ରାସ୍ତା ମଝିରେ ଜଳିଗଲା ଯାତ୍ରୀବାହୀ ବସ୍, ସମସ୍ତ ଯାତ୍ରୀ ସୁରକ୍ଷିତ

ସୂଚନା ଅନୁଯାୟୀ,  ଏକ ଘରୋଇ ବସ୍‌ ଆଜି ସନ୍ଧ୍ୟା ସମୟରେ କୋରାପୁଟ ଜିଲ୍ଲା ଜୟପୁର ଠାରୁ ବାହାରି ରାଉରକେଲା ଅଭିମୁଖେ ଯାଉଥିଲା। ଜୁନାଗଡ଼ ଥାନା ଅନ୍ତର୍ଗତ ବଳଦିଆମାଲ ଛକ ୨୬ ନମ୍ବର ଜାତୀୟ ରାଜପଥରେ ସେହି  ଯାତ୍ରୀବାହୀ ବସ୍‌ରେ ହଠାତ୍‌ ନିଆଁ ଲାଗିଯାଇଥିଲା। ବସ୍‌ରେ ନିଆଁ ଲାଗିବା ଜାଣି ଡ୍ରାଇଭର ତୁରନ୍ତ ବସ୍‌କୁ ଅଟକାଇ ଦେଇଥିଲେ। ଏହାପରେ ସମସ୍ତ ଯାତ୍ରୀ କାଳବିଳମ୍ବ ନକରି ବସ ବାହାରକୁ ଚାଲି ଆସିଥିଲେ। ଏଥିରେ  ସ୍ଥାନୀୟ ଲୋକଙ୍କ ସହଯୋଗ କରିଥିଲେ। ଫଳରେ ଗାଡ଼ିରେ ବସିଥିବା ଯାତ୍ରୀ ଅଳ୍ପକେ ବର୍ତ୍ତିଯାଇଥିଲେ। କିଛି ସମୟ ମଧ୍ୟରେ ଯାତ୍ରୀବାହୀ ବସଟି  ଜଳି ଭସ୍ମୀଭୂତ ହୋଇଯାଇଥିଲା।