ନୂଆଦିଲ୍ଲୀ: ଦିଲ୍ଲୀର ଆଇଏଏସ କୋଚିଂ ସେଣ୍ଟରର ବେସମେଣ୍ଟରେ ସ୍ଵେରେଜ ପାଣି ପଶିଯିବାରୁ ୩ ଛାତ୍ରଙ୍କର ମୃତ୍ୟୁ ହେବା ଘଟଣାରେ କୋଚିଂ ସେଣ୍ଟର ମାଲିକ ଗିରଫ। ଏହି ଦୁର୍ଘଟଣାରେ ବଡ ଅବହେଳା ସାମ୍ନାକୁ ଆସିଛି। ଏହି ମହଲାରେ ତଳ କୋଠାରେ ବେଆଇନ କୋଚିଂ ସେଣ୍ଟର ଚାଲୁଥିଲା। ଏଠାରେ କୋଚିଂ କରାଯିବା ପାଇଁ କୌଣସି ଅନୁମତି ଦିଆଯାଇନଥିଲା। ବେସମେଣ୍ଟରେ ବିନା ଅନୁମତିରେ ଲାଇବ୍ରେରୀ ଚାଲୁଥିଲା, ଯାହା ଆଇନଗତ ନୁହେଁ। ଯେଉଁଠାରେ ଏହି ଘଟଣା ଘଟିଛି, ସେହି ବେସମେଣ୍ଟରେ ଷ୍ଟୋରେଜ୍ ଉଦ୍ଦେଶ୍ୟରେ ନିର୍ମାଣ କରାଯାଇଥିଲା। କିନ୍ତୁ ଏଠାରେ ଏକ ଲାଇବ୍ରେରୀ ନିର୍ମାଣ କରାଗଲା। ପିଲାମାନେ ସେଠାକୁ ଯାଇ ଅଧ୍ୟୟନ କରନ୍ତି।
ଅଗ୍ନି ଏନଓସି ଅନୁଯାୟୀ, ଏକ ଷ୍ଟୋରେଜ୍ ଭାବରେ ବ୍ୟବହାର କରିବା ପାଇଁ ଏହି ବେସମେଣ୍ଟ ତିଆରି କରିବାକୁ ଅନୁମତି ଦିଆଯାଇଥିଲା। ଅନ୍ୟଟି ପାର୍କିଂ ଭାବରେ ବ୍ୟବହାର କରିବା ପାଇଁ ଅନୁମତି ଦିଆଯାଇଥିଲା। ଏହାର ସ୍ପଷ୍ଟ ଅର୍ଥ ହେଉଛି ଲାଇବ୍ରେରୀ ନିର୍ମାଣ କରି ନିୟମ ଉଲ୍ଲଂଘନ କରାଯାଇଛି। ତେବେ ଏହି ମାମଲାରେ କୋଚିଂ ସେଣ୍ଟର ମାଲିକ ଅଭିଷେକ ଗୁପ୍ତା ଏବଂ ସଂଯୋଜକ ଦେଶପାଲଙ୍କୁ ଦିଲ୍ଲୀ ପୋଲିସ ଗିରଫ କରି ଏକ ମାମଲା ରୁଜୁ କରିଛି। କୋଚିଂ ସେଣ୍ଟରର ପରିଚାଳନା ଏବଂ ନାଗରିକ ଏଜେନ୍ସିର ଲୋକମାନେ ମଧ୍ୟ ତଦନ୍ତ ଜାରି ରଖିଛନ୍ତି।
ଓଲ୍ଡ୍ ରାଜେନ୍ଦ୍ର ନାଗର କୋଚିଂ ଘଟଣାରେ ଦିଲ୍ଲୀ ମେୟର ଶୈଲୀ ଓବରୋଇ କହିଛନ୍ତି, ଏମସିଡି ଅଧୀନରେ ଥିବା ଅନୁଷ୍ଠାନ ଏବଂ ବେସମେଣ୍ଟରେ ବେଆଇନ ଭାବେ ଚାଲୁଥିବା କୋଚିଂ ସେଣ୍ଟର ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଯଦି ଏମସିଡି ଅଧିକାରୀ ଏହି ଘଟଣାରେ ଜଡିତ ଅଛନ୍ତି ତେବେ ସେମାନଙ୍କ ବିରୋଧରେ ମଧ୍ୟ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯଦି ଏପରି ଅନ୍ୟାନ୍ୟ କୋଚିଂ ସେଣ୍ଟର ବେଆଇନ ଭାବେ ଚାଲୁଛି, ତେବେ ସେମାନଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନା ଥାଉକି, ପ୍ରବଳ ବର୍ଷାରେ ଦେଶର ଅଧିକାଂଶ ସ୍ଥାନର ସ୍ଥିତି ବେହାଲ ହୋଇପଡିଛି । ଗତକାଲି ଦିଲ୍ଲୀ ଓଲ୍ଡ ରାଜେନ୍ଦ୍ର ନଗର ସ୍ଥିତ ରାଓ ଆଇଏସ କୋଚିଂ ସେଣ୍ଟରର ବେସମେଣ୍ଟରେ ଥିବା ଲାଇବ୍ରେରୀରେ କିଛି ଛାତ୍ରଛାତ୍ରୀ ବସି ପାଠ ପଢୁଥିବା ବେଳେ ହଠାତ୍ ପାଣି ମାଡି ଆସିଥିଲା। ପାଣିର ସ୍ରିତ ଏତେ ପ୍ରଖର ଥିଲା ପିଲାମାନେ ନିଜକୁ ସମ୍ଭାଳି ପାରିନଥିଲେ । ତେବେ କୌଣସି ଡ୍ରେନ କିମ୍ବା ସ୍ଵେରେଜ ଲାଇନ ଫାଟିଯିବାରୁ ଏପରି ପରିସ୍ଥିତି ଉପୁଜିଥିବା କହିଛନ୍ତି ସ୍ଥାନୀୟ ଲୋକ । ବେସମେଣ୍ଟରେ ପାଖାପାଖି ୧୨ଫୁତର ପାଣି ପ୍ରବାହିତ ହେଉଥିଲା । ଫଳରେ ଅନେକ ଛାତ୍ର ପାଣିର ସ୍ରୋତରେ ଭାଷିଯାଇଥିଲେ । ଖବରପାଇ ଘଟଣାସ୍ଥଳରେ ପହଞ୍ଚିଥିଲା ଏନଡିଆରଏଫ ଟିମ୍ ଏବଂ ଅଗ୍ନିଶମ ବାହିନୀ । ବେସମେଣ୍ଟରୁ ପାଣି ନିଷ୍କାସନ କରିବା ସହିତ ୩ଜଣ ଛାତ୍ରଙ୍କ ମୃତଦେହ ଉଦ୍ଧାର କରିଛନ୍ତି ଟିମ୍ ।
Comments are closed.