ଶ୍ରୀନଗର: ସରକାରୀ ଡକ୍ୟୁମେଣ୍ଟ ପଠାଇବା ପାଇଁ ହ୍ୱାଟସ୍ ଆପ୍ ଏବଂ ଜିମେଲ୍ ପରି ତୃତୀୟ-ପକ୍ଷ ପ୍ଲାଟଫର୍ମ ବ୍ୟବହାର କରିବାକୁ ଜମ୍ମୁ-କାଶ୍ମୀର ସରକାରଙ୍କ ନା। ଜାମ୍ମୁ-କାଶ୍ମୀରର ସରକାରୀ କର୍ମଚାରୀ ହ୍ବାଟ୍ସଆପ୍, ଜିମେଲ୍ ଜରିଆରେ ସରକାରୀ ତଥ୍ୟ ଆଦାନପ୍ରଦାନ କରିପାରିବେ ନାହିଁ। ହ୍ବାଟ୍ସଆପ୍, ଜିମେଲ୍ ଭଳି ମାଧ୍ୟମ ଜରିଆରେ ତଥ୍ୟ ଆଦାନପ୍ରଦାନ ପ୍ରଘଟ ହେବାର ଆଶଙ୍କା ରହିଥିବାରୁ ସରକାର ଏ କ୍ଷେତ୍ରରେ କଟକଣା ଜାରି କରିଛନ୍ତି।
ଜାମ୍ମୁ-କାଶ୍ମୀର ସରକାର ସମ୍ବେଦନଶୀଳ ତଥା ବର୍ଗୀକୃତ ସରକାରୀ ଯୋଗାଯୋଗ ସୁରକ୍ଷିତ ରଖିବା ପାଇଁ ସୋମବାର ବିସ୍ତୃତ ନିର୍ଦ୍ଦେଶନାମା ଜାରି କରିଛନ୍ତି। ହ୍ବାଟ୍ସଆପ୍, ଜିମେଲ୍ ଜରିଆରେ ସରକାରୀ ତଥ୍ୟ ଆଦାନପ୍ରଦାନ କରିବା କର୍ମଚାରୀଙ୍କ ଅଭ୍ୟାସରେ ପରିଣତ ହୋଇଯାଇଛି। ତଥ୍ୟ ସୁରକ୍ଷା ପାଇଁ ସରକାର ଏଭଳି ପଦକ୍ଷେପ ନେଇଥିଲା ବେଳେ ସାଧାରଣ ପ୍ରଶାସନ ବିଭାଗ ତରଫରୁ ଉପରୋକ୍ତ ବିଜ୍ଞପ୍ତି ଜାରି କରାଯାଇଛି।
ଗୋପନୀୟ ତଥା ସମ୍ବେଦନଶୀଳ ସରକାରୀ ତଥ୍ୟ ପ୍ରଘଟ ହେଲେ ନାନା ଅସୁବିଧା ସୃଷ୍ଟି ହେବାର ଆଶଙ୍କା ରହିଛି। ଏହାର ପ୍ରତିକାର ସ୍ବରୂପ ସରକାରଙ୍କ ନିଜସ୍ବ ଇଲେକ୍ଟ୍ରୋନିକ୍ ଯୋଗାଯୋଗ ମାଧ୍ୟମ କାର୍ଯ୍ୟକାରୀ କରିବା ପାଇଁ ପ୍ରସ୍ତୁତି ଆରମ୍ଭ ହୋଇଛି। ଏହି ମାଧ୍ୟମରେ କର୍ମଚାରୀମାନେ ତଥ୍ୟ ଆଦାନପ୍ରଦାନ ପାଇଁ ସରକାର ନିର୍ଦ୍ଦେଶ ଦେଇଛନ୍ତି।