ମୁମ୍ବାଇ: ଭାରତୀୟ ସର୍ବୋଚ୍ଚ ଅଦାଲତର ପ୍ରଧାନ ବିଚାରପତି ଙ୍କ ଏକ ମନ୍ତବ୍ୟକୁ ନେଇ ସୋସିଆଲ ମିଡ଼ିଆରେ ଏକ ନୂତନ ଏବଂ ରୋଚକ ବ୍ୟଙ୍ଗାତ୍ମକ ରାଜନୈତିକ ଗୋଷ୍ଠୀ ସୃଷ୍ଟି ହୋଇଛି, ଯାହାର ନାମ ରଖାଯାଇଛି ‘ମାଛି ଜନତା ପାର୍ଟି’।
କିଛିଦିନ ପୂର୍ବେ ଏକ ମାମଲାର ଶୁଣାଣି ସମୟରେ CJI କହିଥିଲେ ଯେ, ସରକାର କୌଣସି ବିଷୟକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ “ମାଛି ମାରିବାକୁ ହାତୁଡ଼ି” ବ୍ୟବହାର କରିପାରିବେ ନାହିଁ। ଅଦାଲତର ଏହି ମନ୍ତବ୍ୟକୁ ଆଧାର କରି ଯୁବପିଢ଼ି ତଥା ଇଣ୍ଟରନେଟ୍ ବ୍ୟବହାରକାରୀମାନେ ଏହି ବ୍ୟଙ୍ଗାତ୍ମକ ଦଳ ଗଠନ କରିଛନ୍ତି। ଆଉ ଏହା ମାତ୍ର କିଛି ଦିନ ମଧ୍ୟରେ ସୋସିଆଲ ମିଡ଼ିଆରେ ଅତ୍ୟନ୍ତ ଭାଇରାଲ ହୋଇ ଲକ୍ଷାଧିକ ଫଲୋଅର୍ସ ହାସଲ କରିପାରିଛି।
ଏହି ନୂତନ ପାର୍ଟିର ସଂସ୍ଥାପକ ଜଣେ ଛାତ୍ର ବୋଲି ଜଣାପଡିଛି। ଏପରିକି ଏହି ଦଳ ପକ୍ଷରୁ କୁହାଯାଇଛି ଯେ ସେମାନେ ପୂର୍ବରୁ ସକ୍ରିୟ ଥିବା ‘କକ୍ରୋଚ୍ ଜନତା ପାର୍ଟି’ ସହିତ ଆଲୋଚନା ଓ ପରସ୍ପର ବୁଝାମଣା ମାଧ୍ୟମରେ ଏକ ମିଳିତ ମଞ୍ଚ ବା ସହଯୋଗ ସ୍ଥାପନ କରିବାକୁ ପ୍ରୟାସ କରୁଛନ୍ତି।
ଯଦିଓ ଏହା ଏକ ବ୍ୟଙ୍ଗାତ୍ମକ ଏବଂ ମନୋରଞ୍ଜନଧର୍ମୀ ଅନଲାଇନ୍ ଆନ୍ଦୋଳନ ଭାବେ ଆରମ୍ଭ ହୋଇଛି, ତଥାପି ଏହା ଦେଶର ଗଣତାନ୍ତ୍ରିକ ଅଧିକାର, ପ୍ରତିବାଦ କରିବାର ସ୍ୱାଧୀନତା ଏବଂ ଜନସାଧାରଣଙ୍କ ଅଂଶଗ୍ରହଣକୁ ନେଇ ଏକ ଗମ୍ଭୀର ବାର୍ତ୍ତା ସୃଷ୍ଟି କରିଛି। ଏହି ‘ମାଛି ଜନତା ପାର୍ଟି’ର ଆବିର୍ଭାବ ପରେ ରାଜନୈତିକ କରିଡର ଏବଂ ସୋସିଆଲ ମିଡ଼ିଆରେ ଏହାକୁ ନେଇ ପ୍ରବଳ ଚର୍ଚ୍ଚା ଜାରି ରହିଛି। ବହାରକାରୀମାନେ ଏହି ବ୍ୟଙ୍ଗାତ୍ମକ ଦଳର ଇସ୍ତାହାର, ନୀତି ଏବଂ ଚିହ୍ନକୁ ନେଇ ବିଭିନ୍ନ ମଜାଦାର ମନ୍ତବ୍ୟ ଦେଉଛନ୍ତି। ଏହି ପାର୍ଟିର ଲକ୍ଷ୍ୟ କେବଳ ମଜାକ ସୃଷ୍ଟି କରିବା ନୁହେଁ, ବରଂ ଦେଶର ବର୍ତ୍ତମାନର ସାମାଜିକ ଓ ରାଜନୈତିକ ପରିସ୍ଥିତିକୁ ଏକ ସୃଜନଶୀଳ ତଥା ପ୍ରତୀକାତ୍ମକ ମାଧ୍ୟମରେ ପ୍ରଶ୍ନ କରିବା। ଏହି ଧାରା ଆଗକୁ ଅଧିକ ପ୍ରଭାବଶାଳୀ ହେବ ବୋଲି ଆଶା କରାଯାଉଛି।ଆଗାମୀ ଦିନରେ ଏହି ଅନଲାଇନ୍ ପ୍ଲାଟଫର୍ମ କିପରି ରୂପ ନେଉଛି, ସେଥିପ୍ରତି ସମସ୍ତଙ୍କ ନଜର ରହିଛି।