ସୁନ୍ଦରଗଡ: ୨ ଜଣ କୁଖ୍ୟାତ ଚୋରଙ୍କୁ ଧରିବାରେ ସଫଳ ହୋଇଛି ସୁନ୍ଦରଗଡ଼ ପୋଲିସ । ରବିବାର ଘଟିଥିବା ଲୁଟ୍ ମାମଲାରେ ଯାଞ୍ଚ କରୁଥିବା ସମୟରେ ଉଭୟଙ୍କୁ ଧରିବାରେ ସଫଳ ହୋଇଛି । ଗିରଫ ଦୁଇ ଅଭିଯୁକ୍ତ ହେଲେ ଏମଡି ଇକ୍କୁ ଓ ଏମଡି ମୋବିନ । ସେମାନେ ସୁନ୍ଦରଗଡ ଟାଉନ ଥାନା ଡେଙ୍ଗିଭାଡି ଅଞ୍ଚଳର ବୋଲି ଜଣାପଡିଛି । ସେମାନଙ୍କ ନିକଟରୁ ବନ୍ଧୁକ, ନଗଦ ଟଙ୍କା, ୧୦ଟି ମୋବାଇଲ ଓ ଅନ୍ୟାନ୍ୟ ମାରଣାସ୍ତ୍ର ଜବତ କରିଛି ପୋଲିସ ।
ଖବର ମୁତାବକ, ରବିବାର ଅପରାହ୍ନ ସମୟରେ ପଶ୍ଚିମବଙ୍ଗ ମୁର୍ସିଦାବାଦର ଏସ୍.କେ ଆକ୍ବର କାମ ସାରି ଫେରୁଥିବା ବେଳେ ଏହି ୨ ଚୋର ଏକ ବାଇକରେ ଆସି ବନ୍ଧୁକ ଓ ଛୁରି ଦେଖାଇ ଧମକ ଚମକ ଦେଇଥିଲେ । ପରେ ତାଙ୍କଠାରୁ ୩ଟି ମୋବାଇଲ ଓ ନଗଦ ୫ ହଜାର ଟଙ୍କା ନେଇଯାଇଥିଲେ । ଏସ୍.କେ ଆକବର ଏ ସମ୍ପର୍କରେ ଟାଉନ ଥାନାରେ ଲିଖିତ ଅଭିଯୋଗ କରିଥିଲେ ।
ଅଭିଯୋଗକୁ ଭିତ୍ତିକରି ଟାଉନଥାନା ପୋଲିସ ବିଭିନ୍ନ ସ୍ଥାନରେ ଚଢଉ କରି ଦୁଇ ଲୁଟେରାଙ୍କୁ ଧରିବାରେ ସଫଳ ହୋଇଥିଲା । ତେବେ ପୂର୍ବରୁ ମୋବିନ ନାଁରେ ଜିଲ୍ଲାର ଟାଉନ ଥାନା, ତଲସରା ଓ ରାଜଗାଙ୍ଗପୁର ଥାନାରେ ୭ଟି ମାମଲା ରହିଛି । ସେ ଜଣେ ପେଶାଦାର ଅପରାଧୀ । ତା’ ବିରୋଧରେ ଲୁଟ୍, ହତ୍ୟା ଧମକ ଚମକ, ଚୋରି, ବେଆଇନ ଭାବେ ଅସ୍ତ୍ର ରଖିବା ପରି ଭଳି ସଙ୍ଗୀନ ମାମଲା ରହିଛି ।