ପୁରୀ: ଦିଆସିଲି କାଠିରେ ଅଦ୍ଭୁତ କଳାକୃତି । ପୁରୀର ୨୧ ବର୍ଷୀୟ ପ୍ରତିଭାବାନ କଳାକାର ଶାଶ୍ୱତ ରଞ୍ଜନ ସାହୁ ୩ ହଜାର ୪୦୨ଟି ଦିଆସିଲି କାଠି ବ୍ୟବହାର କରି ଆଇଏନ୍ଏସ୍ ଭେଲା (ଏସ୍୨୪)ର ଏକ ଜଟିଳ ମଡେଲ ତିଆରି କରିଛନ୍ତି । ଏହି ଉଲ୍ଲେଖନୀୟ କଳାକୃତିର ଲମ୍ବ ୨୨ ଇଞ୍ଚ ରହିଛି । ଏହାକୁ ନିର୍ମାଣ କରିବାକୁ ୮ ଦିନ ସମୟ ଲାଗିଥିଲା ।
ପୁରୀରେ ଭାରତୀୟ ନୌସେନା ଦିବସ ଉତ୍ସବରେ ଅନୁପ୍ରାଣିତ ହୋଇ ଶାଶ୍ୱତ ଦେଶର ନୌସେନା ବାହିନୀକୁ ଶୁଭେଚ୍ଛା ଜଣାଇବା ପାଇଁ କିଛି ଅନନ୍ୟ ସୃଷ୍ଟି କରିବାକୁ ଲକ୍ଷ୍ୟ ରଖିଥିଲେ । ତାଙ୍କର ଦିଆସିଲି କାଠି କଳାକୃତି ତାଙ୍କର ସୃଜନଶୀଳତା ଏବଂ ନିଷ୍ଠାର ଏକ ପ୍ରମାଣ ।
ଶାଶ୍ୱତ କହିଛନ୍ତି ଯେ, ଆମ ଦେଶର ନୌସେନାକୁ ସମ୍ମାନ ଦେବା ପାଇଁ ମୁଁ କିଛି ବିଶେଷ କରିବାକୁ ଚାହୁଁଥିଲି । ମୁଁ ଏହି କଳାକୃତି ତିଆରି କରିଥିବାରୁ ମୁଁ ଗର୍ବିତ ଏବଂ ମୁଁ ଭାରତୀୟ ନୌସେନାକୁ ସେମାନଙ୍କର ବିଶେଷ ଦିନରେ ଶୁଭେଚ୍ଛା ଜଣାଉଛି ବୋଲି ସେ କହିଛନ୍ତି ।