ଚଣ୍ଡିଗଡ ମେୟର ନିର୍ବାଚନ: ଦିଲ୍ଲୀ ବିଜେପି କାର୍ଯ୍ୟାଳୟ ଆଗରେ ଆପ୍ ର ଗର୍ଜନ ବେଳେ ଅଟକ ଦଳୀୟ ନେତା

ନୂଆଦିଲ୍ଲୀ:ଦିଲ୍ଲୀ ପହଁଚିଲା ଚଣ୍ଡିଗଡ ମେୟର ନିର୍ବାଚନ ମାମଲା। ବିଜେପି କାର୍ଯ୍ୟାଳୟ ଆଗରେ ଆପ୍ ର ଗର୍ଜନ। ଘେରାଉ ବେଳେ ଅଟକ ରହିଲେ ଦଳୀୟ ନେତା। ଶୁକ୍ରବାର ଚଣ୍ଡିଗଡ଼ ନିର୍ବାଚନରେ ହୋଇଥିବା ଠକେଇ ଅଭିଯୋଗରେ ଦିଲ୍ଲୀର ବିଜେପି ମୁଖ୍ୟାଳୟ ବାହାରେ ବିରୋଧ କରିବାକୁ ଘୋଷଣା କରିଥିଲା ଆମ୍ ଆଦମୀ ପାର୍ଟି। ତେବେ ପୋଲିସ ଏହି ପ୍ରଦର୍ଶନକୁ ଅନୁମତି ଦେଇନଥିଲା। ଏହି ବିକ୍ଷୋଭରେ ଯୋଗଦେବା ପାଇଁ ଦିଲ୍ଲୀର ମୁଖ୍ୟମନ୍ତ୍ରୀ ପହଞ୍ଚିଥିଲେ। ତାଙ୍କ ନେତୃତ୍ଵରେ କରାଯାଉଥିଲା ବିରୋଧ ପ୍ରଦର୍ଶନ। ଯେଉଁଥିରେ ପଞ୍ଜାବର ମୁଖ୍ୟମନ୍ତ୍ରୀ ଭଗବନ୍ତ ମନ ମଧ୍ୟ ସେଠାରେ ସାମିଲ୍ ହୋଇଥିଲେ। କିନ୍ତୁ ବିକ୍ଷୋଭକୁ ଦେଖି ଦିଲ୍ଲୀ ପୋଲିସ ସିନ୍ଧୁ ସୀମାରୁ ୨୫ ଜଣ ଆମ୍ ଆଦମୀ ପାର୍ଟି କର୍ମଚାରୀଙ୍କୁ ଅଟକ ରଖିଛି। ସେପଟେ ହରିୟାଣା ଆପ୍ ସଭାପତି ସୁଶୀଲ ଗୁପ୍ତାଙ୍କୁ ତାଙ୍କ ବାସଭବନରୁ ଦିଲ୍ଲୀ ପୋଲିସ ଗିରଫ କରିଛି।

ଗୋଟେ ପଟେ ଆପର ହଲ୍ଲା ବୋଲ ପରେ ଭାରତୀୟ ଜନତା ପାର୍ଟି ମଧ୍ୟ ଚୁପ୍ ବସିନି। ବିଜେପି ମଧ୍ୟ ଆପ୍ ବିରୋଧରେ ନିଜର ଆଭିମୁଖ୍ୟ ଖୋଲିଛି। ଦିଲ୍ଲୀ ସରକାର ଦୁର୍ନୀତି ଅଭିଯୋଗରେ ବିଜେପି କର୍ମୀମାନେ ରାସ୍ତାରେ ଯାଉଛନ୍ତି ଏବଂ ସ୍ଲୋଗାନ ଦେଉଛନ୍ତି।

ଏଥି ସହ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଦଳର ଜାତୀୟ ସଂଯୋଜକ ଅରବିନ୍ଦ କେଜ୍ରିୱାଲ ଟ୍ୱିଟରରେ ଲେଖିଛନ୍ତି ଯେ, ପ୍ରଥମେ ଚଣ୍ଡିଗଡ଼ ମେୟର ନିର୍ବାଚନରେ ଭୋଟ୍ ଲୁଟ୍ କରାଗଲା। ବର୍ତ୍ତମାନ ଶାନ୍ତିପୂର୍ଣ୍ଣ ଭାବେ ଏହାକୁ ବିରୋଧ କରିବାକୁ ଆସୁଥିବା ଲୋକମାନଙ୍କୁ ଦିଲ୍ଲୀରେ ଅଟକ ରଖାଯାଇଛି।

ଦିଲ୍ଲୀ ସରକାରର ଜଣେ ମନ୍ତ୍ରୀ କହିଛନ୍ତି, ‘ଚଣ୍ଡିଗଡ଼ର ମେୟର ନିର୍ବାଚନରେ ଖୋଲାଖୋଲି ଠକେଇ ହୋଇଥିଲା। ଦିଲ୍ଲୀରେ ବିଜେପି ବିରୋଧରେ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନ କରାଯାଉଥିଲା। କିନ୍ତୁ ଏହି ଶାନ୍ତିପୂର୍ଣ୍ଣ ବିରୋଧ ପୂର୍ବରୁ ଦିଲ୍ଲୀରେ ବ୍ୟାରିକେଡ୍ ଲଗାଯାଇଛି। ଆଜି ବିଜେପି ଏତେ ଭୟ କରୁଛି ଯେ ଗୋଟିଏ ପଟେ ସେମାନେ ନିର୍ବାଚନକୁ କଡାକଡି କରୁଛନ୍ତି ଏବଂ ଅନ୍ୟ ପଟେ ଦେଶରେ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନ ହୋଇପାରିବ ନାହିଁ। ବିଜେପି ଏତେ ଭୟଭୀତ କାହିଁକି?

ବିଜେପି ବିରୋଧରେ ଆପ୍ ର ପ୍ରତିବାଦରେ ଦିଲ୍ଲୀ ମନ୍ତ୍ରୀ ତଥା ଆପ୍ ନେତା ସୌରଭ ଭରଦ୍ୱାଜ କହିଛନ୍ତି, ‘ଚଣ୍ଡିଗଡ଼ ମେୟର ନିର୍ବାଚନରେ ବିଜେପି କିପରି ପ୍ରତାରଣା କରିଛି ତାହା ଦେଶ ଜାଣେ। ଏହି ପ୍ରତିବାଦ ପୂର୍ବରୁ ଆମ ବିଧାୟକ, କାଉନସିଲର ଏବଂ ଦଳୀୟ କର୍ମୀଙ୍କୁ ଦିଲ୍ଲୀର ବିଭିନ୍ନ ସ୍ଥାନରେ ଅଟକ ରଖାଯାଇଛି। ଅରବିନ୍ଦ କେଜ୍ରିୱାଲଙ୍କୁ ବିଜେପି ଏତେ ଭୟଭୀତ କରିଛି ଯେ ସେମାନେ ଏହି ବିରୋଧକୁ ଅନୁମତି ଦେଉ ନାହାଁନ୍ତି କି?

ତେବେ ବିକ୍ଷୋଭ ଓ ପାଲଟା ବିକ୍ଷୋଭ ଭିତରେ ପରିସ୍ଥିତିକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ପାଇଁ ସ୍ଥିତିକୁ ନିୟନ୍ତ୍ରଣ କରିବା କାଠିକର ପାଠ ହୋଇପଡ଼ିଥିଲା।