Fresh Kuki-Naga clashes:ମଣିପୁରରେ ପୁଣି ହିଂସା; ୯ ଜଣଙ୍କ ମୃତ୍ୟୁ, ଶାନ୍ତି ପାଇଁ ଆହ୍ୱାନ ଦେଲେ ମୁଖ୍ୟମନ୍ତ୍ରୀ

ନୂଆଦିଲ୍ଲୀ:ରବିବାର ଦିନ ମଧ୍ୟ ମଣିପୁରର ହିଂସା ପ୍ରଭାବିତ ପାହାଡିଆ ଜିଲ୍ଲାଗୁଡ଼ିକରେ ଉତ୍ତେଜନାପୂର୍ଣ୍ଣ ପରିସ୍ଥିତି ଲାଗିରହିଛି । ଦୁଇ ସମ୍ପ୍ରଦାୟ ମଧ୍ୟରେ ହୋଇଥିବା ସାମ୍ପ୍ରତିକ ହିଂସାତ୍ମକ ସଂଘର୍ଷରେ ମୃତ୍ୟୁସଂଖ୍ୟା ବୃଦ୍ଧି ପାଇ ନଅରେ ପହଞ୍ଚିଛି। ଏହି ସମୟରେ ରାଜ୍ୟର ମୁଖ୍ୟମନ୍ତ୍ରୀ ୱାଇ. ଖେମଚାନ୍ଦ ସିଂହ ନାଗରିକମାନଙ୍କୁ ଶାନ୍ତି ଓ ସଂଯମତା ବଜାୟ ରଖିବାକୁ ନିବେଦନ କରିଛନ୍ତି। ସେ ପରିସ୍ଥିତିକୁ ଯଥାଶୀଘ୍ର ନିୟନ୍ତ୍ରଣକୁ ଆଣିବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦେବା ସହ ହିଂସାକାଣ୍ଡ ଓ ନାଗରିକଙ୍କ ହତ୍ୟା ଘଟଣାକୁ ନିନ୍ଦା କରିଛନ୍ତି।

ଶୁକ୍ରବାର ଏବଂ ଶନିବାର ଦିନ ରାଜ୍ୟର ପାହାଡ଼ିଆ ଅଞ୍ଚଳ ଅନ୍ତର୍ଗତ କାମଜୋଙ୍ଗ, ଉଖରୁଲ୍ ଏବଂ କାଙ୍ଗପୋକପି ଜିଲ୍ଲାରେ ହିଂସାକାଣ୍ଡର ନୂତନ ଘଟଣା ଘଟିଛି, ଯେଉଁଥିରେ ଜୀବନହାନି ମଧ୍ୟ ଘଟିଛି। ବିଗୁଡ଼ୁଥିବା ପରିସ୍ଥିତିକୁ ଦୃଷ୍ଟିରେ ରଖି, ଆଇନଶୃଙ୍ଖଳା ବଜାୟ ରଖିବା ପାଇଁ କାମଜୋଙ୍ଗ ଜିଲ୍ଲା ପ୍ରଶାସନ ‘ଭାରତୀୟ ନାଗରିକ ସୁରକ୍ଷା ସଂହିତା’ (BNSS)ର ଧାରା ୧୬୩ ଅଧୀନରେ କଠୋର କଟକଣା ଲାଗୁ କରିଛି। ହିଂସା ପ୍ରଭାବିତ ତଥା ସମ୍ବେଦନଶୀଳ ଅଞ୍ଚଳ ଓ ଗ୍ରାମଗୁଡ଼ିକରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।

ଏହି ସମୟରେ ମୁଖ୍ୟମନ୍ତ୍ରୀ ୱାଇ. ଖେମଚାନ୍ଦ ସିଂହ ଖରାପ ହେଉଥିବା ପରିସ୍ଥିତି ନେଇ ଉଦ୍ବେଗ ପ୍ରକାଶ କରିଛନ୍ତି। ଏକ ସୋସିଆଲ୍ ମିଡିଆ ପୋଷ୍ଟରେ ସେ କହିଛନ୍ତି, “ମୁଁ ହିଂସାକାଣ୍ଡ ଏବଂ ନିରୀହ ନାଗରିକଙ୍କ ହତ୍ୟାକୁ ନିନ୍ଦା କରୁଛି। ପରିସ୍ଥିତିକୁ ନିୟନ୍ତ୍ରଣକୁ ଆଣିବା, ଶାନ୍ତି ଓ ଆଇନ-ଶୃଙ୍ଖଳା ବଜାୟ ରଖିବା ଏବଂ ସମସ୍ତ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ତୁରନ୍ତ ଓ ପ୍ରଭାବଶାଳୀ ପଦକ୍ଷେପ ଗ୍ରହଣ କରିବାକୁ ମୁଁ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛି। ପରିସ୍ଥିତିକୁ ଶାନ୍ତ କରିବା ପାଇଁ ସେ ସମସ୍ତ ସମ୍ପ୍ରଦାୟକୁ ସଂଯମତା ଅବଲମ୍ବନ କରିବା ସହ ଶାନ୍ତି, ଆଲୋଚନା ଓ ସଦ୍ଭାବକୁ ପ୍ରାଥମିକତା ଦେବାକୁ ଆହ୍ୱାନ ଜଣାଇଲେ।”

ଏହି ସମୟରେ ଅଧିକାରୀମାନେ ଜଣାଇଛନ୍ତି ଯେ ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ସବୁଠାରୁ ଅଧିକ ପ୍ରଭାବିତ ଜିଲ୍ଲା କାଙ୍ଗପୋକପି ଏବଂ କାମଜୋଙ୍ଗରେ ଅତିରିକ୍ତ ସୁରକ୍ଷା ବାହିନୀ ମୁତୟନ କରାଯାଇଛି। ସୁରକ୍ଷା ବାହିନୀକୁ ପ୍ରତ୍ୟେକ ସ୍ଥାନରେ ମୁତୟନ କରାଯାଇଛି ଏବଂ ସମଗ୍ର ଅଞ୍ଚଳ ଉପରେ କଡ଼ା ନଜର ରଖାଯାଇଛି।

ଶୁକ୍ରବାର ରାତିରେ, ପାଞ୍ଚ ସନ୍ତାନର ଜଣେ ମାଆଙ୍କୁ ଅଜ୍ଞାତ ଆକ୍ରମଣକାରୀମାନେ ଗୁଳି କରି ହତ୍ୟା କରିଛନ୍ତି। ଏହି ଘଟଣା ନାଗା-ବହୁଳ କାମଜୋଙ୍ଗ ଜିଲ୍ଲାରେ ଅବସ୍ଥିତ କୁକି-ବହୁଳ ଗ୍ରାମ ‘ଚସାଦ’ରେ ଘଟିଛି। ୨୨ ବର୍ଷୀୟା ମହିଳାଙ୍କ ହତ୍ୟା ପରେ କୁକି ଓ ନାଗା ସଶସ୍ତ୍ର ଗୋଷ୍ଠୀ ମଧ୍ୟରେ ଗୁଳିବିନିମୟ ଆରମ୍ଭ ହୋଇଥିଲା, ଯାହା ଶନିବାର ସକାଳ ପର୍ଯ୍ୟନ୍ତ ଚାଲିଥିଲା। ଏହି ସଂଘର୍ଷରେ ଜଣେ ୪୨ ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ଦଶଟି ଘର ଜଳାଇ ଦିଆଯାଇଥିଲା। ଅଧିକ ହିଂସା ରୋକିବା ପାଇଁ ଉକ୍ତ ଗ୍ରାମରେ ଭାରତୀୟ ନାଗରିକ ସୁରକ୍ଷା ସଂହିତା (BNSS)ର ଧାରା ୧୬୨ ଅଧୀନରେ ନିଷେଧାଦେଶ ଜାରି କରାଯାଇଛି।

ଅଧିକାରୀମାନେ ଜଣାଇଛନ୍ତି ଯେ ‘ଚସାଦ’ଘଟଣା ପରେ ଶନିବାର ଦିନ କାଙ୍ଗପୋକପି ଜିଲ୍ଲାର ତାପନ ଏବଂ ମକୁଇ ଗ୍ରାମ ଉପରେ ସନ୍ଦିଗ୍ଧ ଉଗ୍ରବାଦୀମାନେ ଆକ୍ରମଣ କରିଥିଲେ। ଏହି ଆକ୍ରମଣ ସମୟରେ ନାଗା ଗ୍ରାମର ସୁରକ୍ଷା ଦାୟିତ୍ୱରେ ଥିବା ଦୁଇଜଣ ବ୍ୟକ୍ତି – ଏମ୍. ଡାଇମାଇ (M. Daimai) ଏବଂ ଆର୍. ଗାଙ୍ଗମେଇ (R. Gangmei) ଏବଂ ରିଙ୍ଗକାଙ୍ଗମାଇ (Ringkangmai) ନାମକ ଅନ୍ୟ ଜଣେ ବ୍ୟକ୍ତି ପ୍ରାଣ ହରାଇଥିଲେ। ନାଗା ସମ୍ପ୍ରଦାୟର ପ୍ରତିନିଧିତ୍ୱ କରୁଥିବା ଏକ ନାଗରିକ ସମାଜ ସଂଗଠନ ‘ୱାର୍କିଂ କମିଟି ଜେଟିସି ମଣିପୁର’ (Working Committee JTC Manipur) ମଧ୍ୟ ଦାବି କରିଛି ଯେ ଉଗ୍ରବାଦୀମାନେ ଅଜିନବୋଉ ଆର୍. ( ୫୨ ବର୍ଷ) ନାମକ ଜଣେ ଗ୍ରାମବାସୀଙ୍କ ମୁଣ୍ଡ କାଟି ହତ୍ୟା କରିଛନ୍ତି। ସମ୍ମାନଜନକ ଭାବେ ଶେଷକୃତ୍ୟ ସମ୍ପନ୍ନ କରିବା ପାଇଁ ତାଙ୍କର କଟା ମୁଣ୍ଡ ଫେରାଇ ଦେବାକୁ ସଂଗଠନଟି ଦାବି କରିଛି।

ଅଧିକାରୀଙ୍କ ସୂଚନାନୁଯାୟୀ, ଶନିବାର ଦିନ କାମଜୋଙ୍ଗ ଜିଲ୍ଲାର ଭାରତ-ମିଆଁମାର ସୀମା ନିକଟସ୍ଥ ତଙ୍ଗଖୁଲ ନାଗା ସମ୍ପ୍ରଦାୟର ଗ୍ରାମ ‘ନିଙ୍ଗଚୌ’ରେ ସନ୍ଦିଗ୍ଧ ଉଗ୍ରବାଦୀମାନେ ପ୍ରବେଶ କରି ଗୁଳିଚାଳନା କରିଥିଲେ। ଏହି ଘଟଣାରେ ନାଗାଚାନସୋ ନିଙ୍ଗଶେନ୍ (୩୫) ଏବଂ ଲେଇଶିଶାନ୍ ଲେଇଶାଡାଙ୍ଗ (୪୮) ପ୍ରାଣ ହରାଇଥିଲେ। ଆକ୍ରମଣ ପରେ ସୁରକ୍ଷା ବାହିନୀ ଉକ୍ତ ଗ୍ରାମରେ ପହଞ୍ଚିଥିଲା। ସ୍ଥାନୀୟ ଲୋକଙ୍କ କହିବା ଅନୁସାରେ, ଗୁଳିଚାଳନା ପରେ ଆକ୍ରମଣକାରୀମାନେ ମିଆଁମାର ଆଡ଼କୁ ପଳାଇ ଯାଇଥିଲେ।

ଶନିବାର ଦିନ ଉଖରୁଲ୍ ଜିଲ୍ଲାର ଚେପୁ ୟାଓଲେନ୍ ଗ୍ରାମ ନିକଟରେ ସନ୍ଦିଗ୍ଧ ଉଗ୍ରବାଦୀମାନେ ଏକ କାର୍ ଉପରକୁ ଗୁଳି ଚଳାଇଥିଲେ, ଯାହା ଫଳରେ ୪୦ ବର୍ଷୀୟ ସନ୍ଦୀପ ରାଏଙ୍କ ମୃତ୍ୟୁ ଘଟିଥିଲା। ଅଧିକାରୀମାନେ ଜଣାଇଛନ୍ତି ଯେ ସେ ନିଜେ ଚଳାଉଥିବା ଗାଡ଼ି ଭିତରେ ହିଁ ତାଙ୍କର ମୃତ୍ୟୁ ହୋଇଥିଲା। ଏଥିସହିତ, କାଙ୍ଗପୋକପି ଜିଲ୍ଲାର ମାକୁଇ ଆଶାଙ୍ଗ ଏବଂ ତାପାନ ଅଞ୍ଚଳରେ ସଶସ୍ତ୍ର ଗୋଷ୍ଠୀଗୁଡ଼ିକ ମଧ୍ୟରେ ପ୍ରବଳ ଗୁଳିବିନିମୟ ହୋଇଥିବା ଖବର ମଧ୍ୟ ମିଳିଛି।

ଚଳିତ ବର୍ଷ ଫେବୃଆରୀ ମାସରୁ କୁକି ଏବଂ ନାଗା ଆଦିବାସୀ ସମ୍ପ୍ରଦାୟ ମଧ୍ୟରେ ଚାଲିଥିବା ହିଂସାକାଣ୍ଡରେ ୪୦ରୁ ଅଧିକ ଲୋକ ପ୍ରାଣ ହରାଇଛନ୍ତି ଏବଂ ଅନେକ ଘର ଜଳାଇ ଦିଆଯାଇଛି। ଏହା ପୂର୍ବରୁ, ଇମ୍ଫାଲ ଉପତ୍ୟକାରେ ବାସ କରୁଥିବା ମୈତେଇ ସମ୍ପ୍ରଦାୟ ଏବଂ ଆଖପାଖ ପାହାଡ଼ ଅଞ୍ଚଳରେ ରହୁଥିବା କୁକି ସମ୍ପ୍ରଦାୟ ମଧ୍ୟରେ ମଧ୍ୟ ହିଂସାକାଣ୍ଡ ଘଟିଥିଲା; ସେହି ସଂଘର୍ଷରେ ଶହ ଶହ ଲୋକଙ୍କ ମୃତ୍ୟୁ ହୋଇଥିଲା।