ଭୁବନେଶ୍ୱର: ସ୍ୱଳ୍ପ ଦୂରଗାମୀ ଯାତ୍ରା ପାଇଁ ଯାତ୍ରୀମାନଙ୍କୁ ଅଣସଂରକ୍ଷିତ ସ୍ଲିପର କ୍ଲାସ ସୁବିଧା ପ୍ରଦାନ କରିବା ଉଦ୍ଦେଶ୍ୟରେ ପୂର୍ବତଟ ରେଳପଥ ଆହୁରି ୩ଟି ଟ୍ରେନରେ ଏହି ସୁବିଧା ପ୍ରଦାନ କରିଛି।
ସ୍ୱଳ୍ପଦୂରାଗାମୀ ଯାତ୍ରୀମାନେ ଆସନ୍ତା ଫେବୃୟାରି ମାସ ଶେଷ ଓ ମାର୍ଚ୍ଚ ପ୍ରଥମ ସପ୍ତାହ ମଧ୍ୟରେ ସାଧାରଣ ଦ୍ୱିତୀୟ ଶ୍ରେଣୀ ଠାରୁ ମାତ୍ର ଅଳ୍ପ କିଛି ଅଧିକ ଦେୟ ଦେଇ ଆହୁରି ୩ଟି ଟ୍ରେନରେ ଅଣସଂରକ୍ଷିତ ସ୍ଲିପର କ୍ଲାସ ଯାତ୍ରା ସୁବିଧା ପାଇପାରିବେ।
ଏହି ଟ୍ରେନ ଗୁଡିକହେଲା ୧୮୪୯୬ ଭୁବନେଶ୍ୱର-ରାମେଶ୍ୱରମ ଏକ୍ସପ୍ରେସ (ମାର୍ଚ୍ଚ ୬ ତାରିଖ ଠାରୁ ଭୁବନେଶ୍ୱର ଓ ବ୍ରହ୍ମପୁର ମଧ୍ୟରେ), ୧୮୪୦୧ ପୁରୀ-ଅହମ୍ମଦାବାଦ ଏକ୍ସପ୍ରେସ୍(ଫେବୃୟାରି ମାସ ୨୩ ତାରିଖ ଠାରୁ ପୁରୀ ଓ ବ୍ରହ୍ମପୁର ମଧ୍ୟରେ) ଏବଂ ୧୭୪୮୦ ତିରୁପତି-ପୁରୀ ଏକ୍ସପ୍ରେସ ( ଫେବୃୟାରି ମାସ ୧୮ ତାରିଖ ଠାରୁ ବ୍ରହ୍ମପୁର ଓ ପୁରୀ ମଧ୍ୟରେ) ।
ପୁରୀ, ଭୁବନେଶ୍ୱର, ଖୋର୍ଦ୍ଧା ରୋଡ଼, ବ୍ରହ୍ମପୁର ଭଳି ଗୁରୁତ୍ୱପୂର୍ଣ୍ଣ ଷ୍ଟେସନମାନଙ୍କଠାରୁ ଏହି ସବୁ ଟ୍ରେନମାନଙ୍କ ପାଇଁ ଅଣସଂରକ୍ଷିତ ଟିକେଟ କାଉଣ୍ଟରରୁ ଅଣସଂରକ୍ଷିତ ସ୍ଲିପର କ୍ଲାସ ଟିକେଟ କ୍ରୟ କରି ସ୍ୱଳ୍ପ ଦୂରଗାମୀ ଯାତ୍ରା ପାଇଁ ସ୍ଥିରୀକୃତ ଏସ-୬ ସ୍ଲିପର କ୍ଲାସରେ ଯାତ୍ରା ସୁବିଧା ପାଇପାରିବେ ।
ଟ୍ରେନ ଯାତ୍ରା ସମୟରେ ଯେଉଁମାନେ ସାଧାରଣ ଦ୍ୱିତୀୟ ଶ୍ରେଣୀ କୋଚମାନଙ୍କରେ ଯାତ୍ରୀ ଭିଡ଼ ଯୋଗୁଁ ଅସୁବିଧାର ସମ୍ମୁଖୀନ ହେଉଥିଲେ କିମ୍ବା ଯାତ୍ରୀ ଭିଡ ଯୋଗୁଁ ଅନଧିକୃତ ଭାବେ ସ୍ଲିପର କ୍ଲାସରେ ଯାତ୍ରା କରୁଥିଲେ ସେମାନେ ସାଧାରଣ ଦ୍ୱିତୀୟଶ୍ରେଣୀ ଭଡାଠାରୁ ଅଳ୍ପ କିଛି ଅଧିକ ଦେୟ ଦେଇ ସ୍ଲିପର କ୍ଲାସରେ ସ୍ୱଳ୍ପଦୂରତା ପାଇଁ ଯାତ୍ରା କରିପାରିବେ।
ପୂର୍ବରୁ ସାଧାରଣ ଦ୍ୱିତୀୟଶ୍ରେଣୀ ଟିକେଟ କ୍ରୟ କରି ଯାତ୍ରୀ ଭିଡ଼ ଯୋଗୁଁ ସ୍ଲିପର କ୍ଲାସରେ ଅନଧିକୃତ ଭାବେ ଯାତ୍ରା କରୁଥିବାରୁ ଜରିମାନା ଦେବାକୁ ପଡୁଥିଲା।
ଏହି ସମସ୍ୟାକୁ ଦୂରକରିବାକୁ ଯାଇ ସ୍ୱଳ୍ପଦୂରଗାମୀ ଯାତ୍ରୀମାନଙ୍କୁ ଏହି ସବୁ ଟ୍ରେନମାନଙ୍କରେ ଅଣସଂରକ୍ଷିତ ସ୍ଲିପର କ୍ଲାସ ଯାତ୍ରା ପ୍ରଦାନ କରିବାକୁ ପୂର୍ବତଟ ରେଳପଥ ନିଷ୍ପତ୍ତି ନେଇଅଛି। ପୂର୍ବରୁ ପୂର୍ବତଟ ରେଳପଥ ୨୦୧୧-୧୨ ମସିହାରେ କୋଣାର୍କ ଏକ୍ସପ୍ରେସ ଟ୍ରେନରେ ଏହି ସୁବିଧା ପରୀକ୍ଷାମୂଳକ ଭାବେ ଆରମ୍ଭ କରିଥିଲା।
ଏହାର ସଫଳତାକୁ ଦୃଷ୍ଟିରେ ରଖି ଏବଂ ଯାତ୍ରୀମାନଙ୍କର ଚାହିଦାକୁ ନଜର ଦେଇ ପୂର୍ବତଟ ରେଳପଥ ୨୦୧୪ ମସିହା ଠାରୁ ବିଶାଖା ଏକ୍ସପ୍ରେସରେ ଭୁବନେଶ୍ୱର ଓ ପଲାସା ମଧ୍ୟରେ ଏହି ସୁବିଧା ପ୍ରଦାନ କରିଆସୁଅଛି ।
ବର୍ତ୍ତମାନ ସୁଦ୍ଧା ପୂର୍ବତଟ ରେଳପଥ ପକ୍ଷରୁ ୭ଟି ଟ୍ରେନ ରେ ଅଣସଂରକ୍ଷିତ ସ୍ଲିପର କ୍ଲାସ ସୁବିଧା ପ୍ରଦାନ କରାଯାଉଥିଲା ।
ଏହି ଟ୍ରେନଗୁଡିକ ହେଲା ଭୁବନେଶ୍ୱରରୁ ବ୍ରହ୍ମପୁର ମଧ୍ୟରେ ୧୧୦୨୦ ଭୁବନେଶ୍ୱର-ମୁମ୍ବାଇ କୋଣାର୍କ ଏକ୍ସପ୍ରେସ, ଭୁବନେଶ୍ୱରରୁ ବିଶାଖାପାଟଣା ମଧ୍ୟରେ ୧୭୦୧୫/୧୭୦୧୬ ଭୁବନେଶ୍ୱର-ସିକନ୍ଦରାବାଦ-ଭୁବନେଶ୍ୱର ବିଶାଖା ଏକ୍ସପ୍ରେସ, ବ୍ରହ୍ମପୁର ରୁ ଭୁବନେଶ୍ୱର ମଧ୍ୟରେ ୧୮୪୬୪ବାଙ୍ଗାଲୋର-ଭୁବନେଶ୍ୱର ପ୍ରଶାନ୍ତି ଏକ୍ସପ୍ରେସ, ୧୭୨୪୪ ରାୟଗଡା ଓ ବିଶାଖାପାଟଣା ମଧ୍ୟରେ ରାୟଗଡା-ବିଜୟୱାଡା ଏକ୍ସପ୍ରେସ ଏବଂ ୧୨୮୦୭/୧୨୮୦୮ ବିଶାଖାପାଟଣା-ରାୟଗଡା-ବିଶାଖାପାଟଣା ସମତା ଏକ୍ସପ୍ରେସ ଉଭୟ ଦିଗରୁ ବିଶାଖାପାଟଣା ଓ ରାୟଗଡା ମଧ୍ୟରେ ଏହି ସେବା ଉପଲବ୍ଧ ଅଛି ।
ଭୁବନେଶ୍ୱର-ରାମେଶ୍ୱରମ, ପୁରୀ-ଅହମଦାବାଦ ଓ ତିରୁପତି-ପୁରୀ ଏକ୍ସପ୍ରେସମାନଙ୍କରେ ଏହି ସେବା ଉପଲବ୍ଧ ହେବା ପରେ ପୂର୍ବତଟ ରେଳପଥ ମଧ୍ୟରେ ସମୁଦାୟ ୧୦ ଟି ଟ୍ରେନରେ ସ୍ୱଳ୍ପ ଦୂର ଟ୍ରେନ ଯାତ୍ରା ପାଇଁ ଅଣସଂରକ୍ଷିତ ସ୍ଲିପର କ୍ଲାସ ସେବା ପ୍ରଦାନ କରାଯିବ ।
Comments are closed.