ନୂଆଦିଲ୍ଲୀ: ଝିଅ କଲା ଚୋରି, ବାପା ପାଇଲା ଦଣ୍ଡ । କନ୍ନଡ ଅଭିନେତ୍ରୀ ରାନ୍ୟା ରାଓଙ୍କ ସୁନା ଚୋରାଚାଲାଣ ମାମଲାରେ ରାନ୍ୟାଙ୍କ ବାପା ତଥା ଡିଜିପି ରାମଚନ୍ଦ୍ର ରାଓଙ୍କୁ ବାଧ୍ୟତାମୂଳକ ଛୁଟିରେ ପଠାଇଲେ କର୍ଣ୍ଣାଟକ ସରକାର । କର୍ଣ୍ଣାଟକ ଷ୍ଟେଟ୍ ପୋଲିସ ହାଉସିଂ ନିଗମର ଡିଜିପି ଭାବେ କାର୍ଯ୍ୟରତ ଥିଲେ ରାମଚନ୍ଦ୍ର । ତେବେ ଝିଅର ଏହି ମାମଲା ପରେ ରାମଚନ୍ଦ୍ରଙ୍କ ଉପରେ ସରକାର ଏପରି କାର୍ଯ୍ୟାନୁଷ୍ଠାନ ନେଇଥିବା ଜଣା ପଡିଛି ।
ସୂଚନା ଅନୁସାରେ, ଗତ ଶୁକ୍ରବାର ସୁନା ଚୋରା ଚାଲାଣ ମାମଲାରେ କନ୍ନଡ ଅଭିନେତ୍ରୀ ରାନ୍ୟା ରାଓଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ ଅର୍ଥନୈତିକ ଅପରାଧ ଅଦାଲତ । ଏହାପରେ ଶନିବାର ପୁଣି ରାନ୍ୟା ସେସନ କୋର୍ଟରେ ସାନି ଜାମିନ ଆବେଦନ କରିଛନ୍ତି । ୩୪ ବର୍ଷୀୟ ରାନ୍ୟା ରାଓଙ୍କୁ ବେଙ୍ଗାଲୁରୁର କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ ଦୁବାଇରୁ ୧୪ କିଲୋ ସୁନା ଲାଠି ସହିତ ଗିରଫ କରାଯାଇଥିଲା। ଏହି ସୁନାର ଆନୁମାନିକ ମୂଲ୍ୟ ୧୨.୫୬ କୋଟି ଟଙ୍କା ବୋଲି କୁହାଯାଇଥିଲା। ତାଙ୍କ ସହିତ ଅନ୍ୟ ଜଣେ ଅଭିଯୁକ୍ତ ତରୁଣ କୋଣ୍ଡୁରୁଙ୍କୁ ମଧ୍ୟ ଗିରଫ କରାଯାଇଛି।
ରାନ୍ୟା ରାଓ ତାଙ୍କ ଅଟକ ସମୟରେ DRI ଅଧିକାରୀମାନଙ୍କ ଉପରେ ମୌଖିକ ଦୁର୍ବ୍ୟବହାର ଅଭିଯୋଗ କରିଥିଲେ। ସେ ଦାବି କରିଥିଲେ ଯେ ଯେତେବେଳେ ସେ କିଛି ପ୍ରଶ୍ନର ଉତ୍ତର ଦେବାକୁ ସଂକୋଚ କରିଥିଲେ, ସେତେବେଳେ ତାଙ୍କୁ ଦୁର୍ବ୍ୟବହାର କରାଯାଇଥିଲା। ସେ ଏହା ମଧ୍ୟ ଅଭିଯୋଗ କରିଥିଲେ ଯେ ଅଧିକାରୀମାନେ ତାଙ୍କ ସମ୍ମତି ବିନା ବଳପୂର୍ବକ ତାଙ୍କୁ କାଗଜପତ୍ରରେ ସ୍ୱାକ୍ଷର କରିବାକୁ ବାଧ୍ୟ କରିଥିଲେ। ଡିଆରଆଇ ଏହି ଅଭିଯୋଗଗୁଡ଼ିକୁ ପ୍ରତ୍ୟାଖ୍ୟାନ କରିଛି ଏବଂ କହିଛି ଯେ ସମସ୍ତ ପ୍ରକ୍ରିୟା ଆଇନଗତ ଏବଂ ସମ୍ମାନଜନକ ଭାବରେ ଅନୁସରଣ କରାଯାଇଛି।
ଏହାପରେ ବରିଷ୍ଠ ଆଇପିଏସ୍ ଅଧିକାରୀ ରାମଚନ୍ଦ୍ର ରାଓଙ୍କ ସହ ଲିଙ୍କ୍ ନେଇ ତଦନ୍ତ ଆରମ୍ଭ ହୋଇଥିଲା। ରାନ୍ୟା ରାଓ ହେଉଛନ୍ତି ବରିଷ୍ଠ ଆଇପିଏସ ଅଧିକାରୀ ରାମଚନ୍ଦ୍ର ରାଓଙ୍କ ସାବତ ଝିଅ। ରାମଚନ୍ଦ୍ର ରାଓ କର୍ଣ୍ଣାଟକ ରାଜ୍ୟ ପୋଲିସ ହାଉସିଂ ଏବଂ ଭିତ୍ତିଭୂମି ବିକାଶ ନିଗମ ଲିମିଟେଡର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ। ୧୧ ମାର୍ଚ୍ଚ ୨୦୨୫ରେ, କର୍ଣ୍ଣାଟକ ସରକାର ତାଙ୍କ ଭୂମିକାର ତଦନ୍ତ କରିବା ପାଇଁ ଅତିରିକ୍ତ ମୁଖ୍ୟ ସଚିବ ଗୌରବ ଗୁପ୍ତାଙ୍କୁ ନିଯୁକ୍ତ କରିଥିଲେ।
Comments are closed.