ନୂଆଦିଲ୍ଲୀ: ପାକିସ୍ତାନ ଏବେ ବି ତାର ଘୃଣ୍ୟ କାର୍ଯ୍ୟ ଜାରି ରଖିଛି। ବେସାମରିକ ବିମାନଗୁଡ଼ିକୁ ଆବରଣ ଭାବରେ ବ୍ୟବହାର କରି ଭାରତ ଉପରେ ଜାରି ରଖିଛି ଆକ୍ରମଣ। ପାକିସ୍ତାନ ଦ୍ୱାରା ରାତିସାରା ଲଗାତାର ଆକ୍ରମଣ ପରେ, ଭାରତର ଚାରୋଟି ପ୍ରମୁଖ ଭାରତୀୟ ବାୟୁସେନା (IAF) ଷ୍ଟେସନ – ଉଧମପୁର, ପଠାଣକୋଟ, ଆଦମପୁର ଏବଂ ଭୁଜ ପାକିସ୍ତାନୀ ଆକ୍ରମଣରେ ସୀମିତ କ୍ଷତି ହୋଇଛି ବୋଲି ସରକାରଙ୍କ ପକ୍ଷରୁ ନିଶ୍ଚିତ କରାଯାଇଛି। ପ୍ରତିଶୋଧ ସ୍ୱରୂପ, ଭାରତୀୟ ସଶସ୍ତ୍ର ବାହିନୀ ପାକିସ୍ତାନୀ ୬ଟି ବାୟୁସେନା ଘାଟି- ରଫିକି, ମୁରିଦ, ଚକଲାଲା, ରହିମ ୟାର ଖାନ, ସୁକୁର ଏବଂ ଚୁନିଆ ଉପରେ ସଠିକ୍ ଆକ୍ରମଣ ଆରମ୍ଭ କରିଛି। ସରକାରଙ୍କ ଅନୁଯାୟୀ, ଏହି ଦ୍ରୁତ ଏବଂ ହିସାବବଦ୍ଧ ଆକ୍ରମଣ କେବଳ ସାମରିକ ଭିତ୍ତିଭୂମିକୁ ଟାର୍ଗେଟ କରି କରାଯାଇଥିଲା ଏବଂ ସମାନ୍ତରାଳ କ୍ଷତିକୁ କମ କରିବା ପାଇଁ କରାଯାଇଥିଲା।
ବଢ଼ୁଥିବା ସଂଘର୍ଷ ଉପରେ ବ୍ରିଫିଂ ସମୟରେ, କର୍ଣ୍ଣେଲ ସୋଫିଆ କୁରେଶୀ କହିଛନ୍ତି, ପାକିସ୍ତାନ ରାତିସାରା ୨୬ ଟି ରଣନୈତିକ ସ୍ଥାନରେ ଆକ୍ରମଣ କରିବାକୁ ଚେଷ୍ଟା କରିଥିଲା, ଯେଉଁଥିରେ ବାୟୁସେନା ଘାଟି ଏବଂ ପରିବହନ କେନ୍ଦ୍ର ଅନ୍ତର୍ଭୁକ୍ତ ରହିଥିଲା। ପ୍ରାୟ ୧.୪୦ ସମୟରେ ପଞ୍ଜାବର ଏକ ବାୟୁସେନା ଘାଟି ଉପରେ ଏକ ହାଇ-ସ୍ପିଡ୍ ମିସାଇଲ୍ ମଧ୍ୟ ମାଡ଼ କରାଯାଇଥିଲା, ଯେତେବେଳେ ଶ୍ରୀନଗର, ଅବନ୍ତିପୁରା ଏବଂ ଉଧମପୁର ବାୟୁସେନା ଘାଟି ନିକଟରେ ଥିବା ଚିକିତ୍ସା କେନ୍ଦ୍ର ଏବଂ ସ୍କୁଲ ପରିସରରେ ନାଗରିକ ଭିତ୍ତିଭୂମି ଉପରେ ଆକ୍ରମଣ ମଧ୍ୟ ହୋଇଛି।
ଏଥିସହିତ କୁରେଶୀ ଏହା ବି ସୂଚନା ଦେଇଛନ୍ତି ଯେ, ପାକିସ୍ତାନ ଡ୍ରୋନ୍, ଲଢ଼ୁଆ ବିମାନ ଏବଂ ଦୂରଗାମୀ ତୋପ ବ୍ୟବହାର କରି ଭାରତର ପଶ୍ଚିମ ମୋର୍ଚ୍ଚାରେ ନିରନ୍ତର ଭାବରେ ନିୟୋଜିତ ଥିଲା। ଭାରତୀୟ ସେନା, ସଂଯୋମତାର ସହ କେବଳ ପୂର୍ବ-ଚିହ୍ନିତ ସାମରିକ ଲକ୍ଷ୍ୟସ୍ଥଳ ବିରୁଦ୍ଧରେ ହିଁ ଜବାବ ଦେଇଥିଲା। ଯେଉଁଥିରେ ବୈଷୟିକ ଭିତ୍ତିଭୂମି, କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ର, ରାଡାର ସଂସ୍ଥାପନ ଏବଂ ଅସ୍ତ୍ର ସଂରକ୍ଷଣ ସ୍ଥାନ ଅନ୍ତର୍ଭୁକ୍ତ ରହିଛି। ଏଥିରେ ଲଢ଼ୁଆ ବିମାନରୁ ପ୍ରକ୍ଷିପ୍ତ-ନିର୍ଦ୍ଦେଶିତ ଗୋଳାବାରୁଦ ବ୍ୟବହାର କରି ପସରୁର ଏବଂ ସିଆଲକୋଟ ବିମାନ ଘାଟିରେ ରାଡାର ସ୍ଥାନରେ ଆକ୍ରମଣ କରାଯାଇଥିଲା।
ୱିଙ୍ଗ କମାଣ୍ଡର ଵ୍ୟୋମିକା ସିଂହ ଗଣମାଧ୍ୟମକୁ ଏହା ସ୍ପଷ୍ଟ କରିଥିଲେ, ଭାରତୀୟ ସଶସ୍ତ୍ର ବାହିନୀ କାର୍ଯ୍ୟକ୍ଷମ ପ୍ରସ୍ତୁତିର ଉଚ୍ଚ ସ୍ଥିତିରେ ରହିଛି। ସମସ୍ତ ଶତ୍ରୁତାପୂର୍ଣ୍ଣ କାର୍ଯ୍ୟକୁ ପ୍ରଭାବଶାଳୀ ଭାବରେ ପ୍ରତିହତ କରାଯାଇଛି ଏବଂ ସମାନୁପାତିକ ଭାବରେ ଜବାବ ବି ଦିଆଯାଇଛି।
ଏହାବ୍ୟତୀତ କର୍ଣ୍ଣେଲ କୁରେଶୀ ପୁନରାବୃତ୍ତି କରିଥିଲେ ଯେ, ଅସ୍ଥିର ପରିସ୍ଥିତି ସତ୍ତ୍ୱେ, ଭାରତୀୟ ଅଧିକାରୀମାନେ ଉତ୍ତେଜନା ହ୍ରାସ ପାଇଁ ଦେଶର ପ୍ରତିବଦ୍ଧତାକୁ ପୁନଃସ୍ଥାପିତ କରିଥିଲେ, କିନ୍ତୁ ଯଦି ପାକିସ୍ତାନ ପ୍ରତିଶୋଧ ନିଏ, ତେବେ ଏବେ ଆମର ପ୍ରତିକ୍ରିୟା ସମାନୁପାତିକ ଏବଂ ସାମରିକ ଲକ୍ଷ୍ୟ ପର୍ଯ୍ୟନ୍ତ ସୀମିତ ରହିଛି ହେଲେ ଭାରତ ଆଉ ଶତ୍ରୁତାପୂର୍ଣ୍ଣ କାର୍ଯ୍ୟକୁ ସହ୍ୟ କରିବ ନାହିଁ ବୋଲି ସେ ଚେତାଇ ଦେଇଛନ୍ତି।
Comments are closed.