ମୁମ୍ବାଇ: ଆମୀର ଖାନଙ୍କ ପ୍ରଥମ ତଥା ପୂର୍ବ ପତ୍ନୀ ରୀନା ଦତ୍ତଙ୍କ ପିତାଙ୍କର ଦେହାନ୍ତ ହୋଇଛି। ତେବେ ମୃତ୍ୟୁର କାରଣ ଜଣା ପଡିନାହିଁ। ବୁଧବାର ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଏହି କଷ୍ଟ ସମୟରେ ଆମୀର ଖାନ ରୀନାଙ୍କ ପରିବାର ସହିତ ଠିଆ ହୋଇଥିବା ନଜର ଆସିଛନ୍ତି। ରୀନାଙ୍କ ପିତା ଏକଦା ଏୟାର ଇଣ୍ଡିଆର ଜଣେ ବରିଷ୍ଠ ଅଧିକାରୀ ଥିଲେ।
ରୀନାଙ୍କ ପିତାଙ୍କର ଦେହାନ୍ତ ହେବା ପରେ ଘରେ ଶୋକ ପ୍ରକାଶ ପାଇଛି। କେବଳ ଆମୀର ଖାନ ନୁହଁନ୍ତି ବରଂ ତାଙ୍କ ବୃଦ୍ଧ ମାଆ ଜୀନତ ହୁସେନ୍ ମଧ୍ୟ ରୀନା ଦତ୍ତଙ୍କ ଘରେ ପହଂଚିଥିଲେ। ଭିଡିଓରେ ଆମୀରଙ୍କ ମାଆକୁ ଦେଖି ଏହା ସ୍ପଷ୍ଟ ଯେ ଜୀନତ ନିଜେ ଚାଲିବାରେ ଅସମର୍ଥ। ସେ କାରରୁ ଓହ୍ଲାଇ କର୍ମଚାରୀଙ୍କ ସାହାଯ୍ୟରେ ରୀନାଙ୍କ ଘରକୁ ଯାଉଥିବାର ନଜର ଆସିଛନ୍ତି। ଏହାର କିଛି ଝଲକ ସୋସିଆଲ ମିଡିଆରେ ଲୋକଙ୍କୁ ଭାବପ୍ରବଣ କରିଛି।
ସୂଚନା ଥାଉକି ଆମୀର ଖାନ ଏବଂ ରୀନା ୧୯୮୬ ମସିହାରେ ଗୋପନରେ ବିବାହ କରିଥିଲେ। ସେମାନଙ୍କର ଦୁଇଟି ସନ୍ତାନ ଜୁନୈଦ ଏବଂ ଆୟରା ଖାନ ଅଛନ୍ତି। ୨୦୦୨ରେ ସେମାନେ ଛାଡପତ୍ର ଦେଇଥିଲେ। କୁହାଯାଏ ଯେ ଯେତେବେଳେ ଆମୀର ପ୍ରଥମ ଥର ବିବାହ କରିଥିଲେ, ରୀନାଙ୍କୁ ମାତ୍ର ୧୯ ବର୍ଷ ହୋଇଥିଲା। ଆମୀର ଏବଂ ରୀନା ଅନେକ ଦିନ ଧରି ସେମାନଙ୍କ ବିବାହକୁ ନିଜ ପରିବାରରୁ ଲୁଚାଇ ରଖିଥିଲେ। ଯେତେବେଳେ ଆମୀର ‘କାୟାମତ ସେ କୟାମତ ତକ୍’ ପାଇଁ ସୁଟିଂ କରୁଥିଲେ, ସେତେବେଳେ ସେ ବିବାହ କରିଥିଲେ। ଏହି ଫିଲ୍ମ ରିଲିଜ ହେବାର ଏକ ବର୍ଷ ପୂର୍ବରୁ ଦୁହିଁଙ୍କ ମଧ୍ୟରେ ପ୍ରେମ ସମ୍ପର୍କ ଆରମ୍ଭ ହୋଇଥିଲା। ଉଭୟ ପରିବାରରେ ମତଭେଦ ଥିବାରୁ ବିବାହ ସମ୍ଭବ ନଥିଲା। ତା’ପରେ ଦିନେ ଆମୀର ରୀନାଙ୍କ ସହ କୋର୍ଟକୁ ଯାଇ ରେଜିଷ୍ଟର ବିବାହ କରିଥିଲେ।
କୁହାଯାଏ ଯେ ଦିନେ ରୀନାଙ୍କ ଭଉଣୀ ସନ୍ଦେହଜନକ ହୋଇ ବାପାଙ୍କୁ ଜଣାଇବାକୁ ଧମକ ଦେଇଥିଲେ। ଏହା ପରେ ରୀନା ଏବଂ ଆମୀରଙ୍କ ବିଷୟରେ ପରିବାର ସଦସ୍ୟଙ୍କ ସାମ୍ନାକୁ ଆସିଥିଲା। ତେବେ ଆମୀର ଖାନଙ୍କ ପିତା ତାହିର ହୁସେନ୍ଙ୍କର ଏହି ବିବାହ ସମ୍ପର୍କରେ କୌଣସି ଅସୁବିଧା ନଥିଲା ଏବଂ ତାଙ୍କୁ ତାଙ୍କ ବୋହୂ ଭାବରେ ଗ୍ରହଣ କରିଥିଲେ। କୁହାଯାଏ ଯେ ରୀନାଙ୍କ ପିତା ଏହି ସମ୍ପର୍କକୁ ନେଇ ଆଦୌ ଖୁସି ନଥିଲେ। ରୀନାଙ୍କ ପିତା ତାଙ୍କ ଝିଅର ଏହି ବିବାହ ଖବର ପାଇବା ପରେ ଅସୁସ୍ଥ ହୋଇପଡିଥିଲେ। ଏହା ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରିବାକୁ ପଡିଥିଲା। କିନ୍ତୁ ଆମୀର ତାଙ୍କ ଆଚରଣରେ ତାଙ୍କ ହୃଦୟ ଜିତିଥିଲେ। ବାସ୍ତବରେ, ଯେତେବେଳେ ସେ ହସ୍ପିଟାଲରେ ଭର୍ତ୍ତି ହୋଇଥିଲେ ଆମୀର ତାଙ୍କୁ ବହୁତ ଭଲ ସେବା କରିଥିଲେ। ଜ୍ୱାଇଁଙ୍କ ଆଚରଣ ତାଙ୍କ ହୃଦୟ ଜିତିଥିଲା।