏବଂ ବିଜେପି ଟିକେଟ୍ ଦେବାକୁ ପ୍ରତିଶ୍ରୁତି ଦିଆଯାଇଛି। କେଜ୍ରିୱାଲ ଆହୁରି ମଧ୍ୟ କହିଛନ୍ତି ଯେ ଆପର ସମସ୍ତ ସାତ ଜଣ ବିଧାୟକ ଦଳ ଛାଡ଼ିବାକୁ ମନା କରିଦେଇଛନ୍ତି।
ତେବେ ଦିଲ୍ଲୀ ବିଜେପି ଏହି ଅଭିଯୋଗକୁ ଖଣ୍ଡନ କରିବା ସହ ଆପକୁ ଚ୍ୟାଲେଞ୍ଜ କରିଛି ଯେ ବିଧାୟକଙ୍କ ସହ ଯୋଗାଯୋଗ କରିଥିବା ଲୋକଙ୍କ ନାମ ପ୍ରକାଶ କରାଯାଉ। ଦିଲ୍ଲୀ ବିଜେପି ସମ୍ପାଦକ ହରିଶ ଖୁରାନା କହିଛନ୍ତି ଯେ ମଦ ଦୁର୍ନୀତିରେ ପଚରାଉଚରା ପାଇଁ ଇଡି ସମନରେ କେଜ୍ରିୱାଲଙ୍କ ଠାରୁ ଆପ୍ ଧ୍ୟାନ ହଟାଇବାକୁ ଚେଷ୍ଟା କରୁଛି।
Comments are closed.