ଆଡିଲେଡ:ଅଷ୍ଟ୍ରେଲିଆର ବିସ୍ଫୋରକ ବ୍ୟାଟ୍ସମ୍ୟାନ ଟ୍ରେଭିସ ହେଡ ଏକ ମଜାଦାର ବୟାନ ଦେଇଛନ୍ତି । ଯାହାକି ଭାରତୀୟ କ୍ରିକେଟପ୍ରେମୀଙ୍କୁ ନିଶ୍ଚିତ ଭାବେ ଗର୍ବିତ କରିବ । ହେଡ କହିଛନ୍ତି ଯେ, ମୁଁ ଭାଗ୍ୟବାନ । ଭବିଷ୍ୟତରେ ମୁଁ ମୋ ନାତି ନାତୁଣୀଙ୍କୁ କହିପାରିବି ଯେ, ଭାରତର ମହାନ ବୋଲର ଯଶପ୍ରୀତ ବୁମରାହଙ୍କୁ ସାମ୍ନା କରିଛି । ପର୍ଥ ଟେଷ୍ଟରେ ବୁମରାହ ଭାରତ ବିଜୟର ମୂଖ୍ୟ କାରଣ ସାଜିଥିଲେ । ସେ ଏହି ମ୍ୟାଚରେ ୮ଟି ୱିକେଟ ଅକ୍ତିଆର କରିଥିଲେ । ଆଗାମୀ ଦିନରେ ବୁମରାହ ମହାନ ବୋଲରଙ୍କ ମଧ୍ୟରେ ଗଣତି ହେବେ ବୋଲି ହେଡ କହିଛନ୍ତି । ଚଳିତ ବର୍ଷ ଅନୁଷ୍ଠିତ ହୋଇ ଯାଇଥିବା ଟି୨୦ ବିଶ୍ୱକପରେ ବୁମରାହ ପ୍ଲେୟାର ଅଫ ଦି ସିରିଜ ବିବେଚିତ ହୋଇଥିଲେ । ତାଙ୍କ ପ୍ରଦର୍ଶନ ଭାରତକୁ ଚାମ୍ପିୟନ କରାଇବାରେ ପ୍ରମୂଖ ଭୂମିକା ଗ୍ରହଣ କରିଥିଲା ।
ବୁମରାହ ପ୍ରତ୍ୟେକ ବ୍ୟାଟ୍ସମ୍ୟାନଙ୍କୁ ଭିନ୍ନ ଭିନ୍ନ ଶୈଳୀରେ ବୋଲିଂ କରିଥାନ୍ତି । ୨୦୨୦ ଅଷ୍ଟ୍ରେଲିଆ ଗସ୍ତରେ ଭାରତ ଦିବାରାତ୍ର ଟେଷ୍ଟରେ ୩୬ ରନରେ ଅଲଆଉଟ ହୋଇ ଯାଇଥିଲା । ଚଳିତ ୫ ମ୍ୟାଚ ବିଶିଷ୍ଟ ସିରିଜର ଦ୍ୱିତୀୟ ମୁକାବିଲା ପୂନର୍ବାର ଏଠାରେ ଖେଳାଯିବ । ଆମେ ଏଥର ବି ଏ ଭଳି କିଛି ଆଶା କରୁଛୁ ବୋଲି ହେଡ କହିଛନ୍ତି । ୱାର୍ଲ୍ଡ ଟେଷ୍ଟ ସିରିଜ ଫାଇନାଲର ପ୍ରବେଶ କରିବା ପାଇଁ ଭାରତକୁ ବାକିଥିବା ୪ଟି ମ୍ୟାଚରୁ ୩ଟିରେ ବିଜୟ ହାସଲ କରିବାକୁ ପଡିବ ।