ମୁମ୍ବାଇ: ବଲିଉଡର ଭାଇଜାନ୍ ସଲମାନ ଖାନଙ୍କ ଜୀବନ ପ୍ରତି ବିପଦ ଦିନକୁ ଦିନ ବଢିବାରେ ଲାଗିଛି । ପୋଲିସ ଦ୍ବାରା ସୁରକ୍ଷା ବୃଦ୍ଧି କରାଯାଇଥିବା ସତ୍ତ୍ବେ ଧମକପୂର୍ଣ୍ଣ ବାର୍ତ୍ତା ପଠାଇବା ପ୍ରକ୍ରିୟା ବନ୍ଦ ହେଉନାହିଁ । ପୁଣିଥରେ ତାଙ୍କୁ ହତ୍ୟା ଧମକ ମିଳିଛି । ମୁମ୍ବାଇ ଟ୍ରାଫିକ କଣ୍ଟ୍ରୋଲ ସେଲ୍ କୁ ଲରେନ୍ସ ବିଷ୍ଣୋଇଙ୍କ ନାମରେ ଏକ ଧମକପୂର୍ଣ୍ଣ ବାର୍ତ୍ତା ଆସିଛି । ଏଥିସହ ୫ କୋଟି ଟଙ୍କା ଦାବି କରାଯାଇଛି ।
ଟ୍ରାଫିକ୍ ନିୟନ୍ତ୍ରଣ ସେଲ୍ କୁ ପଠାଯାଇଥିବା ବାର୍ତ୍ତାରେ ଦାବି କରାଯାଇଛି ଯେ, ଯଦି ସଲମାନ ଖାନ ଜୀବନ୍ତ ରହିବାକୁ ଚାହାଁନ୍ତି, ତେବେ ସେ ଆମ ମନ୍ଦିରକୁ ଯାଇ କ୍ଷମା ମାଗନ୍ତୁ କିମ୍ବା ୫ କୋଟି ଟଙ୍କା ଦିଅନ୍ତୁ । ଯଦି ଏହା କରା ନ ଯାଏ ତେବେ ସେମାନେ ସଲମାନ ଖାନଙ୍କୁ ହତ୍ୟା କରିବେ । ଏହି ବାର୍ତ୍ତାରେ ଲେଖା ହୋଇଛି ଯେ ଆମର ଗ୍ୟାଙ୍ଗ ଏପର୍ଯ୍ୟନ୍ତ ସକ୍ରିୟ ଅଛି । ତେବେ ଏହି ଧମକପୂର୍ଣ୍ଣ ବାର୍ତ୍ତା ଲରେନ୍ସ ବିଷ୍ଣୋଇଙ୍କ ଭାଇ ପଠାଇଥିବା ନେଇ ଦାବି ହୋଇଛି ।
ପୋଲିସର ସୂଚନାନୁସାରେ, ସଲମାନ ଖାନଙ୍କ ନାମରେ ଏହି ଧମକପୂର୍ଣ୍ଣ ବାର୍ତ୍ତା ବିଷୟରେ ସୂଚନା ଗତ ମଧ୍ୟରାତ୍ରିରେ ମିଳିଥିଲା । ଯେତେବେଳେ ଟ୍ରାଫିକ ନିୟନ୍ତ୍ରଣ କକ୍ଷରେ କାର୍ଯ୍ୟ କରୁଥିବା ଅଧିକାରୀ ଏହି ବାର୍ତ୍ତା ପଢିଥିଲେ, ସେତେବେଳେ ସେ ପୁରା ଘଟଣା ସମ୍ପର୍କରେ ସୂଚନା ପାଇଥିଲେ । ବର୍ତ୍ତମାନ ଧମକ ଦେଇଥିବା ବ୍ୟକ୍ତିଙ୍କୁ ପୋଲିସ ଖୋଜୁଛି ।
୫ ଦିନ ପୂର୍ବରୁ ମଧ୍ୟ ସମାନ ଘଟଣା ଘଟିଥିଲା । ଅକ୍ଟୋବର ୩୦ରେ ମଧ୍ୟ ଜଣେ ଅଜ୍ଞାତ ବ୍ୟକ୍ତି ମୁମ୍ବାଇ ଟ୍ରାଫିକ ପୋଲିସର ନିୟନ୍ତ୍ରଣ ସେଲ୍ କୁ ଏକ ଧମକପୂର୍ଣ୍ଣ ବାର୍ତ୍ତା ପଠାଇଥିଲେ । ଏଥିସହ ୨ କୋଟି ଟଙ୍କାର ଦାବି କରିଥିଲେ । ଏହି ସମୟ ମଧ୍ୟରେ କୁହାଯାଇଥିଲା ଯେ, ଯଦି ସେ ଟଙ୍କା ନ ପାଆନ୍ତି ତେବେ ସେ ସଲମାନ ଖାନଙ୍କୁ ହତ୍ୟା କରିବେ ।
ବର୍ତ୍ତମାନ ସଲମାନ ଖାନଙ୍କ ଧମକକୁ ନେଇ ବର୍ଲି ପୋଲିସ ଷ୍ଟେସନରେ ଏକ ମାମଲା ପଞ୍ଜିକରଣ ପ୍ରକ୍ରିୟା ଚାଲିଛି । ଏତଦ୍ ବ୍ୟତୀତ, ଯେଉଁ ନମ୍ବରରୁ ଧମକପୂର୍ଣ୍ଣ ବାର୍ତ୍ତା ଆସିଥିଲା, ତାହା ମଧ୍ୟ ଅନୁସନ୍ଧାନ କରାଯାଉଥିବା ସୂଚନା ମିଳିଛି ।