ଆଦର୍ଶ ଆଚରଣ ବିଧି ଲାଗୁ ପରେ ରାଜଧାନୀରୁ ହଟିଲା ସମସ୍ତ ସରକାରୀ ଓ ରାଜନୈତିକ ବିଜ୍ଞାପନ

ଭୁବନେଶ୍ୱର: ଚଳିତ ଲୋକସଭା ଓ ବିଧାନସଭା ନିର୍ବାଚନ ପାଇଁ ନିର୍ବାଚନ ତାରିଖ ଘୋଷଣା ସରିଛି । ରାଜ୍ୟରେ ୪ଟି ପର୍ଯ୍ୟାୟରେ ଭୋଟ ହେବ । ଏହା ସହିତ ଲାଗୁ ହୋଇଛି ଆଦର୍ଶ ଆଚରଣ ବିଧି । ୨୪ ଘଣ୍ଟା ମଧ୍ୟରେ ସମସ୍ତ କାର୍ଯ୍ୟାଳୟ ପରିସରରୁ ହୋର୍ଡିଂ, ପୋଷ୍ଟର, ବ୍ୟାନର ଓ ସରକାରୀ ଯୋଜନାର ବାର୍ତ୍ତା ହଟାଇବା ପାଇଁ ନିର୍ଦ୍ଦେଶ ଦିଆଯାଇଛି । ଏହି ବିଧି ଲାଗୁ ହେବା ପରଠାରୁ ରାଜଧାନୀରେ ଏହି ନିୟମ ତୁରନ୍ତ କାର୍ଯ୍ୟକାରୀ ହେଉଥିବା ଦେଖିବାକୁ ମିଳିଛି। ଏହା ସହିତ ଭୁବନେଶ୍ୱର ମ୍ୟୁନିସିପାଲ କର୍ପୋରେସନ (ବିଏମସି) ଏବଂ ଅନ୍ୟାନ୍ୟ ଲାଇନ ଏଜେନ୍ସିର ବିଭିନ୍ନ ଦଳରୁ ସରକାରୀ ବିଜ୍ଞାପନ ତଥା ରାଜନୈତିକ ହୋର୍ଡିଂ ହଟାଇବା ପାଇଁ ଡ୍ରାଇଭକୁ ଜୋରଦାର କରାଯାଇଛି।

ନାଗରିକ ସଂଗଠନର କର୍ମକର୍ତ୍ତାମାନେ ବିଭିନ୍ନ ରାଜନୈତିକ ଦଳର ବ୍ୟାନର, ପୋଷ୍ଟର ଏବଂ ହୋର୍ଡିଂ ହଟାଇବା ସହ ବିଭିନ୍ନ ସ୍ଥାନରୁ ସରକାରୀ ବିଜ୍ଞାପନ ହଟାଉଥିବାର ଦେଖିବାକୁ ମିଳିଛି। ସୂଚନା ଅନୁଯାୟୀ, ଜାଗା ମିଶନର ହୋର୍ଡିଂ, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଏବଂ ବିଭିନ୍ନ ସ୍ଥାନରେ ସ୍ଥାପିତ ଚଳିତ ସରକାରର ଯୋଜନା ମଧ୍ୟ ହଟେଇ ଦିଆଯାଇଛି। ତେବେ ସହରର କିଛି ସ୍ଥାନରେ ସରକାରୀ ବିଜ୍ଞାପନ ଏପର୍ଯ୍ୟନ୍ତ ହଟାଯାଇନାହିଁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫଟୋ ସହିତ ସରକାରୀ ହୋର୍ଡିଂ ସହରର କିଛି ସ୍ଥାନରେ ଦେଖିବାକୁ ମିଳିଥିଲା। ଯାହାକୁ ଦେଖି ଅଧିକାରୀମାନେ ଶୀଘ୍ର ସମସ୍ତ ହୋର୍ଡିଂ ହଟାଇବାକୁ ଉଦ୍ୟମ ଚାଲିଛି ବୋଲି କହିଛନ୍ତି।

ଏହି ଏହି ବିଜ୍ଞାପନ ହଟାଇବା ଉପରେ ନଜର ରଖିଥିବା ବିଏମସି ଅଧିକାରୀ କହିଛନ୍ତି ଯେ ଆଦର୍ଶ ଆଚରଣ ବିଧି ନିୟମ ଅନୁଯାୟୀ ସରକାରୀ ଯୋଜନା ସହ ଜଡିତ ସମସ୍ତ ବିଜ୍ଞାପନ ତଥା ରାଜନୈତିକ ଦଳର ହୋର୍ଡିଂ ଏବଂ ପୋଷ୍ଟର ବିଶେଷକରି ୨୪ ଘଣ୍ଟା ମଧ୍ୟରେ ସରକାରୀ କାର୍ଯ୍ୟାଳୟରୁ, ୪୮ ଘଣ୍ଟା ମଧ୍ୟରେ ଜନ ସାଧାରଣଙ୍କ କାନ୍ଥବାଡରୁ ଓ ୭୨ ଘଣ୍ଟା ମଧ୍ୟରେ ସମସ୍ତ ସ୍ଥାନରୁ ଓ ପୋଷ୍ଟର ଓ ବ୍ୟାନର ଗୁଡ଼ିକ ହଟାଇ ଦିଆଯିବା ପାଇଁ ନିର୍ଦ୍ଦେଶ ରହିଛି । ଯାହାଫଳରେ ରାଜ୍ୟର ଅନେକ ଜିଲ୍ଲାରୁ ହିଁ ରାତି ଅଧିଆ ପୋଷ୍ଟର ହଟା ଦୃଶ୍ୟ ସାମ୍ନାକୁ ଆସିଛି ।

ନିର୍ବାଚନ ଶେଷ ନହେବା ପର୍ଯ୍ୟନ୍ତ କୌଣସି ସ୍କିମ୍ ସମ୍ବନ୍ଧୀୟ ବିଜ୍ଞାପନ କିମ୍ବା ରାଜନୈତିକ ହୋର୍ଡିଂକୁ ସର୍ବସାଧାରଣ ସ୍ଥାନରେ ବିଜ୍ଞାପନ କରିବାକୁ ଅନୁମତି ଦିଆଯିବ ନାହିଁ। ରାସ୍ତା ଘାଟ, ଛକ ବଜାର ଓ ବିଭିନ୍ନ କାର୍ଯ୍ୟାଳୟରେ ଲାଗିଥିବା ହୋର୍ଡ଼ିଂ, ପୋଷ୍ଟର ଓ ବ୍ୟାନରକୁ ହଟାଇ ଦିଆଯିବା କାର୍ଯ୍ୟ ଆରମ୍ଭ ହୋଇଛି । ଏଥର ନିର୍ବାଚନ କମିଶନ ନିର୍ବାଚନ ଆଚରଣ ବିଧି କଡାକଡି ହେବ ବୋଲି ଘୋଷଣା କରିଛନ୍ତି । ଯାହାଫଳରେ ଏପରି ଦୃଶ୍ୟ ସାମ୍ନାକୁ ଆସିଛି ।
ଏଠାରେ ଲକ୍ଷ୍ୟ କରାଯାଇପାରେ ଯେ ବର୍ତ୍ତମାନ ମଡେଲ କୋଡ୍ ଅଫ୍ କଣ୍ଡକ୍ଟ ବଳବତ୍ତର ଥିବାରୁ ମୁଖ୍ୟମନ୍ତ୍ରୀଙ୍କ ଅଭିଯୋଗ ସେଲ୍ ବନ୍ଦ ରହିଛି। ନିର୍ବାଚନ ପ୍ରକ୍ରିୟା ସମ୍ପୂର୍ଣ୍ଣ ନହେବା ପର୍ଯ୍ୟନ୍ତ ମୁଖ୍ୟମନ୍ତ୍ରୀଙ୍କ ଅଭିଯୋଗ ସେଲ୍ ବନ୍ଦ ରହିବ ବୋଲି ଏକ ସରକାରୀ ବିବୃତ୍ତିରେ କୁହାଯାଇଛି।